11 ناۋرىزدا الماتىدا قازاقستان رەسپۋبليكاسى پرەزيدەنتىنىڭ كومەكشىسى – قاۋىپسىزدىك كەڭەسىنىڭ حاتشىسى مارات ءتاجيننىڭ توراعالىعىمەن قازاقستان رەسپۋبليكاسى قاۋىپسىزدىك كەڭەسى جانىنداعى ساراپشىلار كەڭەسىنىڭ ءماجىلىسى بولىپ ءوتتى. كۇن تارتىبىنە سايكەس قازاقستانداعى ءدىني احۋال مەن ميگراتسيالىق جانە دەموگرافيالىق ساياساتتى جەتىلدىرۋ ماسەلەلەرى قارالدى.
العاشقى ماسەلە بويىنشا فيلوسوفيا عىلىمدارىنىڭ دوكتورى, پروفەسسور ا.كوسيچەنكو مەن ساياسي عىلىمدار كانديداتى ش.امىربەكوۆ ءسوز ءسويلەدى. ساراپشىلار جەكەلەگەن ءدىني ۇيىمداردىڭ كەرى ءىس-ارەكەتتەرىمەن بايلانىستى قاتەرلەر مەن پروبلەمالار بوي كورسەتىپ وتىرعانىن اتاپ كورسەتتى.
ەكىنشى ماسەلە بويىنشا ساياسي عىلىمدار دوكتورى ە.الياروۆ پەن الەۋمەتتانۋ عىلىمدارىنىڭ كانديداتى گ.ەلەۋوۆا بايانداما جاسادى. پىكىرتالاس بارىسىندا عالىمدار دەموگرافيا مەن ميگراتسيا سالالارىندا وڭ وزگەرىستەرمەن قاتار, كەرى فاكتورلار بار ەكەنىنە دە نازار اۋداردى.
ءماجىلىستى قورىتىندىلاي كەلىپ, ساراپشىلار كەڭەسىنىڭ توراعاسى م.ءتاجين ەلىمىزدەگى ءدىني جاعدايلاردىڭ دامۋىنا جان-جاقتى جانە كەشەندى ساراپتاما جاساپ, عىلىمي-ساراپشىلار قاۋىمىن تارتۋ جولدارىمەن ميگراتسيالىق جانە دەموگرافيالىق ساياساتتى جەتىلدىرۋ جونىندە ۇسىنىمدار ءتۇزۋ قاجەتتىگىن اتاپ كورسەتتى.
قاۋىپسىزدىك كەڭەسى جانىنداعى ساراپشىلار كەڭەسى ۇلتتىق قاۋىپسىزدىكتى قامتاماسىز ەتۋ سالاسىندا عىلىمي-ادىستەمەلىك ۇسىنىمداردى جاساۋ ماقساتىندا عىلىمي-ساراپتامالىق زەرتتەۋ جۇمىستارىمەن اينالىساتىن عىلىمي-كونسۋلتاتيۆتىك ورگان بولىپ تابىلادى. كەڭەسكە جەتەكشى عالىمدار, ساراپشىلار, عىلىمي-زەرتتەۋ ورتالىقتارى مەن ۇكىمەتتىك ەمەس ۇيىمدار وكىلدەرى مۇشە.
تالقىلاۋ بارىسىندا ساراپشىلار كەڭەسى كۇن ءتارتىبىندەگى ماسەلەلەر بويىنشا ۇسىنىمدار بەردى. ەندى ولار قازاقستان رەسپۋبليكاسى قاۋىپسىزدىك كەڭەسىنىڭ جۇمىسىندا پايدالانىلاتىن بولادى.
دەرەك كوزى: “ەگەمەن-اقپارات”.