ەلباسىنىڭ جىل سايىنعى ءداستۇرلى جولداۋى مەملەكەتتىڭ تاياۋ جىلداردا اتقارۋعا ءتيىستى مىندەتتەرىن سارالاۋ مەن ەلدىڭ ءال-اۋقاتىن كوتەرۋگە باعىتتالاتىندىعى بەلگىلى. ايتسە دە ومىرلىك ماڭىزى بار مەملەكەتتىك شارا – جولداۋدى ءمانى, ماعىناسى بولەك جولداما سوزىمەن شاتاستىرىپ جۇرەتىندەر دە بار.
سوندىقتان, مەملەكەتتىڭ كەلەشەگى مەن بۇگىنىن ايقىندايتىن جولداۋدى حالىققا ناسيحاتتاۋ, ءمانىن ءتۇسىندىرۋ, كوپ كوكەيىندە جۇرگەن سۇراقتاردىڭ, كۇرمەۋلى ماسەلەلەردىڭ ءتۇيىنىن تارقاتۋ ءۇشىن وبلىستارعا ارناۋلى دەلەگاتسيالار شىعىپ جاتىر. وڭتۇستىككە كەلگەن رەسپۋبليكالىق اقپاراتتىق-ناسيحاتتىق توپتىڭ قۇرامىندا پرەزيدەنت اكىمشىلىگى ىشكى ساياسات ءبولىمىنىڭ مەڭگەرۋشىسى دارحان مىڭباي مەن ءبىلىم جانە عىلىم ءمينيسترى جانسەيىت تۇيمەباەۆ بار. توپ-توپقا بولىنگەن ناسيحاتشىلار اۋىل, اۋدانداردى ارالادى. وبلىس ورتالىعىنداعى وپەرا جانە بالەت تەاترىندا وتكەن اكتيۆ كەزدەسۋىن وبلىس اكىمى اسقار مىرزاحمەتوۆ جۇرگىزىپ وتىردى.
جانسەيىت تۇيمەباەۆ ەلباسىنىڭ جولداۋىندا كوتەرىلگەن ءماسەلەلەر بويىنشا ناقتى جاعدايلاردى باياندادى. ەكونوميكانىڭ جەتى باستى سالاسىن قامتيتىن جەدەل يندۋستريالىق-يننوۆاتسيالىق دامۋدىڭ مەملەكەتتىك باعدارلاماسى بويىنشا اتقارىلىپ جاتقان جۇمىستاردى سارالادى. ۇكىمەتتىڭ باعدارلامالارى, اتاپ ايتقاندا, “بيزنەستىڭ جول كارتاسى-2020”, “ەكسپورتتار-2020”, وسىمدىك-2020” جانە ينۆەستور-2020” باعدارلامالارىنىڭ ءمانىن ءتۇسىندىردى.
ءبىلىم جانە عىلىم ءمينيسترى وڭتۇستىكتە اتقارىلىپ جاتقان وڭدى ءىستەرگە دە توقتالدى. رەسپۋبليكانىڭ ءاربىر بەسىنشى تۇرعىنىن قۇرايتىن وڭتۇستىكتە ءبىلىم وشاقتارىنا ءزارۋلىك بار. “بىلتىرعى وقۋ جىلىندا وڭتۇستىك قازاقستان وبلىسىندا 23 جاڭا مەكتەپ پايدالانۋا بەرىلدى, بۇل رەسپۋبليكا تۇرعاي, كۇندەي كۇركىرەگەن كەڭەس وداعىنىڭ كەزىندە بولماعان جاعداي”, دەدى مينيستر. مۇنىڭ ءبارى وزدىگىنەن ورىندالمايدى. وبلىس باسشىسىنىڭ ۇكىمەتكە وسى ءزارۋ ماسەلەنى وتكىر قويۋىنىڭ, ءتيىستى ورىندارمەن ءتيىمدى جۇمىس ىستەۋىنىڭ ناتيجەسى, دەپ ءسوزىن ساباقتاعان مينيستر وبلىس باسشىسىنىڭ ورتا مەكتەپتەردەگى بۋحگالتەريالاردى ورتالىقتاندىرۋ تۋرالى يدەياسىن قولدايتىنىن ءبىلدىردى. ءتۇرلى تەكسەرۋشىلەردىڭ اراداي تالايتىنى – مەكتەپ. ازدى-كوپتى زاڭ بۇزۋشىلىقتى بۇركەلەمەۋ ءۇشىن مەكتەپ ديرەكتورى ۇستازدارعا سالىق سالىپ جاتادى. ونىڭ سوڭى سىبايلاس جەمقورلىققا سوقتىراتىندىعى ءسوزسىز. ال, بۋحگالتەريالاردى ورتالىقتاندىرۋ وسىنداي كەلەڭسىزدىكتەردىڭ الدىن الادى.
ەلباسى جولداۋى نە بەرەدى دەپ كۇتۋ – ماسىلدىق پيعىل. شىن پاتريوت كومەگىن ايقايلاماي-اق كورسەتە الادى. پرەزيدەنت اكىمشىلىگى ىشكى ساياسات ءبولىمىنىڭ مەڭگەرۋشىسى دارحان مىڭباي ماسەلەنىڭ وسى جاعىنان كەلدى. مەملەكەتتىك گرانتتار جىل سايىن كوبەيۋدە. ول جاقسى. ال, وسىدان كاسىپكەرلەر نەگە قالىس قالادى؟! رەسپۋبليكادا 170 مىڭ فيرما جۇمىس جاساپ جاتىر. وسىنىڭ ارقايسىسى ءبىر-ءبىر ستۋدەنتتى ءوز ەسەپتەرىنەن وقىتۋعا شەشىم قابىلداسا قوسىمشا 170 ستۋدەنت گرانتقا يە بولادى ەكەن. عىلىم مەن ءبىلىم ءوزىن-ءوزى عانا اسىرامايدى, حالىقتى اسىرايدى. اتا-انالار وسىنى ءبىلۋى كەرەك.
“الدىمىزدا تەحنيكالىق جانە كاسىپتىك ءبىلىم بەرۋ جۇيەسىن حالىقارالىق باعدارلامالارمەن سايكەستەندىرۋ, جاڭاشىل كاسىپتىك ستاندارتتار ەنگىزۋ, ەكونوميكانىڭ بارلىق سالاسىن قاجەتتى كادرلارمەن قامتاماسىز ەتۋ مىندەتى تۇر. قازىر وتاندىق ۋنيۆەرسيتەتتەرگە رەيتينگى جونىندە قاتاڭ تالاپ قويىلدى. وقۋ ورىندارىن حالىقارالىق اككرەديتتەۋدەن وتكىزۋ ەلباسىنىڭ باقىلاۋىندا تۇرعان تاپسىرمالاردىڭ ءبىرى. بىزگە ساننان گورى ساپا ماڭىزدى”, دەپ ءسوزىن تۇيگەن د.مىڭباي الىپقاشتى اڭگىمەلەرگە ارقاۋ بولىپ جۇرگەن كەدەن وداعى, مەملەكەتتىك تىلگە قاتىستى پايىمداۋلارىن ايتتى. دۇرلىگەتىندەي دانەڭە جوق, جاندى جۇمىس ءجۇرىپ جاتىر. ورتاق قۇندىلىعىمىز – تاۋەلسىزدىك. ونىڭ تۇعىرى مىقتى بولۋ ءۇشىن كوپ بولىپ قولداۋ, مەملەكەتتىك باعدارلامالاردى اياعىنا جەتكىزۋگە اتسالىسۋ قاجەت.
وسىنداي جاقسى اڭگىمە م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىندە دە جالعاستى. وقمۋ – بۇگىندە گەرمانيا, انگليا ۋنيۆەرسيتەتتەرىمەن ىسكەرلىك بايلانىس ورناتقان. جەتى ماماندىق بويىنشا حالىقارالىق سەرتيفيكاتقا يە بولعان ۋنيۆەرسيتەتتىڭ ستۋدەنتتەرى قالاسا وقۋىن شەت ەلدە جالعاستىرا الادى. قوس ديپلومدى تۇلەكتىڭ وزگە مەملەكەتتەردە جۇمىس جاساۋىنا ءبىلىم, بىلىگى جەتەدى.
ءبىلىم جانە عىلىم ءمينيسترى ءوزىنىڭ لوندون ۋنيۆەرسيتەتى پروفەسسورىمەن كەزدەسۋىن ايتىپ بەردى. انگليادا وقىپ جاتقان شەتەل ستۋدەنتتەرىنىڭ قايسىسى قابىلەتتى, ىنتالى دەگەندە پروفەسسور “قىتاي جانە قازاق ستۋدەنتتەرى” دەپتى. دەپتى دە ءسوزىن ءارى جالعاپتى. “بىراق, لوندون كافە, رەستوراندارىندا قازاق ستۋدەنتتەرى قىتاي ستۋدەنتتەرىنە قاراعاندا كوبىرەك وتىرادى”. قازاق ستۋدەنتتەرىنىڭ قابىلەتتىلىگىنە داۋ جوق. حالقىمىزدىڭ دارحان پەيىلىنە ساي تويشىلدىقتى ءسال كەيىنگە ىعىستىرسا, قازاق بالاسىنىڭ تۇلپارى وزعالى تۇر-اۋ.
لوندون پروفەسسورىنىڭ ايتپاعى وسى بولعان شىعار...
وڭتۇستىك قازاقستان وبلىسى