• RUB:
    6.68
  • USD:
    520.93
  • EUR:
    609.07
باستى سايتقا ءوتۋ
پرەزيدەنت 11 ءساۋىر, 2019

باتىسقازاقستاندىق اسسامبلەيا وكىلدەرى تۇراقتىلىقتى قولدايدى

1010 رەت
كورسەتىلدى

ورال قالاسىنداعى «دوستىق» ءۇيى عيماراتىندا وڭىردەگى ەتنو-مادەني ورتالىقتار باسشىلارى باس قوسىپ, قازاقستان پرەزيدەنتى قاسىم-جومارت توقاەۆتىڭ كەزەكتەن تىس سايلاۋ وتكىزۋ جونىندەگى ۇندەۋىنە قولداۋ ءبىلدىردى.

باتىس قازاقستان وبلىستىق قازاقستان حالقى اسسامبلەياسى اكتيۆى جينالىسى «قازاقستان رەسپۋبليكاسىنىڭ پرەزيدەنتىن كەزەكتەن تىس سايلاۋ تۋرالى» ماسەلەنى تالقىعا سالدى.

جيىنعا قاتىسقان اكتيۆ مۇشەلەرى, ەتنومادەني ورتالىقتار, ساياسي پارتيالار وكىلدەرى, قوعامدىق بىرلەستىكتەر, جوو وقىتۋشىلارى, «جاڭعىرۋ جولى» جاستار قوزعالىسىنىڭ بەلسەندىلەرى, قوعامدىق كەلىسىم كەڭەسى, انالار كەڭەسى, اقساقالدار كەڭەسى وكىلدەرى كەزەكپەن ءسوز الىپ, ەلىمىزدە باستالعالى تۇرعان ساياسي ناۋقان تۋرالى ءوز ويلارىن ءبىلدىردى.

- ءبىز قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ قازاقستان حالقىنا جولداۋىن ىقىلاسپەن تىڭدادىق. ارينە, ەلىمىز دەموكراتيالى, ەگەمەندى مەملەكەت بولعاندىقتان, ەلباسىن زاڭ جولىمەن حالىق سايلاۋى ءتيىس. 2019 جىلعى 9 ماۋسىمعا تاعايىندالىپ وتىرعان كەزەكتەن تىس پرەزيدەنت سايلاۋىنىڭ باستى ماقساتى وسىنداي. كوپۇلتتى مەملەكەتىمىز ءۇشىن وتە ماڭىزدى ساياسي ناۋقان الدىندا باسىمىزدى قوسىپ, پىكىر الماسقانىمىز ءجون, - دەدى باتىس قازاقستان وبلىستىق قازاقستان حالقى اسسامبلەياسى توراعاسىنىڭ ورىنباسارى, حاتشىلىق مەڭگەرۋشىسى عايسا قاپاقوۆ.

دوڭگەلەك ۇستەلدە وزگە دە ۇيىمدار وكىلدەرى ءوز پىكىرىن ورتاعا سالدى. قوعامدىق كەلىسىم كەڭەسىنىڭ مۇشەسى, «بقو اۆتوبۋس پاركى» جشس ديرەكتورى نۇرلىبەك ءبىرمانوۆ رەسپۋبليكاداعى قوعامدىق-ساياسي احۋالدى تالداي كەلىپ, كەزەكتەن تىس سايلاۋ وتكىزۋ – ۋاقىت پەن كەزەڭ تالابى دەگەن تۇجىرىمىن ايتتى. وسى ورايدا ارىپتەستەرىن ازاماتتىق بەلسەندى ارەكەتكە شاقىرعان نۇرلىبەك شايدوللا ۇلى ەل بولاشاعىنىڭ تۇراقتى بولۋى – سانالى ازاماتتاردىڭ ساپالى ارەكەتىنە تىكەلەي بايلانىستى بولاتىنىنا نازار اۋداردى. سوندىقتان ەلىمىز ءۇشىن اسا ماڭىزدى ساياسي ناۋقاندا سەلقوستىق تانىتۋعا بولمايدى.

باتىس قازاقستان وبلىستىق قازاقستان حالقى اسسامبلەياسى انالار كەڭەسىنىڭ مۇشەسى التىناي ەسقاليەۆا قازاقستانداعى ءداستۇرلى تۇراقتىلىقتىڭ ساقتالۋى – ونىڭ باسشىسىنا تىكەلەي بايلانىستى بولاتىنىن ايتتى. «ءبىز بولاشاق پرەزيدەنت سايلاۋىنا بەلسەندى قاتىسۋعا ءازىرمىز» دەيدى «اق وتاۋ» وتباسى ورتالىعىنىڭ جەتەكشىسى التىناي عالىمقىزى.

ماحامبەت وتەمىس ۇلى اتىنداعى بقمۋ جانىنان اشىلعان «رۋحاني جاڭعىرۋ» ينستيتۋتىنىڭ عىلىمي قىزمەتكەرى, تاريح ماگيسترى دانيال تانزەنوۆ, «لامەد» ەۆرەي قوعامدىق بىرلەستىگىنىڭ جەتەكشىسى فەليكس بايۋكانسكي, «ۆايناح» شەشەن-ينگۋش ەتنو-مادەني بىرلەستىگىنىڭ توراعاسى دانيلبەك ساراتوۆ, جۋرناليستيكا سالاسىنىڭ ارداگەرى سەرگەي كۋلپين, تاعى باسقالارى دا الداعى سايلاۋدىڭ ەلىمىز ءۇشىن اسا ماڭىزدى بەلەس بولاتىنىن ايتتى.

- بۇل سايلاۋ باسەكەلى, دەموكراتيالىق ۇستانىمدارعا ساي بولۋى تيىستىگىن پرەزيدەنت قاسىم-جومارت توقاەۆ ناقتى ايتتى. «مەن, مەملەكەت باسشىسى رەتىندە, سايلاۋدىڭ تازا, اشىق ءارى ءادىل وتۋىنە كەپىلدىك بەرەمىن! بۇل – مەنىڭ بەرىك ۇستانىمىم!» دەپ مالىمدەگەن پرەزيدەنتتىڭ سوزىنە كۇماندانۋدىڭ قاجەتى جوق. بۇگىندە الەمدەگى احۋال اۋمالى-توكپەلى بولىپ تۇر. سوندىقتان حالىق سايلاعان ەلباسى وتانىمىزدىڭ ۇزاقمەرزىمدى ستراتەگيالىق, تاكتيكالىق جوسپارلارىن جۇزەگە اسىرا الادى. ال وسىنداي جاۋاپتى كەزەڭدە بارلىق قوعامدىق ۇيىمدار, ساياسي پارتيالار ءوز ۇمىتكەرىن ۇسىنىپ, جاپپاي سايلاۋعا قاتىسادى دەپ ويلايمىن, دەيدى «مەملەكەتتىك ۇيىمدار, بانك مەكەمەلەرى مەن قوعامدىق قىزمەت كورسەتۋ سالالىق كاسىپوداعى» باتىس قازاقستان وبلىستىق فيليالىنىڭ جەتەكشىسى ايگۇل ەسەكەنوۆا.

«تۇراقتىلى پەن تاتۋلىق – قازاقستان ءۇشىن قالىپتى جاعدايعا اينالدى. بىراق بۇل قۇندىلىق وڭاي كەلگەن جوق. ەلىمىزدىڭ قازىرگى جەتىستىگىنە قازاقستان رەسپۋبليكاسىنىڭ تۇڭعىش پرەزيدەنتىنەن باستاپ بارشا قازاقستاندىقتاردىڭ ۇلەسى بار. بۇل باعا جەتپەس بايلىعىمىزدى قورعاۋىمىز كەرەك, كوزدىڭ قاراشىعىنداي ساقتاۋىمىز كەرەك» - جيىن سوڭىندا باتىس قازاقستان وبلىستىق قازاقستان حالقى اسسامبلەياسى اكتيۆى ءبىراۋىزدان وسىنداي تۇجىرىمعا كەلدى.

دوڭگەلەك ۇستەل ءماجىلىسىن قورىتىندىلاعان عايسا قاپاقوۆ اسسامبلەيالىقتاردىڭ قازاقستاندا وتكىزىلەتىن كەزەكتەن تىس پرەزيدەنت سايلاۋىنا قولداۋ بىلدىرگەنىنە ريزاشىلىق سەزىمىن ءبىلدىردى.

سوڭعى جاڭالىقتار