2010 جىلدىڭ 10 ناۋرىزىندا ساعات 15.00-دە Bnews.kz پورتالىندا يندۋستريا جانە ساۋدا ءمينيسترى اسەت يسەكەشەۆتىڭ قاتىسۋىمەن “قازاقستاننىڭ جاڭا يندۋستريالىق ساياساتى” تاقىرىبىندا ونلاين-كونفەرەنتسيا وتەدى. سۇراقتار www.bnew.kz پورتالى نەمەسە ءىnfo@bnews.kz ەلەكتروندى ادرەسى بويىنشا قابىلدانادى.
ساۋالدارىڭىزدى قازىردەن باستاپ قويا بەرىڭىزدەر.
باسقارۋشى ورتالىقتىڭ العاشقى ساپارى
باقبەرگەن امالبەك.
ەلباسى نۇرسۇلتان نازارباەۆتىڭ قازاقستان حالقىنا ارناعان بيىلعى جولداۋىندا العا قويىلعان مىندەتتەردى جۇزەگە اسىرۋ ماقساتىندا رەسپۋبليكالىق باسقارۋشى ورتالىق قۇرىلعانى بەلگىلى. پرەمەر-مينيستردىڭ ءبىرىنشى ورىنباسارى ءو.ءشوكەەۆ جەتەكشىلىك ەتەتىن بۇل قۇرىلىم ەلىمىزدىڭ يندۋستريالىق-يننوۆاتسيالىق جەدەل دامۋ باعدارلاماسىن ۇيلەستىرەتىن بولادى.
كەشە ءبىرىنشى ۆيتسە-پرەمەر ومىرزاق شوكەەۆ باستاعان جەدەل توپ اتالعان باعدارلامالاردىڭ ورىندالۋ بارىسىمەن تانىسۋ ماقساتىندا اقمولا وبلىسىندا بولدى. استانالىق ءوڭىردىڭ ينۆەستيتسيالىق تارتىمدىلىعى ايرىقشا ەكەندىگى تالاس تۋدىرمايدى. ماسەلە – مۇمكىندىكتى ءتيىمدى پايدالانا بىلۋدە. قۇرامىنا ۇكىمەت مۇشەلەرىن, دامۋ ينستيتۋتتارىنىڭ وكىلدەرىن بىرىكتىرەتىن باسقارۋشى ورگاننىڭ جۇمىس ساپارى اتالعان وڭىردەن باستالۋى كەزدەيسوقتىق ەمەس. مۇندا اگروكەشەن جانە ونەركاسىپتىك سالادا, زامانالىق قايتا وڭدەۋ يندۋسترياسى مەن تۋريستىك كلاستەردى قالىپتاستىرۋدا ەكونوميكالىق ورلەۋ ورتالىقتارى بوي كورسەتە باستادى.
ەلباسى جولداۋىندا زامان تالابىنداعى قارىمدى قادامداردى قۋاتتاندىرا ءتۇسۋ تاپسىرماسى قويىلدى. وبلىس اكىمى البەرت راۋدىڭ بايانداۋىنشا, بيىل اقمولالىقتار 1 شىلدەگە دەيىن 76 ميلليارد تەڭگەنىڭ بەس ينۆەستيتسيالىق جوباسىن, ال جىلدىڭ ەكىنشى جارتىسىندا 5 ميلليارد تەڭگەنى قۇرايتىن ءۇش جوبانى جۇزەگە اسىراتىن بولادى. جەدەل توپ جەتەكشىسى ءو.شوكەەۆ, وسى ورايدا, “وركەن”, “باۋمانسكايا-07”, “وستروگورسكي”, “ايس فۋد استانا”, “استانا اگروپرودۋكت” جشس باسشىلارىنىڭ جەكە ەسەپتەرىن تىڭدادى.
دەلەگاتسيا مۇشەلەرى قازاقستان رەسپۋبليكاسىن يندۋستريالاندىرۋ كارتاسىنا ەنگەن “ستەپنوگور پودششيپنيك زاۋىتى” اكتسيونەرلىك قوعامىندا, “قازاتومونەركاسىپ” بىرلەسكەن كاسىپورنىندا, “جىلىجاي تەحنولوگياسى” جاۋاپكەرشىلىگى شەكتەۋلى سەرىكتەستىگىندە, ەڭبەكشىلدەر اۋدانىنداعى “قازگەر-قۇس” اق, سونداي-اق قۇرىلىسى ءجۇرىپ جاتقان “كوكشە-تسەمەنت” كاسىپورنىندا بولدى.
ۇكىمەت باسشىسىنىڭ ءبىرىنشى ورىنباسارى ءو.شوكەەۆ وبلىس اكىمدىگىندە تۇرعىن ءۇي-كوممۋنالدىق شارۋاشىلىقتى نىعايتۋ, تاۋارلار مەن قىزمەتتەردى ۇسىنۋداعى قازاقستاندىق ۇلەستى ۇلعايتۋ سياقتى ماڭىزدى ماسەلەلەردى قاراستىرعان ءماجىلىس وتكىزدى. مۇندا ەلدىڭ يندۋستريالىق-يننوۆاتسيالىق دامۋىنىڭ بەس جىلدىق باعدارلاماسىن تابىستى ورىنداۋ جولىندا باسەكەلەستىككە قابىلەتتى جانە جوعارى تەحنولوگيالى بيزنەس-باستاماشىلدىققا ءورىس اشىلىپ, كومەك-قولداۋ كورسەتىلەتىنى اتاپ ءوتىلدى.
اقمولا وبلىسى.
كەلىسىمگە قول قويىلدى
جاقىندا توكيو قالاسىندا قازاقستاننىڭ جاپونياداعى ەلشىسى اقىلبەك كامالدينوۆ پەن جاپونيا سىرتقى ىستەر ءمينيسترى كاتسۋيا وكادا قازاقستان ۇكىمەتى مەن جاپونيا ۇكىمەتى اراسىنداعى اتوم ەنەرگياسىن بەيبىت ماقساتتا پايدالانۋ سالاسىنداعى ىنتىماقتاستىق تۋرالى كەلىسىمگە قول قويدى.
اتالمىش كەلىسىمگە قازاقستان پرەزيدەنتى ن.ءا.نازارباەۆتىڭ 2008 جىلى جاپونياعا جاساعان رەسمي ساپارى مەن 2006 جىلى جاپونيا پرەمەر-ءمينيسترى د.كويدزۋميدىڭ قازاقستانعا جاساعان ساپارى بارىسىنداعى جوعارى دەڭگەيدەگى ۋاعدالاستىقتار ناتيجەسىندە قول جەتكىزىلگەن بولاتىن.
كەلىسىم ەكى ەل اراسىنداعى اتوم ەنەرگياسى سالاسىنداعى ىنتىماقتاستىقتى دامىتۋعا باعىتتالعان نەگىزگى قۇجات بولىپ تابىلادى جانە قازاقستان مەن جاپونيا اراسىنداعى ستراتەگيالىق ارىپتەستىكتى ودان ءارى نىعايتۋعا قىزمەت ەتەتىن بولادى, دەپ حابارلادى قر ءسىم-ءىنىڭ ءباسپاسوز قىزمەتى.
دەنە تاربيەسىنە دەن قويماۋ – قاتەلىك
الەكساندر تاسبولاتوۆ.
باس پروكۋراتۋرانىڭ مالىمەتىنە قاراعاندا, ەلىمىزدىڭ مەكتەپتەرىندە وقۋشىلاردىڭ دەنە شىنىقتىرۋ تاربيەسىن الۋى تالاپقا ساي ەمەس. بۇل مىندەتتى ساپالى ورىنداۋ ءۇشىن دەنە شىنىقتىرۋ جانە سپورت سالاسىندا ءبىرىزدى مەملەكەتتىك ساياسات جۇزەگە اسىرىلۋى قاجەت. ويتكەنى, مەملەكەت باسشىسى ۇستىمىزدەگى جىلعى جولداۋىندا حالىق دەنساۋلىعى – ول قازاقستاننىڭ ءوزىنىڭ ستراتەگيالىق ماقساتتارىنا جەتۋدەگى تابىسىنىڭ اجىراماس قۇرامداس بولىگى دەپ اتاي كەلە, بۇقارالىق دەنە شىنىقتىرۋ-سپورتتىق قوزعالىسىن دامىتۋ ادام جاسىن ۇزارتۋدا وتە ماڭىزدى ماقسات ەكەندىگىن قاداپ ايتتى. الايدا, باس پروكۋراتۋرا تاراپىنان بالالاردىڭ مەكتەپ قابىرعاسىندا دەنە شىنىقتىرۋ تاربيەسىن الۋ قۇقىقتارىنىڭ ساقتالۋى جاعدايىنا تالداۋ جۇرگىزىلگەندە كوپتەگەن كەلەڭسىز جايتتەر انىقتالدى.
تالداۋ دەنە شىنىقتىرۋدى وتكىزۋدىڭ 3 ساعاتتىق اپتالىق مولشەرى بارلىق جەرلەردە ورىندالمايتىندىعىن, مۇمكىندىگى شەكتەلگەن بالالاردىڭ ارنايى مەديتسينالىق توپتاردا سپورتپەن شۇعىلدانۋعا قۇقىقتارى ساقتالمايتىندىعىن, سپورتتىق زالداردىڭ كوپشىلىگىنىڭ قويىلاتىن تالاپتارعا سايكەس كەلمەيتىندىگىن, ال كەيبىر مەكتەپتەردە ولاردىڭ مۇلدەم جوقتىعىن, سپورتتىق جابدىقتاردىڭ جەتىسپەۋشىلىگىن, سونداي-اق بىرقاتار مەكتەپتەردە كاسىبي پەداگوگيكالىق ءبىلىمى جوق ادامداردىڭ دەنە شىنىقتىرۋ ساباقتارىن وتكىزۋگە تارتىلاتىندىعىن كورسەتتى, دەيدى باس پروكۋراتۋرانىڭ رەسمي وكىلى نۇرداۋلەت سۇيىندىكوۆ.
ماسەلەن, جامبىل وبلىسىنىڭ تالاس اۋدانىندا 29 مەكتەپتىڭ 16-سىندا سپورت زالدار مۇلدەم جوق. بۇل ماسەلە تەك اۋىلدىق جەرلەردە عانا ەمەس, قىزىلوردا قالاسىنىڭ 4 مەكتەبىنىڭ سپورت زالدارى اپاتتى جاعدايدا تۇر, 6-ۋىندا سپورت زالدىڭ بولۋى ءتىپتى مەكتەپ قۇرىلىسىنىڭ جوباسىندا دا كوزدەلمەگەن. سول سياقتى ەلىمىزدىڭ كوپتەگەن مەكتەپتەرىندە باسسەيندەردىڭ جانە شاڭعى بازالارىنىڭ ءالى كۇنگە جوقتىعى جانعا باتادى. مۇنداي جاعدايدا ەلىمىزدىڭ بولاشاعى جاستاردىڭ دەنساۋلىعىن قايتىپ جاقسارتۋعا, شىنىقتىرۋعا بولادى؟ بۇعان ءتيىستى ورىندار نە دەيدى ەكەن؟
ءتىپتى, بىرقاتار مەكتەپتەردە قولدانىلاتىن سپورتتىق قۇرالدار ونداعان جىل بۇرىن الىنىپ, توزعان جانە ءارى قاراي پايدالانۋعا جاتپايدى. ماسەلەن, قاراعاندى وبلىسى قاراجال قالاسىنىڭ №6 مەكتەبىندە تەك دوپ پەن شاڭعى عانا بار, ولاردىڭ ءوزى ىستەن شىققان.
ال كامەلەتكە تولماعانداردى دەنە شىنىقتىرۋعا تاربيەلەۋدەگى كەڭ تاراعان كەمشىلىكتىڭ ءبىرى جۇيكە جانە دەنە ءوسىپ-جەتىلۋىندەگى ءارتۇرلى اۋىتقۋلارى بار بالالارمەن جۇمىستىڭ ءتيىستى دەڭگەيدە ۇيىمداستىرىلماۋى بولىپ تابىلادى. ولار تەك ساباقتان عانا بوساتىلادى, بىراق اعزاعا جاعىمدى اسەر ەتەتىن دەنە شىنىقتىرۋمەن اينالىسۋدىڭ ماڭىزدىلىعى ەسكەرىلمەيدى. ال زاڭناماعا ساي ولارعا ارنالعان ارنايى ەمدىك دەنە شىنىقتىرۋ توپتارى ۇيىمداستىرىلۋى ءتيىس ەدى. ول شارا قولعا الىنار ەمەس.
ساردارلاردىڭ كوكتەمگە شاشۋى
اراي ۇيرەنىشبەكقىزى.
8 ناۋرىز حالىقارالىق ايەلدەر كۇنىنە جانە 16 ناۋرىزدا بولاتىن رەسپۋبليكالىق ۇلاننىڭ قۇرىلعانىنا وراي ەلورداداعى 0112-اسكەري بولىمدە العاش رەت ساردارلار بي كەشى ۇيىمداستىرىلدى.
رەسپۋبليكالىق ۇلاندا جۇمىس ىستەيتىن نازىك جاندار مەن اسكەري قىزمەتكەرلەردىڭ زايىپتارىنا ارنالعان بۇل بي كەشىنە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى باقىتجان ءابدىرايىم باستاعان وقىتۋشىلار مەن ستۋدەنتتەر دە قاتىستى.
سالتاناتتى مەرەكەلىك كەش بارىسىندا رەسپۋبليكالىق ۇلان قولباسشىسى, گەنەرال-لەيتەنانت اباي تاسبولاتوۆ ءسوز سويلەپ, وفيتسەرلەردىڭ زايىپتارى مەن جينالعان قىز-كەلىنشەكتەردى كوكتەمنىڭ العاشقى مەرەكەسى بولىپ تابىلاتىن 8 ناۋرىز – ايەلدەر مەرەكەسى كۇنىمەن قۇتتىقتادى.
بي كەشىنە قاتىسقان وقىتۋشىلار مەن ستۋدەنتتەر, سونىمەن قاتار 0112-اسكەري ءبولىمنىڭ تۇرمىس-تىرشىلىگىمەن تانىسىپ قايتتى.
ايەلدەر قاۋىمىنا ارنالعان بۇل كەش ولارعا كوتەرىڭكى كوڭىل-كۇي سىيلاعانىن وسى شاراعا قاتىسۋشى قىز-كەلىنشەكتەردىڭ جۇزىندەگى كوكتەمنىڭ شۋاعىنداي شاتتىق كۇلكىلەرىنەن بايقالادى.
قوعامدا اسكەري قىزمەتتىڭ بەدەلىن ارتتىرۋ ماقساتىندا بولاشاقتا وسىنداي مادەني كەشتەر ءوز جالعاسىن تاپپاق.
وبلىسقا ەلشىلەر كەلدى
فاريدا بىقاي.
قۇرامىندا نوربەر جۋستەن, رەنەە جۋستەن-يانسسەن جانە ەلىمىزدەگى يسپانيا كورولدىگىنىڭ ەلشىسى البەرتو انتون كورتەس, پولشا رەسپۋبليكاسىنىڭ ەلشىسى پاۆەل چەپلاك بار ەۋرووداقتىڭ قازاقستانداعى وكىلدىگىنىڭ دەلەگاتسياسى وبلىس ورتالىعىندا بولىپ, بىرقاتار كەزدەسۋلەر وتكىزدى.
وبلىسقا كەلۋدەگى نەگىزگى ماقساتتارى – ەقىۇ سەكىلدى بەدەلدى ۇيىمعا بيىلعى جىلى توراعالىق ەتىپ وتىرعان ەلىمىزدىڭ وزگە ەلدەرمەن حالىقارالىق قاتىناستارداعى ءوزارا ارىپتەستىك جانە ىنتىماقتاستىعى وسى جەردە قىزمەت اتقارىپ جۇرگەن ەلشىلىكتەر ارقىلى دا دامىپ, بەرىك نەگىز قالايتىندارىن جەتكىزۋ بولدى. ءبىزدىڭ ەلىمىزدىڭ ازاماتتىق قوعامدى دامىتۋ, ۇكىمەتتىك ەمەس ۇيىمداردى قولداۋ باعىتىنداعى جۇمىستارى مەن كوپتەگەن ەتنوس وكىلدەرىنىڭ تاتۋلىقتا ءومىر ءسۇرىپ جاتقان تىرلىكتەرىنە باسقا ەلدەر قىزىعۋشىلىق تانىتۋدا. مىسالى, بۇل كۇندەرى ەلشىلەر ساپارلاپ كەلگەن ءبىزدىڭ وبلىستا 400-دەن استام ۇكىمەتتىك ەمەس ۇيىم, 131 بۇقارالىق اقپارات قۇرالى, 10 ساياسي پارتيا وكىلدىكتەرى, 18 ءدىني كونفەسسيالىق بىرلەستىك بار. ءوندىرىستى وبلىس بولعاندىقتان, ماشينە جاساۋ سالاسى بويىنشا گەرمانيا, يتاليا, پولشا, فرانتسيا سياقتى ەلدەرمەن ەكونوميكالىق ارىپتەستىك بەرىك ورنىعىپ كەلەدى.
مارتەبەلى قوناقتار وبلىس ورتالىعىنداعى جوعارى وقۋ ورىندارىنداعى, “دەسەنتا” قوعامدىق بىرلەستىگىندەگى كەزدەسۋلەرگە قاتىسىپ, “رۋبيكوم” ساۋدا ءۇيىن ارالاپ كوردى.
پاۆلودار وبلىسى.