سىرداريا وزەنىنىڭ جاعاسىنا قونىس تەپكەن سىربويىلىقتار كوكتەم كەلىسىمەن ابىگەرگە تۇسەتىن. ويتكەنى, اساۋ مىنەزدى داريانىڭ سۋ تاسقىنى قايسىبىر جىلدارى شابىندىق پەن جايىلىمدىق, ەگىستىك جەرلەردى عانا ەمەس, ەلدى مەكەندەردى دە سۋ تاسقىنىنىڭ استىنا الاتىن.وسى ءبىر توتەنشە جاعداي سالدارىنان سۋ شايىپ كەتكەن ەگىس كولەمى قىسقارىپ, شابىندىق, جايىلىمدىق جەرلەر دە جۇتاڭداپ, كادەگە جاراماي قالۋشى ەدى. وسىعان بايلانىستى سۋ قاۋپىن سەيىلتۋ ماقساتىندا سىربويىلىقتار كۇن-ءتۇن دامىل تاپپاي داريا سۋىن باستى باقىلاۋلارىنا الىپ وتىراتىن.
سۋ تاسقىنىنىڭ اعىمداعى جىلعى احۋالىن ءبىلۋ ماقساتىندا سۋ شارۋاشىلىعى ماماندارىمەن تىلدەسكەن ەدىك. ولاردىڭ پايىمداۋىنشا, بيىلعى جىلى شاردارا سۋ قويماسىنا سەكونتىنە 1200 تەكشە مەتر, كوكساراي سۋ تورابىنا 300 تەكشە مەتر سۋ كەلۋدە ەكەن. ال, قىزىلوردا وبلىسى شەكاراسىنا سەكونتىنە 825 تەكشە مەتر سۋ كەلىپ جاتسا, وسىنىڭ 475 تەكشە مەترى قىزىلوردا سۋ تورابىنان وتۋدە.
كۇنى كەشە قىزىلوردا قالاسىنا سىرداريا وزەنى اعىسىمەن سەكونتىنە 485 تەكشە مەتر سۋ اعىسى كەلىپ, ونىڭ 10 تەكشە مەترى جاڭاداريا كانالىنا جىبەرىلىپ, 475 تەكشە مەترى داريانىڭ تومەنىنە قاراي جونەلتىلگەن. ءسويتىپ, قالا تۇرعىندارى سۋ تاسقىنى قاۋپىنەن ارىلىپ, ەندى سىرداريا وزەنىنىڭ تومەنگى جاقتارىنا قونىس تەپكەن ەلدى مەكەن تۇرعىندارى سۋ تاسقىنىنىڭ الدىن الۋ شارالارىن كۇن-ءتۇن كوز ىلمەي ساقاداي-ساي ازىرلىكپەن باقىلاۋدا ۇستاۋدا.
ەلباسىنىڭ تىكەلەي نۇسقاۋىمەن كوكساراي سۋ قويماسىنىڭ سالىنۋى سىربويىلىقتاردى جىل سايىنعى سۋ قاۋپىنەن ءبىرجولاتا ارىلتىپ قانا قويماي, قۋانىش قۇشاعىنا كەنەلتىپ, ەلباسىنا دەگەن اق العىستار ايتىلۋدا.
قىزىلوردا
ەركىن ءابىل.