تالاپكەرلەر ۇزدىك جوو مەن كوللەدجدى سايتتان تاڭداي الادى

جوعارى سىنىپ وقۋشىلارى, اتا-انالار, ستۋدەنتتەر وقۋ ورىندارىنىڭ ەڭبەك نارىعىندا تۇلەكتەردىڭ قاجەتتىلىگى, جۇمىسقا ورنالاسۋ جانە جالاقى دەڭگەيى تۇرعىسىنان تابىستىلىعى تۋرالى اقپاراتقا تەگىن قول جەتكىزە الادى. ەلەكتروندىق ەڭبەك بيرجاسىنىڭ سايتىندا ءاربىر پايدالانۋشى قازاقستان, بەلگىلى ءبىر ايماق, جەكە ماماندىق نەمەسە ناقتى باعىت بويىنشا جوعارى وقۋ ورنىنا نەمەسە كوللەدجگە ەڭ ءتيىمدى تاڭداۋ مۇمكىندىگىنە يە.

رەيتينگ 2018 جىلدىڭ جەلتوقسانىندا ەڭبەك جانە حالىقتى الەۋمەتتىك قورعاۋ مينيسترلىگىنىڭ تاپسىرىسى بويىنشا جاسالدى. ۇزدىك جانە ناشار وقۋ ورىندارىن تاڭداۋ ساۋالنامالار نەگىزىندە ەمەس, تۇلەكتەردىڭ جۇمىسقا ورنالاسۋىنىڭ ناقتى ناتيجەلەرى, ولاردىڭ جالاقى دەڭگەيى, جۇمىستىڭ تۇراقتىلىعى بويىنشا جاسالدى. بۇل رەيتينگتى وبەكتيۆتى جانە تاۋەلسىز ەتەدى. سالىستىرعاندا 101 جوو تۇلەكتەرىنىڭ 200 مىڭعا جۋىق جانە ەلىمىزدىڭ 766 كوللەدجدەرىنىڭ 300 مىڭنان استام تۇلەگى پايدالانىلدى.

ۇزدىك وقۋ ورنىن تاڭداۋ ءۇشىن ارنايى سەرۆيس https://www.enbek.kz/ru/ratings/2018 كىرۋ كەرەك.

«بۇل رەيتينگتە كەز كەلگەن ادام جۇمىس بەرۋشىلەردىڭ قانداي ماماندىقتارعا دەگەن سۇرانىسىن, قانداي ايماقتاردىڭ جوعارى وقۋ ورىندارى جاقسى نەمەسە ناشار ەكەنىن كورە الادى. سايت ارحيتەكتۋراسى ءارتۇرلى سالىستىرۋ جاساۋعا مۇمكىندىك بەرەدى. مىسالى, تالاپكەر «اقپاراتتىق جۇيەلەر» ماماندىعى بويىنشا جوعارى ءبىلىم العىسى كەلەدى. رەيتينگ ارقىلى ول قازاقستاننىڭ قاي جوعارى وقۋ ورنىندا تۇلەكتەردىڭ جۇمىسقا ورنالاسۋىنىڭ ەڭ جوعارى پايىزىن, قاي وڭىردە وسىنداي ماماندار ەڭ جوعارى جالاقى الاتىنىن كورە الادى», - دەپ ءتۇسىندىردى «مدم» اق ۆيتسە-پرەزيدەنتى تاحير اسلياليەۆ.

رەيتينگ تالاپكەرلەر ءۇشىن دە, باسقا جوو اۋىسقىسى كەلەتىن ستۋدەنتتەر ءۇشىن دە پايدالى بولادى. سونداي-اق, ول جۇمىس بەرۋشىلەرگە لايىقتى تۇلەكتەردى جۇمىسقا قابىلداۋ ءۇشىن جانە ءبىلىم بەرۋ جانە ەڭبەك نارىعى سالاسىنداعى زەرتتەۋلەر ءۇشىن تالداۋشىلارعا پايدالى.