مادەنيەت جانە اقپارات مينيسترلىگىندە جەنەۆا قالاسىندا ءناسىلدىك كەمسىتۋشىلىكتىڭ بارلىق ءتۇرىن جويۋ تۋرالى حالىقارالىق تۇجىرىمدامانى جۇزەگە اسىرۋ باعىتىندا قازاقستان دايىنداعان 4 جانە 5 بىرلەسكەن ەسەپ بەرۋ بايانداماسىن قورعاۋ قورىتىندىسىنا ارنالعان ءباسپاسوز ءماسليحاتى ۇيىمداستىرىلدى. جەنەۆاداعى اتالعان شاراعا قازاقستان حالقى اسسامبلەياسىنىڭ, ادام قۇقىقتارى تۋرالى ۇلتتىق ورتالىقتىڭ, سىرتقى ىستەر, مادەنيەت جانە اقپارات, ءبىلىم جانە عىلىم, ەڭبەك جانە حالىقتى الەۋمەتتىك قورعاۋ, ىشكى ىستەر, دەنساۋلىق ساقتاۋ جانە ادىلەت مينيسترلىكتەرىنىڭ وكىلدەرى مەن ەلىمىزدىڭ باس پروكۋراتۋراسى جانە جوعارعى سوت قىزمەتكەرلەرىنەن تۇراتىن دەلەگاتسيا قاتىسىپ قايتىپتى.
جۋرناليستەرگە ارنالعان باسپاسوز ءماسليحاتىندا وسى دەلەگاتسيانىڭ جەتەكشىسى, مادەنيەت جانە اقپارات ۆيتسە-ءمينيسترى عازيز تەلەباەۆ جەنەۆادا وتكەن بۇۇ-نىڭ كەمسىتۋشىلىككە قارسى كوميتەتىندە ۇيىمداستىرىلعان جيىنداعى ەسەپ-باياندامانىڭ قورعالۋ بارىسى, سونداي-اق مەملەكەتتىك ورگانداردىڭ كونۆەنتسياداعى ەرەجەلەردى جۇزەگە اسىرۋ باعىتىندا اتقارىپ جاتقان جۇمىستارى جونىندە كەڭىنەن مالىمەت بەردى.
بۇۇ ناسىلدىك كەمسىتۋشىلىكتىڭ بارلىق نىساندارىن جويۋ تۋرالى كوميتەت ساراپشىلارى ەلىمىزدىڭ ەتنوسارالىق قاتىناستار سالاسىنداعى مەملەكەتتىك ساياساتىنا, قازاقستان حالقى اسسامبلەياسىنىڭ جۇمىس تاجىريبەسى مەن ونىڭ بارلىق ەتنوستىق توپتاردىڭ قۇقىقتارىن قامتاماسىز ەتۋدەگى رولىنە, ەلدە تۇراتىن بارلىق ازاماتتاردىڭ ازاماتتىق, ساياسي, الەۋمەتتىك, ەكونوميكالىق جانە مادەني قۇقىقتارىن قامتاماسىز ەتۋگە باعىتتالعان ءىس-شارالارعا جوعارى باعا بەرگەن.
“بىزگە بەرىلگەن ەڭ باستى باعا – ەتنوسارالىق قاتىناستاردى رەتتەپ, جاقسى جولعا قويۋدا نەمەسە ادامداردى ناسىلىنە, ۇلتىنا قاراماي قورعاۋدا ەلىمىزدىڭ دۇرىس ساياسات ۇستانىپ وتىرعاندىعى”, دەدى ع. تەلەباەۆ. ۆيتسە-مينيستر سونداي-اق كوميتەت مۇشەلەرىمەن كەزدەسۋ كەزىندە “نەگە كوپتەگەن ەلدەردە ءناسىلدىك كەمسىتۋشىلىككە قاتىستى جەكە زاڭ جوق؟” دەگەن ساۋالدىڭ تۋىنداعانىن اتاپ ءوتتى. “بىزدە كونستيتۋتسيادان باستاپ ءتۇرلى زاڭداردا ءناسىلدىك كەمسىتۋشىلىككە قاتاڭ تىيىم سالىنعان. مۇنداي جاعداي ورىن العان كۇندە دە ءتيىستى جاۋاپكەرشىلىككە, ونىڭ ىشىندە قىلمىستىق جاۋاپكەرشىلىككە تارتۋ كوزدەلەتىندىگى بەلگىلى. مىنە, وسىلاردىڭ بارلىعى جان-جاقتى ءتۇسىندىرىلدى”, دەدى ۆيتسە-مينيستر.
دەرەك كوزى: ءلايلا ەدىلقىزى.