بۇگىن ماجىلىستە پالاتا سپيكەرى ن. نىعماتۋليننىڭ توراعالىعىمەن جالپى وتىرىس ءوتىپ, دەپۋتاتتار بىرقاتار جاڭا زاڭ جوباسىن جۇمىسقا الدى.
ماجىلىسكە كەلىپ تۇسكەن زاڭ جوبالارىنىڭ ىشىندە مىندەتتى الەۋمەتتىك ساقتاندىرۋ تۋرالى زاڭ جوباسى جانە وعان ىلەسپە زاڭ جوباسى بار. قۇجات مىندەتتى الەۋمەتتىك ساقتاندىرۋدىڭ قۇقىقتىق, ەكونوميكالىق جانە ۇيىمداستىرۋشىلىق نەگىزدەرىن نىعايتۋعا باعىتتالعان. اتاپ ايتقاندا, مىندەتتى الەۋمەتتىك ساقتاندىرۋ جۇيەسىنە قاتىسۋ ءوتىلى مەن مىندەتتى الەۋمەتتىك ساقتاندىرۋ قورىنان تولەنەتىن الەۋمەتتىك تولەمدەردىڭ مولشەرى اراسىنداعى ءوزارا بايلانىستى كۇشەيتۋ.
سونداي-اق, جالپى وتىرىستا ءماجىلىس دەپۋتاتتارى «قازاقستان رەسپۋبليكاسى مەن ۆەتنام سوتسياليستىك رەسپۋبليكاسى اراسىنداعى قىلمىستىق ىستەر بويىنشا ءوزارا قۇقىقتىق كومەك تۋرالى شارتتى راتيفيكاتسيالاۋ تۋرالى» زاڭ جوباسىن ماقۇلدادى. شارتتى راتيفيكاتسيالاۋ قىلمىسپەن كۇرەستە ەكى ەل اراسىنداعى ىنتىماقتاستىقتىڭ تيىمدىلىگىن ارتتىرۋعا باعىتتالعان.
جالپى وتىرىستا قازاقستان رەسپۋبليكاسى پرەزيدەنتىنىڭ جارلىعىمەن ءماجىلىس دەپۋتاتى ساپارحان وماروۆتىڭ اۋىل شارۋاشىلىعى ءمينيسترى بولىپ تاعايىندالۋىنا بايلانىستى وكىلەتتىگى مەرزىمىنەن بۇرىن توقتاتىلدى. سونىمەن قاتار, بۇگىن پالاتا ءماجىلىستىڭ اگرارلىق ماسەلەلەر كوميتەتىنىڭ توراعالىعىنا بەرىك وسپانوۆتى سايلادى.