مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىكتىڭ الماتى وبلىسى بويىنشا دەپارتامەنتى ايماقتاعى مەكتەپ ديرەكتورلارىنىڭ جۇمىس كابينەتتەرىنە مونيتورينگ جۇرگىزدى. ناتيجەسىندە كەيبىر مەكتەپ باسشىلارىنىڭ كابينەتتەرىنىڭ اۋماعى اتشاپتىرىم ەكەندىگى انىقتالدى. ياعني, بۇل بولمەلەر ءبىلىم مەكەمەسىندە ءتيىمسىز پايدالانىلاتىن الاڭ قاتارىنا جاتقىزىلدى.
- بۇگىندە مەملەكەتتىك قىزمەتشىلەر مەن ۆەدومستۆولىق باعىنىستى ۇيىمدار باسشىلارىنىڭ الدىندا ءوز جۇمىس ءستيلىن قايتا قاراستىرىپ, مەملەكەت پەن قوعام اراسىنداعى الشاقتىقتى جويۋ مىندەتى تۇر. وسىعان وراي, وبلىستاعى ءبىلىم مەكەمەلەرىنە ارنايى مونيتورينگ جاسادىق. ناتيجەسىندە 740 مەكتەپ ديەكتورلارى كابينەتىن زەردەلەدى. جالپى وبلىس بويىنشا اۋدان, قالالارداعى مەكتەپ ديرەكتورلارىنىڭ كابينەتتەرىنەن جالپى كولەمى 1500 شارشى مەتر نورمادان اسىپ تۇر. ارتىق كولەمدى 174 مەكتەپ ديرەكتورىنىڭ كابينەتى كەزدەستى, - دەدى مەملەكەتتىك قىزمەتتەر باسقارماسىنىڭ باسشىسى جەڭىس اندابەكوۆ.
ال مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىكتىڭ الماتى وبلىسى بويىنشا دەپارتامەنتى ءوز تاراپىنان جوعارىداعى مەكتەپ باسشىلارىنا رەگلامەنتكە سايكەس جۇمىس كابينەتىنە ورنالاسۋدى جانە سونىمەن قاتار, باسشىنىڭ ازاماتتارعا قول جەتىمدىلىگىن ارتتىرۋدى جانە مەكتەپتەگى قاربالاس كەزىندە جاعدايدى باقىلاۋعا مۇمكىندىك بەرەتىندىگىن ەسكەرىپ, مەكتەپ ديرەكتورلارىنا مەكتەپتىڭ ءبىرىنشى قاباتتارىندا ورنالاسۋدى ۇسىنۋدا.
قالماحانبەت مۇقامەتقالي,
«Egemen Qazaqstan»
الماتى وبلىسى