«التىن بەلگى» يەگەرلەرىن پەداگوگيكالىق جوعارعى وقۋ ورىندارىنا ەمتيحانسىز قابىلداۋ ۇسىنىلىپ وتىر. بۇل تۋرالى قازاقستان رەسپۋبليكاسى ءبىلىم جانە عىلىم قىزمەتكەرلەرى كاسىپوداعى توراعاسىنىڭ ورىنباسارى ايگۇل مۇقاشەۆا استانادا «پەداگوگتار مارتەبەسى تۋرالى» زاڭ جوباسىن تالقىلاۋ جيىنىندا ايتىپ بەردى. بۇل تۋرالى قازاقپارات حابارلادى.
«وزدەرىڭىز بىلەتىندەي, زاڭنىڭ ەكى جوباسى اشىق پورتالداردا جاريالانعان بولاتىن. ءبىرىنشى جوبادا ءبىزدىڭ پەداگوگتارعا ارنالعان ايتارلىقتاي جاقسى الەۋمەتتىك پاكەت قاراستىرىلعان. مەملەكەتتىك ورگاندارمەن كەلىسىلگەن ەكىنشى جوبادا ءبىزدىڭ مۇعالىمدەرگە قاراستىرىلعان كوپتەگەن الەۋمەتتىك كەپىلدىكتەر - ماقۇلدانباي, زاڭ جوباسىنان الىنىپ قالدى» دەدى ايگۇل مۇقاشەۆا.
ونىڭ ايتۋىنشا, تالقىلاۋ بارىسىندا مۇعالىمدەر تاراپىنان بىرقاتار ۇسىنىستار تۇسكەن. اتاپ ايتقاندا, مەكتەپ ۇستازدارى قىزمەت ەتكەن بەلگىلى ءبىر ۋاقىتتان كەيىن زەينەتكە شىعۋ, دەنساۋلىقتى جاقسارتۋعا, ەمدەلۋگە ارنالعان جاردەماقىلاردى ەكى لاۋازىمدىق ايلىققا دەيىن ارتتىرۋ, تۇرعىن ءۇي باعدارلامالارىنا قاتىسۋ كەزىندەگى جەڭىلدىكتەر, عىلىمي اتاق ءۇشىن قوسىلاتىن اقى جانە تاعى سول سەكىلدى كەپىلدىكتەر ەنگىزۋ تۋرالى ۇسىنىستار تۇسكەن.
«مۇعالىم ماماندىعىنا جاستاردى كوپتەپ تارتۋ ءۇشىن پەداگوگيكالىق جوعارعى وقۋ ورىندارىنا «التىن بەلگىمەن» بىتىرگەن مەكتەپ وقۋشىلارىن باستاپقى ەمتيحانسىز وقۋعا قابىلداي الاتىنداي جەڭىلدىك جاساۋ كەرەك. سونىمەن بىرگە, ءبىز پەداگوگيكالىق ماماندىقتارعا وقىپ جاتقان ستۋدەنتتەرگە كۇنكورىس مينيمۋمى مولشەرىندە شاكىرتاقى بەكىتۋدى ۇسىنعان ەدىك. الايدا وكىنىشكە قاراي, سوڭعى زاڭ جوباسىندا بۇل نورمالار الىنىپ تاستالدى. بىزگە پەداگوگتاردان وتە كوپ قوڭىراۋلار مەن حاتتار ءتۇسىپ جاتىر. مىنە, وسى ۇسىنىستاردى تالقىلاۋ ءۇشىن بۇگىن دوڭگەلەك ۇستەلگە جينالىپ وتىرمىز» دەدى ايگۇل مۇقاشەۆا.
ايتا كەتسەك, قازاقستاندىق ءبىلىم جانە عىلىم قىزمەتكەرلەرى كاسىپوداعىنىڭ ۇيىمداستىرۋىمەن استانادا ءوتىپ جاتقان دوڭگەلەك ۇستەل جۇمىسىنا بعم وكىلدەرى, پارلامەنت دەپۋتاتتارى, جوو رەكتورلارى, عالىمدار مەن مۇعالىمدەر قاتىسۋدا.