استاناداعى «Qazaqstan» ورتالىق كونتسەرت زالىندا مادەنيەت جانە سپورت مينيسترلىگى پارلامەنت دەپۋتاتتارى, قوعام قايراتكەرلەرى, مادەنيەت, سپورت جانە تۋريزم سالاسى وكىلدەرىنىڭ قاتىسۋىمەن كەڭەيتىلگەن القا وتىرىسىن وتكىزدى.
كۇن تارتىبىندەگى باستى تاقىرىپ ەلباسى جولداۋىنداعى تاپسىرمالار شەڭبەرىندەگى باسىم باعىتتاردى جۇزەگە اسىرۋ نەگىزىندە ءوربىدى. مينيسترلىك جينالىسىندا, سونداي-اق وتكەن جىلدىڭ جۇمىس قورتىندىلارى مەن سالانىڭ 2019 جىلداعى دامۋ كەلەشەگى قاراستىرىلدى.
القالى جيىننىڭ شىمىلدىعىن مادەنيەت جانە سپورت ءمينيسترى ارىستانبەك مۇحامەدي ۇلى اشىپ, 2018 جىلى رۋحانيات, تۋريزم جانە سپورت كەڭىستىگىندە اتقارىلعان اۋقىمدى شارالارعا جان-جاقتى توقتالدى. مينيستر ءوز سوزىندە, اسىرەسە, ونەر مەن سپورت سالاسىندا جەتىستىككە جەتىپ, قازاقستان اتىن الەمگە تانىتىپ جۇرگەن جاستاردىڭ جۇلدىزدى جەڭىسىنە توقتالىپ, الداعى ۋاقىتتا دا تالانتتى ونەرپازدارعا جۇيەلى تۇردە قامقورلىق كورسەتىلەتىنىن جەتكىزدى. بۇدان بولەك, ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا اتقارىلعان شارالاردى دا كەڭىنەن باياندادى.
تەاتر مەن كينو, مۋزىكا مەن سپورت سالاسىندا جەتكەن جەتىستىكتەر اۋىز تولتىرىپ ايتارلىق. ماسەلەن, عالامات داۋسىمەن الەم نازارىن وزىنە اۋدارعان ديماش قۇدايبەرگەن, كينو مەن تەاتر كەڭىستىگىندە بيىك بەلەستەردى باعىندىرىپ جۇرگەن اكتريسا سامال ەسلياموۆا, رەجيسسەر ءامىر بايعازين, ديريجەر الان بورىباەۆ, وپەرا مەن بالەت ونەرىنىڭ ۇزدىك سوليستەرى – سۇندەت بايعوجين, مەدەت شوتاباەۆ, سالتانات احمەتوۆا, باحتيار ادامجانوۆ سىندى ونەرپازداردىڭ ەڭبەگىنە ەرەكشە ءمان بەرىلدى.
– مەملەكەتىمىز, ونىڭ ىشىندە مادەنيەت جانە سپورت مينيسترلىگى ەلباسىنىڭ تىكەلەي قولداۋىمەن جاس تالانتتارىمىزدىڭ ءوسىپ, بيىككە قانات قاعۋىنا بارىنشا جاعداي جاساپ, كەڭ مۇمكىندىك اشىپ وتىر. سول سەكىلدى جاس كورەرمەندەرىمىزدىڭ تالعامىنىڭ قالىپتاسۋىنا دا رۋحانيات الەمى جان-جاقتى ءارى تىڭعىلىقتى ەڭبەك ەتىپ كەلەدى. بۇل, اسىرەسە, كينو مەن تەاتر سالاسىندا ايقىن كورىنىس تاۋىپ وتىر. ماسەلەن, مەملەكەت باسشىسى نۇرسۇلتان نازارباەۆتىڭ « ۇلى دالانىڭ جەتى قىرى» ماقالاسىندا ءسوز بولعان تاريحي تۇلعالارىمىزدىڭ كوركەم بەينەسىن ەكرانعا شىعارۋدا «قازاقفيلم» كينوستۋدياسى جەمىستى جۇمىستار اتقارۋدا. اتاپ ايتساق, ولاردىڭ قاتارىنا جاقىندا جارىققا شىعۋى جوسپارلانعان اقان ساتاەۆتىڭ «توميريس», رۇستەم ءابدىراشتىڭ «التىن تاق» سىندى تاريحي فيلمدەرىمەن قاتار, «التىن ادام» باستاعان بىرنەشە انيماتسيالىق تۋىندىلاردى دا قوسىپ قويۋعا بولادى. وسىنداي تۋىندىلار ەلىمىزدىڭ ەرتەڭى ءۇشىن قىزمەت ەتەدى, وسكەلەڭ ۇرپاقتى ۇلتجاندىلىق رۋحقا تاربيەلەيدى دەپ سەنەمىز. بۇعان جاقىندا عانا قابىلدانعان «كينەماتوگرافيا تۋرالى» زاڭىمىز دا تولىق مۇمكىندىك بەرەدى دەپ سەنىممەن ايتا الامىن, – دەدى ارىستانبەك مۇحامەدي ۇلى ءوز بايانداماسىندا.
سونداي-اق مينيستر 2018 جىلى كادرلىق وزگەرىستەر نەگىزىندە مادەنيەت جانە سپورت مينيسترلىگى مەن ەلىمىزدىڭ بەلدى ونەر وشاقتارىنىڭ باسشىلىعىنا كەلگەن جاڭا قىزمەتكەرلەرمەن تانىستىرىپ ءوتتى. ولاردىڭ قاتارىندا ۇلتتىق وليمپيادا كوميتەتىنىڭ باس حاتشىسى ساكەن مۇسايبەكوۆ, ۆيتسە-مينيستر ەلدوس رامازانوۆ, سپورت جانە دەنە شىنىقتىرۋ ىستەرى كوميتەتىنىڭ توراعاسى سەرىك ساپيەۆ, قۇرمانعازى اتىنداعى قازاق ۇلتتىق كونسەرۆاتورياسىنىڭ رەكتورى ارمان جۇدەباەۆ, ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى اسحات ماەميروۆ, م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى ءسابيت ابدىحالىقوۆ, ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ ديرەكتورى ازامات ساتىبالدى جانە تاعى دا باسقا ماماندار بار.
القالى جيىندى ودان ءارى «قاستەرلى قازاقستان» عىلىمي-زەرتتەۋ ورتالىعىنىڭ جەتەكشىسى بەرىك ابدىعالي, قازاقستان جازۋشىلار وداعىنىڭ توراعاسى, اقىن ۇلىقبەك ەسداۋلەت, قازاقستان كينەماتوگرافيستەر وداعىنىڭ توراعاسى, كينورەجيسسەر ەرمەك تۇرسىنوۆ, سپورت جانە دەنە شىنىقتىرۋ ىستەرى كوميتەتىنىڭ توراعاسى سەرىك ساپيەۆ ءوز سالاسى بويىنشا باياندامالارىمەن جالعادى. «رۋحاني جاڭعىرۋ», « ۇلى دالانىڭ جەتى قىرى» باعدارلامالارى مەن جالپى جاستار جىلى اياسىندا ادەبيەت, مادەنيەت, ونەر جانە سپورت سالاسىنداعى ۇستىمىزدەگى جىلى اتقارىلۋى ءتيىس اۋقىمدى جوبالار دا جيىندا جان-جاقتى ءسوز ەتىلدى.
نازەركە جۇماباي,
«Egemen Qazaqstan»