ەلىمىز ينتەرنەت تاراتۋدىڭ جاڭا ساپاسىنا قول جەتكىزبەك. بۇل تۋرالى اقپارات جانە كوممۋنيكاتسيالار ءمينيسترى داۋرەن اباەۆ مينيسترلىكتىڭ كەڭەيتىلگەن القا وتىرىسىندا ايتتى. اتالعان ۆەدومستۆونىڭ بىلتىرعى جۇمىسىن قورىتىندىلاپ, بيىلعى مىندەتتەرىن ايقىنداعان جيىنعا پرەزيدەنت اكىمشىلىگىنىڭ وكىلدەرى, پارلامەنت دەپۋتاتتارى, اقپارات جانە بايلانىس سالاسىنىڭ قىزمەتكەرلەرى قاتىستى.
اقپارات جانە كوممۋنيكاتسيالار ءمينيسترى داۋرەن اباەۆ وتكەن جىلى اتقارىلعان ماڭىزدى ىستەرگە توقتالدى. سونىڭ العاشقىسى رەتىندە «تسيفرلى قازاقستان» مەملەكەتتىك باعدارلاماسى اياسىندا ەلىمىزدەگى 4 ايماقتىڭ تولىق تسيفرلى حابار تاراتۋعا كوشكەنىن ايتتى. «بىلتىر ەلىمىزدە انالوگتىق تەلە-راديو حابار تاراتۋدى كەزەڭ-كەزەڭىمەن توقتاتۋ جۇمىستارى باستالعان ەدى. بۇگىندە ماڭعىستاۋ, تۇركىستان, جامبىل وبلىستارى جانە شىمكەنت قالاسى تولىعىمەن تسيفرلى حابار تاراتۋعا كوشتى», دەدى ول. وسىنىڭ ناتيجەسىندە اۋىل تۇرعىندارى 15, قالالىقتار 30 ارنانى ساپالى فورماتتا كورۋگە مۇمكىندىك العان. ءمينيستردىڭ مالىمەتىنشە, اتالعان جۇمىس الداعى ۋاقىتتا قوستاناي مەن پاۆلودار وبلىستارىندا جالعاسادى. ال بۇل باعىتتاعى ءىس 2022 جىلى تولىعىمەن اياقتالادى. بۇدان بولەك, مينيستر ەلدەگى الەۋمەتتىك از قامتىلعان توپ تسيفرلى تەلەۆيزيا قۇرالدارىنا تەگىن قول جەتكىزگەنىن ايتتى. ال الداعى كەزەڭدە شالعايداعى ەلدى مەكەندەر وتاندىق «وتاۋ تۆ» سپۋتنيكتىك تاباقشالارىمەن قامتىلماق. وسى ءۇشىن وڭىرلەردە جەرگىلىكتى بيۋدجەتتەن قارجى بولىنگەن.
مينيستر بىلتىر «تاماشا TV» ارناسىنىڭ ىسكە قوسىلعانىن, سونداي-اق «مۋلت» تەلەارناسىنىڭ ەندى قازاقشا «سويلەيتىنىن» تىلگە تيەك ەتتى. «قازاقستاندا رەسەيلىك «مۋلت» تەلەارناسى جوعارى رەيتينگ كورسەتىپ وتىر. وسىعان وراي ءبىز اتالعان ارنانى قازاق تىلىندە تاراتۋعا كەلىسىم جاسادىق. العاشىندا جەكەلەگەن مۋلتفيلمدەر اۋدارىلادى. سونان سوڭ بىرتىندەپ قازاق تىلىندە xابار تاراتۋدى ۇلعايتۋ جوسپارلانىپ وتىر», دەدى ول. سونداي-اق مينيسترلىكتىڭ تاپسىرىسىمەن وتاندىق تەلەارنالار مەن كومپانيالاردىڭ تاريح, تانىم, ءداستۇر, سپورت توڭىرەگىندە 46 سەريال تۇسىرگەنىن جانە جوعارى كورسەتكىشكە يە بولعانىن جەتكىزدى. قازاق تەلەۆيزياسىنىڭ 60 جىلدىق مەرەيتويى اتالىپ وتكەن 2018 جىلى جۋرناليستەردى ىنتالاندىراتىن «ۇركەر», «تۇمار» ۇلتتىق سىيلىقتارىن تابىستاۋ مەن مەديا سالانى جانداندىرۋعا باعىتتالعان «Astana media week» شاراسى, سونداي-اق «قازاقستاننىڭ 100 جاڭا ەسىمى» جوباسىنىڭ ەكىنشى كەزەڭىنىڭ تابىستى وتكەنىن ايتتى.
مينيسترلىك جۇمىسىنىڭ تاعى ءبىر باعىتىنا ەرەكشە توقتالعان د.اباەۆ «اشىق ۇكىمەت» پورتالىنىڭ ءموبيلدى جانە كوزى ناشار كورەتىن ازاماتتارعا ارنالعان قوسىمشالارى دا ىسكە قوسىلعانىن مالىمدەدى. ونىڭ ايتۋىنشا, اتالعان پورتالداعى دەرەكتەر سانى جىل ساناپ ارتىپ كەلەدى. مينيستر: «اشىق ۇكىمەت» پورتالىندا 2018 جىلى 150 جاڭا دەرەك پايدا بولدى. بۇدان بىلاي استانا تۇرعىندارى پورتالدىڭ كومەگىمەن قوعامدىق كولىكتەردىڭ قوزعالىسىن باقىلاي الادى. حالىققا قىزمەت كورسەتۋ ورتالىقتارىنداعى كەزەكتى كورىپ وتىرۋعا دا مۇمكىندىك بار. سونىمەن قاتار بالا تۋىنا بايلانىستى بەرىلەتىن مەملەكەتتىك جاردەماقىنى الاتىنداردىڭ سانىن بىلۋگە دە بولادى», دەدى. ءسوز اراسىندا «ەلەكتروندى ۇكىمەت» پورتالىنىڭ دا جىلدىق جۇمىسىن اتاپ وتكەن ۆەدومستۆو باسشىسى 2018 جىلى 30 ملن-نان استام ەلەكتروندى فورماتتا قىزمەت كورسەتىلگەنىن, پورتالعا 8 ملن-نان استام ادام تىركەلگەنىن ءسوز ەتتى. «ەلەكتروندى ۇكىمەتتىڭ دامۋ دەڭگەيى بويىنشا قازاقستان بۇۇ زەرتتەۋ قورىتىندىسىندا 39-ورىننان كورىندى. بۇل – وتە جوعارى كورسەتكىش», دەدى ول.
كوممۋنيكاتسيالار باعىتى بويىنشا ىسكە اسىرىلعان ماڭىزدى جوبالاردىڭ ءبىرى رەتىندە د.اباەۆ 2018 جىلى ىسكە قوسىلعان Astana Hub تەحنوپاركىن اتادى. ءمينيستردىڭ مالىمەتىنشە, تەحنوپارك جۇمىسىنىڭ ناتيجەسى كوڭىل قۋانتارلىق. از ۋاقىتتىڭ ىشىندە 47 ستارتاپ تاڭدالىپ, 180 ملن تەڭگە ينۆەستيتسيا تارتىلدى. كەلەر جىلى ونىڭ كولەمىن 4,8 ملرد تەڭگەگە ارتتىرۋ مىندەتى تۇر.
سونداي-اق مينيستر حالىققا قىزمەت كورسەتۋ ورتالىقتارىندا (حقو) ىلگەرىلەۋ بارىن العا تارتتى. ونىڭ ايتۋىنشا, ەل اۋماعىنداعى حقو-لار ازاماتتارعا 32 ملن قىزمەت كورسەتكەن, اتىراۋ مەن ورال قالاسىندا ارنايى حقو, سونداي-اق بارلىق وبلىس پەن قالالاردا تسيفرلى حقو-لار اشىلدى, ميگراتسيالىق حقو-لاردى اشۋ جالعاسادى.
ال مەملەكەتتىك مەكەمەلەردىڭ سايتىن بىرىڭعايلاۋ ءىسى الداعى كەزدە ناقتى قولعا الىنباق. بۇل تۋرالى: «بيىل ءبىز مەملەكەتتىك ورگاندار ءۇشىن بىرىڭعاي gov.kz ينتەرنەت-پورتالىن قۇراستىرامىز. بۇل پورتال قازىر سىناقتان ءوتىپ جاتىر», دەدى د.اباەۆ. وسى جۇيە ەنگىزىلسە, مەملەكەتتىك سايتتارعا كەتەتىن قارجىدان ميلليارد تەڭگە ۇنەمدەۋگە بولادى.
بۇگىندە ينتەرنەت قولدانۋشىلار قاتارى قارقىندى ءوسىپ كەلەدى. وسى ورايدا مينيسترلىك بيىل قازاقستاندا 5G ينتەرنەتىنە قول جەتكىزۋدى جوسپارلاپ وتىر. ينتەرنەتتىڭ 5G جىلدامدىعى الدىمەن استانا, الماتى قالالارى جانە وبلىس ورتالىقتارىندا سىناقتان وتكىزىلەدى. بۇل ءۇشىن ەڭ الدىمەن مىسىردا وتەتىن دۇنيەجۇزىلىك راديو بايلانىسى كونفەرەنتسياسىندا حالىقارالىق ەلەكتر بايلانىسى وداعى 5G ستاندارتىن قابىلداۋى كەرەك. القا ءماجىلىسىنىڭ سوڭىندا ءسوز العان پرەمەر-ءمينيستردىڭ ورىنباسارى – قورعانىس جانە اەروعارىش ونەركاسىبى ءمينيسترى اسقار جۇماعاليەۆ: «كەي انىقتامالاردى ءبىر مەملەكەتتىك ورگاننان الامىز دا, ەكىنشىسىنە اپارىپ بەرەمىز. ولار وزدەرى دە ءبىر-بىرىنە قاجەتتى انىقتامالاردى جولداي الادى», دەي كەلە, د.اباەۆقا انىقتامالاردى قىسقارتۋدى تاپسىردى. سونىمەن قاتار ا.جۇماعاليەۆ «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باستى مىندەتى – ۇيالى تەلەفون ارقىلى مەملەكەتتىك قىزمەت كورسەتۋگە باسىمدىق بەرۋ ەكەنىن جەتكىزدى. ونىڭ ايتۋىنشا, ءموبيلدى قوسىمشالار تۇرعىندارعا قولايلى ءارى ولاردىڭ ۋاقىتىن ۇنەمدەۋگە سەپتىگىن تيگىزەدى. وسىعان قوسا ۆيتسە-پرەمەر مەملەكەتتىك ورگاندار مەن وتاندىق كومپانيالار ءىت-تاپسىرىستاردى شەتەلگە ەمەس, وتاندىق يننوۆاتورلارعا بەرۋى ءۇشىن Astana Hub تەحنوپاركى كورپوراتيۆتى يننوۆاتسيالاردىڭ ورتالىعىنا اينالۋى قاجەتتىگىن ايتتى.
ايدانا شوتبايقىزى,
«Egemen Qazaqstan»