قازاق ۇلتتىق قىزدار پەداگوگيكالىق ۋنيۆەرسيتەتىندە حالىق ءارتىسى, قازاقستاننىڭ ەڭبەك ەرى, مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ كوركەمدىك جەتەكشىسى ءاسانالى اشىموۆپەن كەزدەسۋ ءوتتى.
جيىن بارىسىندا اتى اڭىزعا اينالعان اكتەردىڭ شاكىرتتەرىنەن قۇرىلعان «جاڭا عاسىر» تەاترىنىڭ «سوڭعى قوڭىراۋ» قويىلىمى كوپشىلىك نازارىنا ۇسىنىلدى.
– مەملەكەت باسشىسى بيىلعى جىلدى جاستار جىلى دەپ جاريالادى عوي. وسكەلەڭ ۇرپاققا, تالانتتى جاستارعا ناقتى قولداۋىمىز بولسىن دەپ جاڭا تەاتر اشقان بولاتىنبىز. بۇگىنگە دەيىن ونەر ۇجىمىنىڭ رەپەرتۋارىندا 7 قويىلىم بار. سونىڭ ىشىندە شوقتىعى بيىك مۇحتار اۋەزوۆتىڭ «قاراگوز» دراماسى, ي. ءميچچيدىڭ «ارىستاندار پاتشالىعى» مۋزىكالىق دراماسى جانە ەلدار تاشكەنبايدىڭ «سوڭعى قوڭىراۋ» پوەتيكالىق دراماسى كورەرمەننىڭ ىستىق ىقىلاسىنا بولەندى. ساحنالانعان سپەكتاكلدەردىڭ جانرى دا, يدەياسى دا, ءپىشىنى مەن مىنەزى دە ارقيلى. ءبىر-بىرىنە ۇقسامايدى. تەاتر ارتىستەرىنىڭ بارلىعى دا مەنىڭ شاكىرتتەرىم. كەلەشەگىنەن ۇلكەن ءۇمىت كۇتەتىن جاستار, – دەيدى ا. ءاشىموۆ.
اتاپ ايتقاندا, تەاتردىڭ 30 ءارتىسى قازاق ونەرىنىڭ قاراشاڭىراعى ت. جۇرگەنوۆ اتىنداعى قازاق ۇلتتىق ونەر اكادەمياسىندا تەاتر ونەرى فاكۋلتەتىنىڭ ءاسانالى ءاشىموۆ شەبەرحاناسىندا 2014-2018 جىلدارى ارالىعىندا ءبىلىم العان. بيىلعى جىلدىڭ قاڭتار ايىندا قۇرىلعان تەاتردىڭ كوركەمدىك جەتەكشىسى – ءاسانالى ءاشىموۆ, رەجيسسەرى – تالعات كۋبەكوۆ.
قىزدار ۋنيۆەرسيتەتىنىڭ ۇجىمى مەن ستۋدەنتتەرىنىڭ نازارىنا ۇسىنىلعان «سوڭعى قوڭىراۋ» دراماسى دوستارعا دەگەن رياسىز شىنايى كوڭىل, بالا ماحاببات پەن اۋىلدىڭ بۇگىنگى تىنىس-تىرشىلىگىن بەينەلەيدى. وقيعا جەلىسى باستى كەيىپكەر وراز بەن ونىڭ جولداستارى اراسىندا ءوربىپ, ءتۇرلى ادامنىڭ بولمىس-ءبىتىمىن اشادى.
شىعارما اۆتورى ەلدار تاشكەنبايدىڭ ايتۋىنشا, قويىلىم كەيىپكەرلەرىنىڭ بارلىعى مەيىرىمدى, ءبىر-بىرىنە سۇيىسپەنشىلىكپەن قارايتىن جاستار. دراما وسىنىسىمەن وزەكتى.
– الماتىدان اۋىلداعى مەكتەپكە ءبىر وقۋشى قىز بالا اۋىسىپ كەلەدى. ونى كورگەن سىنىپتاسى بويجەتكەنگە عاشىق بولىپ, ونىڭ ومىرگە دەگەن كوزقاراسى مەن جان دۇنيەسى وزگەرەدى. العاشقى كىرشىكسىز سەزىم, شىنايى ماحاببات بوزبالانى جاقسى قاسيەتتەرگە ىنتالاندىرادى, – دەپ اتاپ ءوتتى ە. تاشكەنباي.
قويىلىم الدىندا ءاسانالى ءاشىموۆ جينالعاندار الدىندا ءسوز الىپ, تەاتردى اشۋداعى باستى ماقساتىن اتاپ ءوتتى. سونداي-اق ول «جان بولەك», «مايرانىڭ ءانى» اتتى كىتاپتارىن قىزدار ۋنيۆەرسيتەتىنىڭ رەكتورى گاۋحار الدامبەرگەنوۆاعا سىيعا تارتتى. ءوز كەزەگىندە وقۋ ورنىنىڭ باسشىسى حالىق ارتىسىنە ىزگى نيەتىن ءبىلدىرىپ, سىي-سياپات كورسەتتى.
– تاريحي سانانى جاڭعىرتىپ, بەكزات ونەردى ورگە سۇيرەپ كەلە جاتقان ونەر ۇجىمى وتاندىق مادەنيەتتىڭ دامۋىنا زور ۇلەس قوسادى دەپ سەنەمىن. ونەر مەن مادەنيەت – ۇلتتىڭ ۇلىلىعىن ايشىقتايتىن حالىقتىڭ اسىل مۇراسى, پاراساتى مەن بەت-بەينەسى. وركەنيەتتى مەملەكەت ەڭ الدىمەن الەمدىك مادەنيەتتىڭ التىن قورىنا قوسقان قوماقتى ۇلەسىمەن وزگەلەردەن ءباسى باسىم بولماق. «حاس سۇلۋدىڭ كوز جاسىنداي ءمولدىر ونەر» – تەاتر سالاسىنىڭ وركەندەۋىنە جانە ەلىمىزدە تاجىريبەلى ونەر ادامدارىنىڭ مەكتەبىن قالىپتاستىرۋدا سىزدەردىڭ وزىندىك الار ورىندارىڭىز بار دەپ ويلايمىن. جاسامپاز حالقىمىزدىڭ جانە جاس ۇرپاقتىڭ بويىنا ۇلتتىق قۇندىلىقتاردى ءسىڭىرىپ, جاڭالىقتىڭ جارشىسى بولىپ كەلە جاتقان تەاتر ۇجىمىنا زور العىسىمدى بىلدىرەمىن. ۇجىم مۇشەلەرىنە زور دەنساۋلىق, وتباسىلارىنا باياندى باق-بەرەكە, شىعارماشىلىق تابىس تىلەيمىن, – دەدى ءوز سوزىندە گاۋحار الدامبەرگەنوۆا.
سونىمەن قاتار كەش بارىسىندا ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى اسحات ماەميروۆ ونەر ولكەسىنە قادام باسقان جاستارعا اق جول تىلەپ, باستاماعا قولداۋ ءبىلدىردى.
– ساحنانىڭ كيەسى مەن ۇلى ونەردىڭ قۇدىرەتىنە دەگەن شەكسىز ءھام شىنايى ماحاببات ءبىزدى «جاڭا عاسىرعا» الىپ كەلدى. حالقىمىزدا «ەل ىشىندە ونەر بار, ونەردى تاپقان شەبەر بار» دەگەن ۇلاعاتقا اينالعان ۇلى ءسوز بار. قازاق تەاترى مەن كينوسىنىڭ كوريفەيى ءاسانالى اعامىزدان ءتالىم-تاربيە العانىمىز ءبىز ءۇشىن ۇلكەن ماقتانىش, زور ابىروي, ۇلكەن مەكتەپ. سونداي-اق ءبىز ءۇشىن قوعامدىق وي-سانانىڭ شارىقتاۋ شەگى مەن ادامي دۇنيەتانىمنىڭ جەمىسى بولىپ تابىلاتىن تەاتر ونەرىنىڭ ورنى ءبىر توبە. بولمىس-ءبىتىمى ارقيلى كەيىپكەرلەردىڭ ءرولىن ويناۋ ارقىلى ماڭگىلىك سەزىمگە تولى بەكزات ونەردىڭ قىر-سىرىن مەڭگەرە تۇسەمىز, – دەيدى تەاتر ارتىستەرى.
جاندار اسان