كەزدەسۋ بارىسىندا قازاقستان پرەزيدەنتىنە «سامۇرىق-قازىنا» اكتسيونەرلىك قوعامىنىڭ 2018 جىلى اتقارعان جۇمىستارى جونىندە ەسەپ بەرىلدى. بۇل تۋرالى اقوردانىڭ باسپاسوز قىزمەتى حابارلادى.
نۇرسۇلتان نازارباەۆ «سامۇرىق-قازىنا» اكتسيونەرلىك قوعامى قىزمەتىنىڭ نەگىزگى كورسەتكىشتەرىنىڭ ناتيجەلەرى جاقسى ەكەنىن ايتتى.
– جالپى, قور قىزمەتىنىڭ قورىتىندىلارى باسقا جىلدارمەن سالىستىرعاندا وتە جاقسى. اكتسيونەرلىك قوعامنىڭ بارلىق كومپانيالارى جىلدى تابىستى اياقتاپ, كىرىستەرىن ارتتىرا ءتۇستى. سونىمەن قاتار, قوردىڭ باسقارۋ دەڭگەيلەرى جوسپارلى تۇردە وڭتايلاندىرىلدى, – دەدى ەلباسى.
ا.ەسىموۆ مەملەكەت باسشىسىنا قور اكتيۆتەرىن جەكەشەلەندىرۋ بارىسى, «قازاقتەلەكوم» جانە «Air Astana» كومپانيالارىن IPO-عا شىعارۋ جوسپارى, سونداي-اق «سامۇرىق-قازىنا» اكتسيونەرلىك قوعامىنىڭ «سارىارقا» گاز قۇبىرى ماگيسترالىن سالۋ جۇمىستارىن قارجىلاندىرۋ ىسىنە اتسالىسۋى جونىندە باياندادى.
كەزدەسۋ سوڭىندا ەلباسى بىرقاتار ناقتى تاپسىرما بەردى.