وتكەن جىلى اۋىل ايماقتارداعى جاستاردىڭ اعىلشىن ءتىلىن ۇيرەنۋىنە مۇمكىندىك بەرۋ ماقساتىندا «نۇر وتان» پارتياسى «English for jastar» پيلوتتىق جوباسىن ازىرلەگەن بولاتىن. جوبا جۇمىسى ءساتتى اياقتالىپ, بيىلعى جىلعا جۇيەلى جوسپارلار ءتىزىلدى. بۇل جايىندا وڭىرلىك كومۋنيكاتسيالار قىزمەتىندە وتكەن جيىن بارىسىندا ايتىلدى.
–2018 جىلى «نۇر وتان» پارتياسى «English for jastar» جوباسىن ىسكە قوسىپ, ەلىمىزدىڭ تۇكپىر-تۇكپىرىندەگى 7 مىڭعا جۋىق وقۋشىنى اعىلشىن تىلىنە باۋلۋ تۋرالى باستامانى جۇزەگە اسىردى. جوبا بيىلعى جىلى دا جالعاساتىن بولادى. وبلىستىڭ 5 اۋدانىنا اعىلشىن ءتىلىن وقىتۋعا 13 ەرىكتى ىرىكتەلىپ الىندى. ەرىكتىلەر ەكى كەزەڭگە سوزىلعان باقىلاۋ سىناعىنان ءوتىپ, ءوز بىلىكتىلىكتەرىن تارازى باسىنا تارتتى. بۇل جوبا تەك قانا وقۋشىلاردىڭ ءتىل ءبىلۋ دەڭگەيىن كوتەرىپ قويماي, ەرىكتى جاستاردىڭ دا بولاشاق ماماندىعىنا دەگەن جاۋاپكەرشلىگىن ارتتىرۋعا سەپتىگىن تيگىزىپ وتىر.
وتكەن جىلى ءدال وسى باعىتتا 12 ەرىكتى ىرىكتەلىپ الىنىپ, ەكى اي بويى ءوڭىردىڭ 6 اۋدانىنان 600-گە جۋىق وقۋشىعا ءتىل ۇيرەتۋ كۋرستارىن جۇرگىزگەن بولاتىن. اتالمىش كۋرستىڭ ەرەكشەلىگى – ەرىكتىلەر كۋرستى ءداستۇرلى تۇردە جۇرگىزبەي, دەبات ويىنى, ساحنالىق قويىلىمدار, ەركىن پىكىر الماسۋ, ويىن تۇرىندە وتكىزەدى. مۇنداي ادىستەر مەكتەپ جاسىنداعى بالالاردىڭ قىزىعۋشىلىعىن تۋعىزىپ عانا قويماي, ءتىل ۇيرەنۋگە دەگەن ىنتا-جىگەرىن ارتتىرادى.
–اۋىلدىق وكرۋگتەردەگى جاستاردىڭ ءتىل ۇيرەنۋىنە مۇمكىندىك بەرۋ ماقساتىندا جۇزەگە اسىرىلىپ جاتقان بۇل جوبا بىلتىر ءوز جەمىسىن بەردى. ەكى اي از ۋاقىت بولسا دا, وقۋشىلار ءارى قاراي ىزدەنۋگە ىنتالاندىرىلدى. ءارى بالالاردىڭ ساباقتان بوس ۋاقىتتارىن ءتيىمدى پايدالانۋىنا تاپتىرماس مۇمكىندىك. سەبەبى كۋرس وتكىزۋ فورماتى دا كۇندەلىكتىدەن ەرەكشە. بۇل جوبا تەك وقۋشىلارعا عانا ەمەس, تاجىريبەدەن ءوتىپ جاتقان ەرىكتىلەرگە دە بىلىكتىلىكتەرىن ارتتىرۋعا زور كومەك,–دەيدى وبلىستىق "جاس وتان" جاستار قاناتىنىڭ توراعاسى سۇلتانبەك بەكەشەۆ.
ءۇش تۇعىرلى ءتىل – ازاماتتاردىڭ بۇگىنگى كۇن مەن كەلەشەك قوعامدا ورنىقتى قالىپتاسۋىنىڭ باستى فاكتورلارىنىڭ ءبىرى. «English for jastar» جوباسى شالعاي ەلدىمەكەندەردە ورنالاسقان اۋىل جاستارىنا جاسالىپ جاتقان بىرەگەي مۇمكىندىك.
بايقال ءبايادىل,
«Egemen Qazaqstan»
اقمولا وبلىسى