س.سەيفۋللين اتىنداعى قازاتۋ پاريجدە الەمدەگى ەڭ ۇزدىك 10 اگرارلىق جوو-نىڭ قاتارىنا كىرەتىن AgriParisTech ۋنيۆەرسيتەتىمەن ىنتىماقتاستىق تۋرالى مەموراندۋمعا قول جەتكىزدى.
وسى وقيعاعا وراي ۋنيۆەرسيتەت رەكتورى اقىلبەك كۇرىشباەۆ: «بۇدان بىلاي فرانتسيالىق پروفەسسورلارمەن حالىقارالىق دەڭگەيدەگى جاڭا وقۋ باعدارلامالارىن بىرلەسە ازىرلەپ, ءبىلىم بەرۋ ۇدەرىسىنە ەنگىزەتىن بولامىز. بارلىعى جوسپارلاعانىمىزداي بولسا, الداعى ۋاقىتتا ولارمەن قوس ديپلومدى ءبىلىم بەرۋگە كوشەمىز. مۇنداي مىندەتتى الدىمىزعا پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى ءو.شوكەەۆ, ۇلتتىق اگرارلىق عىلىمي-ءبىلىم بەرۋ ورتالىعىنىڭ باسشىلىعى قويىپ وتىر. بىزگە اۋىل شارۋاشىلىعى باعىتىندا ءبىلىم بەرەتىن الەمدىك كوشباسشىنىڭ كەلۋىن تىڭ وزگەرىستەرگە جاسالعان العاشقى قادامنىڭ باسى دەپ باعالاعان ءجون», دەدى.
رەكتوردىڭ ايتۋىنشا, بۇل شەشىمدى فرانتسيالىق ۋنيۆەرسيتەت قازاقستاندىق جوعارى وقۋ ورنىنىڭ وقىتۋشىلارى مەن ستۋدەنتتەرىنىڭ الەۋەتىن جان-جاقتى زەرتتەپ بارىپ قابىلداعان. مۇنداي كوشباسشىلارمەن سەرىكتەستىككە قول جەتكىزۋ دە وڭاي ەمەس, سەبەبى بۇل ۋنيۆەرسيتەتتەر ءۇشىن وزدەرىنىڭ جەكە ءيميدجى ءبىرىنشى ورىندا.
– ەندىگى كەزەكتە قازاتۋ-دىڭ دامۋ باعدارلاماسىن تابىستى ءارى ۋاقىتىلى جۇزەگە اسىرۋ ءۇشىن مەملەكەتتىك بيۋدجەتتەن قاراجات ءبولۋ قاجەت. الداعى ۋاقىتتا ءبىز دە الەمنىڭ ۇزدىك ۋنيۆەرسيتەتتەرىندەگى سياقتى اۋىل شارۋاشىلىعىنىڭ كاسىبي ماماندارىن دايىندايمىز. ويتكەنى ءبىز كەزىندەگى سينگاپۋر, مالايزيا, ارگەنتينا, چيلي, قىتاي جانە باسقا دا ەلدەردىڭ جەتەكشى ۋنيۆەرسيتەتتەرى وتكەن جولمەن ءجۇرىپ كەلەمىز. ولاردىڭ قالىپتاسۋىنا مەملەكەت تاراپىنان قولداۋ كورسەتىلىپ, سونىڭ ناتيجەسىندە قازىرگى دەڭگەيگە جەتىپ وتىر, – دەيدى ا.كۇرىشباەۆ.
ارنۇر اسقار,
«Egemen Qazaqstan»