استانادا 4 كۇن بۇرىن جوعالىپ كەتكەن 13 جاسار بالا قۇدىقتان ءولى كۇيىندە تابىلدى. بۇل تۋرالى ىشكى ىستەر مينيسترلىگى توتەنشە جاعدايلار كوميتەتىنىڭ رەسمي وكىلى نۇرسۇلتان نۇراحمەتوۆ مالىمدەدى.
«19 اقپان كۇنى ساعات 16:53-تە استانانىڭ تەمىرجول تۇرعىن الابىندا ورتالىق وڭىرلىك اەروموبيلدى شۇعىل-قۇتقارۋ جاساعىنىڭ قۇتقارۋشىلارى 2006 جىلى تۋعان بالانى ىزدەستىرۋ جۇمىستارىن جۇرگىزدى. ول 16 اقپاندا ۇيىنەن شىعىپ كەتىپ, قايتا ورالماعان. ساعات 23:40-تا ۆولونتەرلار اشىق جاتقان كارىز قۇدىقتارىنىڭ بىرىنەن جوعالعان بالانىڭ دەنەسىن تاپتى. قۇتقارۋشىلار ءمايىتتى الىپ شىقتى», نۇرسۇلتان نۇراحمەتوۆ.
استانا قالالىق پوليتسيا دەپارتامەنتىنىڭ ءباسپاسوز قىزمەتى مالىمدەگەندەي, وقيعا بويىنشا تەرگەۋ باستالدى. سوت-مەديتسينالىق ساراپتاما تاعايىندالدى. باقداۋلەت ءومىرحاننىڭ دەنەسىندە كوزگە كورىنەتىن زورلىق-زومبىلىق بەلگىلەرى بايقالماعان.
«بالانىڭ جوعالۋ سەبەبىن انىقتاۋ جانە ونىڭ ورنالاسۋ جەرىن انىقتاۋ ماقساتىندا شۇعىل-ىزدەستىرۋ توبى قۇرىلدى. وعان پوليتسەيلەر, اسكەري قىزمەتشىلەر, توتەنشە جاعدايلار قىزمەتكەرلەرى ەندى. سونداي-اق ىزدەستىرۋ جۇمىستارىنا ەرىكتىلەر قوسىلدى. اسكەري قىزمەتشىلەر مەن ۆولونتەرلار كەنتتەگى (تەمىرجول تۇرعىن الابى) ورماندى القاپتاردى, قاراۋسىز قالعان جەر ۇيلەردى, اشىق الاڭداردى, تەمىرجول وتكەلدەرىن, كارىز قۇدىقتارىن, سونداي-اق تەحنيكانىڭ كومەگىمەن تراسسالار بويىن ءتىنتىپ شىقتى», دەدى ول.