قازاقستاننىڭ تانىمال كاسىپقوي بوكسشىلارى باتىر جۇكەمباەۆ پەن نۇرزات سابىروۆ وزدەرىنىڭ كەلەسى جەكپە-جەكتەرىن 16 ناۋرىزدا كانادانىڭ مونرەال قالاسىندا وتكىزەدى.
وسى كۇنگە دەيىنگى 14 كەزدەسۋدىڭ بارلىعىن جەڭىسپەن اياقتاپ, 12 قارسىلاسىن ەسىنەن تاندىرعان ءبىرىنشى ورتا سالماقتاعى باتىر جۇكەمباەۆتىڭ كىممەن جۇدىرىقتاساتىنى ازىرگە بەلگىسىز. ءبىر انىعى, ۋاقىت وزعان سايىن الەمدىك رەيتينگتە جوعارلاپ, جانكۇيەرلەردىڭ كوزايىمىنا اينالعان قانداسىمىز مىقتى بوكسشىمەن قولعاپ تۇيىستىرەدى.
ەكىنشى ورتا سالماقتاعى نۇرزات سابىروۆتىڭ دا قارقىنى قۋانتارلىق. جەرلەسىمىز 8 رەت رينگكە كوتەرىلىپ, بارلىعىندا باسىمدىق تانىتتى. 7 باسەكەنى مەرزىمىنەن بۇرىن اياقتادى. ول سەزار رەينوسومەن كۇش سىناسادى. 32 جاستاعى ارگەنتينالىق بىلعارى قولعاپ شەبەرى 30 كەزدەسۋدىڭ تەڭ جارىسىن ۇتىپ, 11 رەت جەڭىلىس تاپتى. تاعى 4 جەكپە-جەكتە تەڭ ەسەپ تىركەلدى.
عالىم سۇلەيمەن,
«Egemen Qazaqstan»