جاڭادان 14 مەكتەپتىڭ قۇرىلىسى جۇرگىزىلىپ, ونىڭ 8-ءى پايدالانۋعا بەرىلگەن تۇركىستان وبلىسى سارىاعاش اۋدانىندا بيىل اپاتتى جاعدايداعى مەكتەپ ماسەلەسى شەشىمىن تاپتى.
اۋدان جىلدى جاڭا نىسانداردى پايدالانۋعا بەرۋمەن باستادى. اتاپ ايتساق, جۋىردا اۋداندا 5 بالاباقشا, 2 مەكتەپ, 4 مەدپۋنكت, بارلىعى 13 نىسان پايدالانۋعا بەرىلدى. وعان قوسا جامبىل اۋىل وكرۋگىنە قاراستى بەكبوتا, مايدابوزاي, قالعانسىر, كوپقۇدىق, بايعابىل ەلدى مەكەندەرىندە ەلەكتر جەلىلەرىنىڭ جاڭارتىلعان نىساندارى ىسكە قوسىلدى. جاڭا اشىلعان نىسانداردىڭ ءبىرى – سارىاعاش قالاسىندا ورنالاسقان №4 يۋ.گاگارين مەكتەبىنىڭ 900 ورىندىق عيماراتى. قۇرىلىسى 2017 جىلى باستالعان نىسانعا جالپى سوماسى 1 ملرد. 300 ملن. تەڭگە جۇمسالعان. جاڭا مەكتەپتىڭ اشىلۋ سالتاناتىنا قاتىسقان وبلىستىق ماسليحات دەپۋتاتى ابىلقاسىم دوسبولوۆ, وبلىستىق ءبىلىم باسقارماسىنىڭ باسشىسى يساتاي ساعىندىقوۆ جانە اۋدان اكىمى قايرات ابدۋاليەۆ تۇرعىنداردى قۇتتىقتاپ, مەكتەپتىڭ لەنتاسىن قيدى. سونداي-اق بۇل كۇنى تەگىسشىل اۋىلىنا قاراستى مادەنيەت ەلدى مەكەنىندە 300 ورىندى م.جۇماباەۆ اتىنداعى مەكتەپ پايدالانۋعا بەرىلدى. جالپى اۋدانداعى 77 ءبىلىم بەرۋ مەكەمەسىنىڭ 57-ءى تيپتىك ۇلگىدە سالىنسا, ىڭعايلاستىرىلعان جايدا ورنالاسقانى - 21. پايدالانۋعا بەرىلگەن نىسانداردىڭ تاعى ءبىرى - جاڭاقۇرىلىس ەلدى مەكەنىندە ورنالاسقان 125 ورىندى «ايشا اپا» بوبەكجايى قۇرىلىسىنا 160 ملن. تەڭگە جەكە ينۆەستيتسيا تارتىلعان. جەرگىلىكتى 23 ادام تۇراقتى جۇمىسپەن, ورتاشا 45 مىڭ تەڭگە جالاقىمەن قامتىلىپ وتىر. ايتا كەتەلىك, بۇل كۇنى «نۇرالەم», ء«الىتاي», «جانايىم», «سايانتاي» اتتى بالاباقشالار دا پايدالانۋعا بەرىلدى. جالپى اۋداندا 202 مەكتەپكە دەيىنگى مەكەمە بار. ونىڭ 16-ى مەملەكەتتىك, 181-ءى جەكەمەنشىك بالاباقشا جانە 5-ءۋى شاعىن ورتالىق. اۋدان بويىنشا 1-6 جاس ارالىعىنداعى بالالاردىڭ سانى 26 067 بولسا, بالا-باقشالارعا قامتىلعانى – 22 545. ياعني بالالاردىڭ قامتىلۋ كورسەتكىشى 93,0% بولىپ وتىر. سونداي-اق, «رۋحاني جاڭعىرۋ» باعدارلاماسى اياسىندا قايتا قالپىنا كەلتىرىلگەن, قاپلانبەك وقۋ-شارۋاشىلىعىنداعى «ەر ەسىمى – ەل ەسىندە» اللەياسى اشىلدى. تاسكەسكەن, مادەنيەت, قۇرساي, ءالىمتاۋ ەلدى مەكەندەرىندە بۇگىنگى زامان تالابىنا ساي سالىنعان, ءمودۋلدى قۇرامالى مەديتسينالىق پۋنكتتەر دە قاڭتاردان باستاپ حالىققا قىزمەت كورسەتە باستادى.
عالىمجان ەلشىباي,
«ەگەمەن قازاقستان»
تۇركىستان وبلىسى.