شاڭعىمەن جۇگىرۋدەن قازاقستان ۇلتتىق قۇراماسىنىڭ باس باپكەرى يۋري كامينسكي ەلىمىزدىڭ بەس ايماعىنان كەلگەن جاس سپورتشىلارعا اشىق ساباق وتكىزدى. شەبەرلىك ساباعى الماتى وبلىسى تالعار قالاسىنداعى شاڭعى-بياتلون كەشەنىنىڭ بازاسىندا ۇيىمداستىرىلدى دەپ حابارلايدى Olympic.kz.
اشىق ساباق بارىسىندا وتىزعا جۋىق جاس سپورتشى تانىمال باپكەرمەن تىلدەسىپ, كوكەيىندەگى سۇراقتارىن قويىپ, كاسىبي ماماننىڭ اقىل-كەڭەستەرىنە قۇلاق ءتۇردى.
«ساباق بارىسىندا ءبىزدىڭ سپورتشىلار جاي عانا باپكەرمەن ەمەس, شاڭعى سپورتىنىڭ كوزى ءتىرى اڭىزىمەن كەزدەستى. يۋري ميحايلوۆيچ بالالارمەن دە, كاسىبي سپورتشىلارمەن دە جۇمىس ىستەگەن مىقتى مامان. قىركۇيەك ايىندا ول ايماقتاردان كەلگەن باپكەرلەرگە ارناپ سەمينار وتكىزگەن. بۇگىن بالالارمەن كەزدەسىپ, كوپشىلىگىمەن جەكەلەگەن جاتتىعۋ وتكىزدى. كەمشىلىكتەرىن كورسەتىپ, كەڭەسىن بەردى. مۇنداي اشىق ساباقتاردىڭ پايداسى ۇشان-تەڭىز», - دەيدى شقو اعا باپكەرى وكسانا ياتسكايا.
يۋري كامينسكيدىڭ شەبەرلىك ساباعى ەكى كەزەڭنەن تۇردى. ءبىرىنشى بولىمدە رەسەيدىڭ ەڭبەك سىڭىرگەن جاتتىقتىرۋشىسى جاس سپورتشىلارمەن تەوريالىق تۇرعىدا وي ءبولىسىپ, قانداي جاتتىعۋلارعا كوپ كوڭىل ءبولۋ كەرەكتىگىن ەسكەرتتى. ەكىنشى بولىمدە سپورتشىلار پراكتيكالىق تۇرعىدان ساباق الدى.