ورال قالاسىنداعى №31 جانە №33 مەكتەپ عيماراتتارى, اقجايىق اۋدانىنداعى اباي اتىنداعى گيمنازيا, ماحامبەت وتەمىسوۆ اتىنداعى ورتا مەكتەپ جانە قازتالوۆ اۋدانىنداعى الما ورازباەۆا اتىنداعى ورتا مەكتەپ عيماراتى اپات جاعدايىندا تۇر. باتىس قازاقستان وبلىستىق ءبىلىم باسقارماسىنىڭ باسشىسى شولپان قادىروۆا بيىل چاپاەۆ پەن قازتالوۆ اۋىلدارىندا جاڭا مەكتەپ قۇرىلىسى باستالاتىنىن ايتادى.
2018 جىلى وبلىستا ءبىلىم سالاسىندا 7 عيمارات جاڭادان سالىنىپ, پايدالانۋعا بەرىلدى. ونىڭ تورتەۋى – ورتا مەكتەپ عيماراتتارى. ماسەلەن, ورال قالاسىنا قاراستى دەركول كەنتىندە 600 ورىندىق, زاشاعان كەنتىندە 900 ورىندىق مەكتەپ سالىنسا, اقجايىق اۋدانىنىڭ شابدارشاپ اۋىلىندا 198 ورىندىق مەكتەپ عيماراتى, بايتەرەك اۋدانى داريان اۋىلىندا 300 ورىندىق مەكتەپ 100 ورىندىق ينتەرناتىمەن بىرگە سالىنىپ, قازىر ساباق ءجۇرىپ جاتىر.
بۇعان قوسا بوكەي ورداسى اۋدانىنىڭ ورتالىعى سايقىن اۋىلىندا 70 ورىندىق ينتەرنات, قازتالوۆ اۋدانى ورتالىعىندا ساز مەكتەبى, اقساي قالاسىندا 240 ورىندىق بالاباقشا پايدالانۋعا بەرىلگەن.
تەرەكتى اۋدانىنىڭ سارى ءومىر اۋىلىندا 48 ورىندىق ساۋىقتىرۋ لاگەرى عيماراتىنىڭ قۇرىلىسى جالعاسۋدا.
ورال قالاسىنداعى مەملەكەتتىك تىلدە ءبىلىم بەرەتىن مەكتەپتەردە ورىن تاپشىلىعى سەزىلەدى. ماسەلەن, 2018-2019 وقۋ جىلىنىڭ باسىندا 5 ءۇش اۋىسىمدى مەكتەپ بولعان. 2018 جىلدىڭ سوڭىندا سارىتاۋ شاعىن اۋدانىندا 900 ورىندىق №50 مەكتەپ پايدالانۋعا بەرىلىپ, ءۇش اۋىسىمدى مەكتەپ سانى ءسال ازايدى. دەگەنمەن, كوپقاباتتى تۇرعىن ءۇي قۇرىلىسى قارقىندى ءجۇرىپ جاتقان زاشاعان كەنتىنە ءالى بىرنەشە مەكتەپ كەرەك. شولپان قادىروۆا وسى اۋداندا №51 مەكتەپ قۇرىلىسى باستالاتىنىن حابارلادى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى