مەملەكەت باسشىسى گرەك-ريم كۇرەسىنىڭ ايگىلى جاتتىقتىرۋشىسى ۆاديم الەكساندروۆيچ پسارەۆتىڭ قايتىس بولۋىنا بايلانىستى كوڭىل ايتتى دەپ حابارلايدى اقوردانىڭ ءباسپاسوز قىزمەتى.
«ۆاديم الەكساندروۆيچ سپورت سالاسىندا جارتى عاسىردان استام ۋاقىت قىزمەت ەتكەن كەزىندە ۆالەري رەزانتسەۆ, جاقسىلىق ۇشكەمپىروۆ, اناتولي نازارەنكو جانە ۆلاديمير باكۋلين سياقتى وليمپيادا ويىندارىنىڭ جەڭىمپازدارى مەن جۇلدەگەرلەرىنىڭ داڭقتى شوعىرىن تاربيەلەپ شىعاردى. 2014 جىلى الەمدىك گرەك-ريم كۇرەسىن دامىتۋعا ەلەۋلى ۇلەس قوسقانى ءۇشىن FILA-نىڭ داڭق زالىنا ونىڭ ەسىمى جازىلدى», – دەلىنگەن جەدەلحاتتا.
سوڭىندا قازاقستان پرەزيدەنتى نۇرسۇلتان نازارباەۆ ۆاديم پسارەۆتىڭ جارقىن بەينەسى حالقىمىزدىڭ جادىندا ءاردايىم ساقتالاتىنىن اتاپ ءوتتى.