قاڭتاردىڭ 6-12 ارالىعىندا وزبەكستان استاناسى تاشكەنتتە دزيۋدودان بەس مەملەكەت سپورتشىلارىنىڭ قاتىسۋىمەن حالىقارالىق جاتتىعۋ لاگەرى ءوتتى دەپ حابارلايدى Olympic.kz.
جاتتىعۋ لاگەرىنە رەسەي, وزبەكستان, تاجىكستان, اۋعانستان جانە قازاقستان دزيۋدوشىلارى قاتىستى.
ۇلتتىق قۇرامانىڭ باس باپكەرى ايدىن سماعۇلوۆتىڭ ايتۋىنشا, بىرلەسكەن جيىن سپورتشىلار ءۇشىن ءساتتى وتكەن.
«حالىقارالىق جاتتىعۋ لاگەرىنە جالپى ەسەبى 500-گە جۋىق دزيۋدوشى قاتىستى. رەسەيلىكتەر ءۇش كوماندا الىپ كەلدى. ءبىزدىڭ قۇراما ساپىنان ەرلان سەرىكجانوۆ (66 كەلى) پەن ديدار حامزا (81 كەلى) عانا بارا العان جوق. ولار مەديتسينالىق تەكسەرۋدەن وتۋدە. جاستار قۇراماسىنان 10 سپورتشىنىڭ ەرتە باردىق. جالپى العاندا, جاتتىعۋ لاگەرى ەشقانداي جاراقاتسىز, جاقسى ءوتتى», - دەيدى سماعۇلوۆ.
باس باپكەردىڭ ايتۋىنشا, كوماندا مۇشەلەرى جاڭا جىلدىق دەمالىس كەزىندە سەگىز كۇن ءۇزىلىس الىپ, جاتتىعۋعا قايتا كىرىسكەن.
«ەندى جاپونيادا وتەتىن حالىقارالىق جاتتىعۋ جيىنىنا قاتىسامىز. جيىنعا بىرنەشە مەملەكەت قاتىسادى دەپ كۇتىلۋدە. كەيىن سپورتشىلاردىڭ جىلدىڭ العاشقى جارىسى – پاريجدەگى Grand Slam دوداسى كۇتىپ تۇر. ودان سوڭ, ديۋسسەلدورفتاعى تۋرنير باستالادى. وسىلايشا, جارىستار تىزبەگى ءبىر-بىرىمەن جالعاسىپ كەتە بەرمەك. كەلەسى جىلى وليمپيادا ويىندارى وتەدى. سوندىقتان, رەيتينگىلىك ۇپايدى مەيىلىنشە كوپ جيناۋعا تىرىسامىز», - دەدى دزيۋدودان قۇراما باس باپكەرى ايدىن سماعۇلوۆ.