وبلىس تۇرعىندارىنىڭ قارجىلىق ساۋاتتىلىعىن ارتتىرۋ جانە جاڭا كاسىپ كوزدەرىن اشۋ ماقساتىندا«اتامەكەن» ۇلتتىق كاسىپكەرلەر پالاتاسىنىڭ باستاماسىمەن جۇزەگە اسىرىلعان «باستاۋ» جوباسى اياسىندا بىلتىر بىرقاتار اۋقىمدى جۇمىستار جۇرگىزىلدى. باعدارلاما باستالعان ۋاقىتتان بەرى 3 مىڭعا جۋىق تۇرعىندار كاسىپكەرلىك وقۋلارىنان وتكەن.
«باستاۋ» جوباسى جۇمىسسىز ازاماتتار مەن ءوزىن-ءوزى قامتىپ وتىرعان جانداردى كاسىپكەرلىك نەگىزدەرىنە وقىتۋعا باعىتتالعان. بيزنەس شارتارىن ۇيرەنۋ كۋرسىنا قاتىسۋ ءۇشىن جەرگىلىكتى جۇمىسپەن قامتۋ ورتالىقتارىنا ءوتىنىش ءبىلدىرىپ, تەست سۇراقتارىنان ءوتۋ كەرەك. وقۋ 20 كۇن ارالىعىندا جۇرگىزىلەدى جانە ماركەتينگ, سالىق, زاڭ تالاپتارىن قامتيتىن 12 مودۋلدەن تۇرادى. بىلتىر 2231 ادام وسىنداي وقۋدان ءوتىپ, ولاردىڭ 516-سى بيزنەس اشۋ ءۇشىن 1 ملرد, 300 ملن 650 مىڭ تەڭگە كولەمىندە جەڭىلدەتىلگەن نەسيە الدى. «باستاۋ» بويىنشا كاسىپ اشقاندار ءبىر جىل بويى وڭىرلىك كاسىپكەرلەر پالاتاسىنىڭ سۇيەمەلدەۋىندە بولادى. سونىمەن قاتار, جوبانى بىتىرگەن تۇلەكتەر 100 اەك كولەمىندە ءبىر رەتتىك ارنايى گرانت يەمدەنە الادى.
«باستاۋ» كاسىپكەرلىك قابىلەتتى انىقتاپ, ىسكەرلىككە باۋليدى. بيزنەسپەن اينالىسقىسى كەلەتىن ازاماتتار باعدارلاماعا قاتىسۋعا ءوتىنىم بەرە الادى. جوبا وسى جىلى دا جالعاسادى. كاسىپكەرلىك ساباقتارىنا قاتىسۋشىلار تەگىن وقيدى جانە وسى ۋاقىت ارالىعىندا تىڭداۋشىلارعا شاكىرتاقى قاراستىرىلعان. بىلتىرعى جىلى «باستاۋ» جوباسىنىڭ 6 كەزەڭى وتكىزىلىپ, تىڭداۋشىلاردىڭ 400-گە جۋىعى وبلىستىق كوميسسيا الدىندا بيزنەس-جوسپارلارىن ءساتتى قورعادى»,-دەيدى «اتامەكەن» كاسىپكەرلەر پالاتاسى ديرەكتورىنىڭ ورىنباسارى جاڭا-ايىم كەلباتىروۆا.
وڭىرىمىزدە «باستاۋ» جوباسى ارقىلى جاڭا كاسىپ تۇرلەرىن ىسكە اسىرۋدا. ايتالىق, قوبدا اۋدانىنىڭ تۇرعىنى الەكساندر كراسيلنيكوۆ ارا شارۋاشىلىعىن ىسكە قوسىپ, كاسىبىن دوڭگەلەتىپ وتىر. كاسىپكەر سۇيىكتى ءىسىن تابىستى بيزنەسكە اينالدىرۋ جولدارىن «باستاۋ» جوباسىنان ۇيرەنگەنىن ايتادى. بۇگىنگى كۇنى ونىڭ ومارتالارىندا 200 مىڭ ارا بار. ونىڭ شارۋاشىلىعىنىڭ ونىمدەرىنە تاپسىرىستار كوپ تۇسەدى.
سونىمەن قاتار تەمىر اۋدانى بويىنشا قاز شارۋاشىلىعى, ماكارون, كونديتەر تسەحتارى, جىلىجاي, مارتوك اۋدانىندا اشىلعان توكار تسەحى, ىرعىز, ويىل اۋداندارىنداعى جيھاز وندىرىستەرىن, قارعالىداعى كەمپينگ قۇرىلىسى مەن مارتوك اۋدانىنىنىنىڭ تۇرعىنى اينالىسىپ وتىرعان تۇيە شارۋاشىلىعى سياقتى«باستاۋ» تىڭداۋشىلارىنىڭ جۇزەگە اسىرعان جوبالارىن وبلىستاعى پەرسپەكتيۆتى بيزنەس نىساندارىنا جاتقىزۋعا بولادى.
ايتا كەتەلىك, «باستاۋ» جوباسى «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ» 2017-2021 جىلدارعا ارنالعان مەملەكەتتىك باعدارلاماسى اياسىندا جۇرگىزىلۋدە.
تەمىر قۇسايىن,
«ەگەمەن قازاقستان»