اتام قازاق «جەتىم كورسەڭ جەبەي ءجۇر» دەۋشى ەدى. قازىر جەتىمدەردى جەبەۋشىلەر ەمەس, اقىسىن جەۋشىلەر كوبەيىپ بارا جاتقانداي ما, قالاي؟!
جەتىمدەر تۋرالى بەكەرگە ايتىپ وتىرعان جوقپىز. وسىدان بىرنەشە كۇن بۇرىن وسكەمەندەگى مامانداندىرىلعان بالالار ءۇيىنىڭ بۇرىنعى ەسەپشىسىنىڭ «مەن اقشانى جەگەن, اقشانى مەنىمەن بىرلەسە جەگەن مۇنداي ديرەكتورمەن جۇمىس ىستەي المايمىن» دەپ جاھانعا جار سالعان مالىمدەمەسى الەۋمەتتىك جەلىلەر ارقىلى كوپشىلىككە تاراعان بولاتىن.
بۇرىنعى باس ەسەپشى ەشكىم كۇتپەگەن توسىن مالىمدەمەنى جاڭا جىل قارساڭىندا بالالار ۇيىندە وسى مەكەمەنىڭ 160 قىزمەتكەرىنىڭ جەلتوقسان ايىنداعى جالاقىسىنىڭ بەرىلمەۋىنە بايلانىستى وتكەن جيىندا جاساعان-دى. اششى شىندىقتى جاسىرماي جايىپ سالعان باس بۋحگالتەر 27 جەلتوقساندا جۇمىستان بوساتىلىپتى. ال بالالار ءۇيىنىڭ ديرەكتورى گۇلنار دانياروۆا بۇل جاعدايعا بايلانىستى باسىن اشىپ ەشتەڭە ايتپادى, تەك قۇقىق قورعاۋ ورگاندارىنا رەسمي تۇردە ارىز جازعانىن جەتكىزدى. «باس بۋحگالتەردىڭ ۇستىنەن شاعىم جازىلدى. ەندى سول كىسىلەر ءبارىن تەكسەرۋ كەرەك» دەپ قىسقا قايىردى ديرەكتور.
بالالار ءۇيىنىڭ 160 قىزمەتكەرىنىڭ جالاقىسى, مەكەمەنىڭ ودان ارعى تاعدىرى نە بولادى؟ وبلىستىق دەنساۋلىق ساقتاۋ باسقارماسىنىڭ باسشىسى مارات شورانوۆ جەلتوقسان ايى ءۇشىن جالاقى قارىزى 15 ميلليون تەڭگەنى قۇرايتىنىن, بۇل ماسەلە باقىلاۋعا الىنعانىن, اي سوڭىنا دەيىن شەشىم تاباتىنىن ايتادى. «مەكەمە قازىر قالىپتى جاعدايدا جۇمىس ىستەپ تۇر. تاماقپەن, ءارتۇرلى قۇرال-جابدىقتارمەن قامتاماسىز ەتىلگەن» دەيدى ول.
بالالار ۇيىندە بۇگىندە 5 جاسقا دەيىنگى 78 بالعىن تاربيەلەنىپ جاتىر ەكەن. ال بالالار ءۇيىنىڭ باسشىلارى مەن ەسەپشىلەرىنىڭ ءىسىنىڭ اق-قاراسىن قۇقىق قورعاۋ ورگاندارى انىقتايتىن بولادى.
ازامات قاسىم,
«ەگەمەن قازاقستان»
وسكەمەن