حالىقارالىق «قازاق ءتىلى» قوعامىنىڭ ورىنبورداعى وكىلدىگىنىڭ جەتەكشىسى ساۋلە تايكەشەۆانىڭ ۇيىمداستىرۋىمەن رەسەي قازاقتارى اراسىندا «دانا اباي – دارا اباي» اتتى ادەبي بەينە-بايقاۋ ءوتتى.
وعان قازاقستان رەسپۋبليكاسى ءبىلىم جانە عىلىم مينيسترلىگىنىڭ عىلىم كوميتەتى, ا.بايتۇرسىنوۆ اتىنداعى ءتىل ءبىلىمى ينستيتۋتى قولداۋ كورسەتتى. بۇل قاناتقاقتى جوباعا قانداستارىمىز رەسەيدىڭ ورىنبور, ساراتوۆ, ومبى, استراحان, التاي, ماسكەۋ, ەكاتەرينبۋرگ, چەليابى, ياروسلاۆل سەكىلدى ءار شالعايىنان قاتىسىپ, اباي ولەڭدەرىن وقىدى. بايقاۋدىڭ شارتى بويىنشا, ولار اباي ولەڭدەرىن بەينە تاسپاعا جازىپ, كوپشىلىككە ۇسىىنپ وتىردى.
«مۇنداي بايقاۋ رەسەي قازاقتارى اراسىندا بۇرىن-سوڭدى بولعان ەمەس. ونىڭ ەكى ەرەكشەلىگىن اتاپ ايتقىم كەلەدى. الدىمەن, ءبىز وركەنيەتتىڭ جەتىستىگىن پايدالاندىق. كەڭ بايتاق رەسەيدىڭ تۇكپىر-تۇكپىرىندە تۇرىپ جاتقان اعايىندار ابايدىڭ ولەڭدەرىن بەينە تاسپاعا جازىپ, جىبەردى. ونى رەسەيلىك جانە ودان تىس جەردەگى قازاقتار ينتەرنەت ارقىلى كورىپ وتىردى. ەكىنشىدەن, قانداستارىمىز جيناقى تۇرىپ جاتقان ورىنبور, ساراتوۆ, ومبى سەكىلدى وبلىستاردان قازاقتار بەلسەنە قاتىستى, اۋىزبىرشىلىك تانىتتى. قازىلار القاسى دا قورىتىندى شىعاراردا تەلەفون بايلانىسى ارقىلى كوپشىلىكتىڭ پىكىرىن ءبىلىپ, ولاردى ەسكەرە وتىرىپ, جەڭىمپازدى انىقتادى» دەيدى ساۋلە سوۆحوزقىزى.
بايقاۋعا قاتىسۋ ءۇشىن جاس ەرەكشەلىگىنە شەكتەۋ بولعان جوق. اعا ۇرپاق وكىلدەرىنەن باستاپ, كىشكەنتاي بالالارعا دەيىن اباي ولەڭدەرىن وقىدى. ءتىپتى وزگە ۇلت وكىلدەرى دە اباي ولەڭىن ايتپاي تۇرا المادى. سونىڭ ىشىندە ياروسلاۆل وبلىسىنداعى پوشەحونە سەلوسىنا قازاقستاننان قونىس اۋدارعان يۋري تكاچەۆسكي دەگەن جىگىت اباي ولەڭىن وقىعاندا ۇلى اقىننىڭ قانداستارىنان اسىپ ءتۇستى.
«بالا كەزىمدە ابايدىڭ ولەڭدەرىن اتام ەرەكشە ۇناتاتىن ەدى. مەن ۇيقىعا جاتاردا اباي ولەڭدەرىمەن كوز ىلەتىن ەدىم» دەپ اقىننىڭ ولەڭدەرىن مۇلتىكسىز وقي جونەلدى. بايقاۋ قورىتىندىسىندا ماسكەۋ قالاسىندا تۇراتىن اقىن جارقىن وتەشەۆا باس بولعان قازىلار القاسى ءيۋريدى ۇزدىك دەپ تانىدى. سونىمەن قاتار ساراتوۆ, ورىنبور, ومبى, سۆەردلوۆ وبلىستارىنان قاتىسقان تالاپكەرلەردىڭ دە ەڭبەگى اتالىپ ءوتتى.
«رەسەي قازاقتارى ءۇشىن بۇل ونەر جارىسىنىڭ ماڭىزى ەرەكشە بولدى. بۇل ءبارىمىزدىڭ جەڭىسىمىز! وسىلاي, ءبىر كىسىنىڭ بالاسىنداي ءار ءىستى بىرگە تىندىرساق, ءبىز المايتىن قامال جوق. باۋىرلارىم, ءبىز مىقتىمىز! ءبىز انا ءتىلىمىزدى سۇيەمىز! وسىلاي العا ۇمتىلا بەرەيىك!» دەپ اقىن اعايىنعا اقجارما قۋانىشىن جازىپ جاتتى. بايقاۋ جۇلدەسىنە تىگىلگەن ورىنبوردىڭ ءتۇبىت ءشالىسى ياروسلاۆل قالاسىنا جول تارتتى. سونىمەن قاتار بەلسەندى قاتىسۋشىلارعا ۇيىمداستىرۋشىلاردىڭ قۇرمەت گراموتاسى دا پوشتا ارقىلى جىبەرىلەتىن بولدى.
ورىنبور وبلىسى قازاقتارىنىڭ كوشباسشىسى ساۋلە تايكەشەۆانىڭ ايتۋىنشا, الداعى ۋاقىتتا بۇل جوبا جالعاسىن تاباتىن بولادى. ەندىگى كەزەك «باتىرلار جىرى» ەپوستارىنا بەرىلەدى. «باتىرلار جىرىنان» ءۇزىندى جاتتاپ, ونى بەينە تاسپاعا جازۋ, ونى كورەرمەنگە ۇسىنۋ ءبىر اي بويى جۇرەدى.
ءنازيرا جارىمبەت,
«ەگەمەن قازاقستان»
قوستاناي