تۇركىستان وبلىسىنىڭ كولىكتىك بايلانىسىن جانە ەلىمىزدىڭ تانىمال تۋريستىك ورىندارىنىڭ بىرىنە جولاۋشىلار تاسىمال ىن جاقسارتۋ ماقساتىندا «جولاۋشىلار تاسىمالى» اق-ى قاڭتاردان باستاپ وڭتۇستىك استانانى تۇركىستان قالاسىمەن بايلانىستىرۋ ءۇشىن جاڭا باعىتتى ىسكە قوسىپ وتىر.
سونداي-اق قاڭتاردا قالا ماڭىنداعى باعىتتار قاتارىن ارتتىرا تۇسكەن «تۇركىستان-شىمكەنت» جۇردەك پويىزى جولعا شىقتى. ياعني ەلباسى تاپسىرمالارى شەڭبەرىندە جاڭا وبلىس ورتالىعىمەن جول-كولىك بايلانىسى جاقسارا تۇسۋدە.
جۇردەك پويىزدىڭ العاشقى ساپارىنا ارنالعان سالتاناتتى راسىمدە تۇركىستان وبلىسى اكىمىنىڭ ءبىرىنشى ورىنباسارى قايرات نۇكەنوۆ پويىز شىمكەنت قالاسىنان قونىس اۋدارىپ, ەڭبەك ەتىپ كەلە جاتقان وبلىستىق باسقارمالار مەن دەپارتامەنتتەر قىزمەتكەرلەرىنىڭ قاتىناۋىن جەڭىلدەتەتىنىن اتاپ ءوتتى. تۇركىستان مەن ءۇشىنشى مەگاپوليس اراسىنداعى بايلانىستى نىعايتىپ, سونداي-اق ءتۋريزمنىڭ دامۋىنا ۇلەس قوساتىنىنا سەنىم ءبىلدىردى. جۇردەك پويىز ازىرگە اپتاسىنا 2 رەت, دۇيسەنبى مەن جۇما كۇندەرى قاتىنايدى. جول ءجۇرۋ ۋاقىتى – 2 ساعات 15 مينۋت. پويىزداعى جالپى ورىن سانى – 175. ۆاگوندار قازىرگى زامانعى جىلىتۋ جانە سالقىنداتۋ جۇيەسىمەن, مۇگەدەكتەرگە ارنالعان كوتەرگىش قۇرىلعىلار جانە ورىندارمەن جابدىقتالعان. جولاقىسى - 609 تەڭگە, جەدەل پويىز ارىس ستانساسىنا عانا توقتايدى.
«قالا ماڭىنداعى تاسىمال» اق-نىڭ باس ديرەكتورى مۇحتاربەك سۇلەيمەنوۆتىڭ ايتۋىنشا, وسى جىلدان باستاپ اپتاسىنا 5 رەت قاتىنايتىن الەۋمەتتىك ماڭىزى بار تۇركىستان–بادام جانە تۇركىستان–سارىاعاش باعىتتارى ىسكە قوسىلىپ وتىر. تۇركىستان–بادام پويىزىنىڭ جول ءجۇرۋ ۋاقىتى 3 ساعات, كومپانيا بۇل باعىتتى شىمكەنت قالاسىنا دەيىن ۇزارتۋدى جوسپارلاۋدا. ال تۇركىستان–سارىاعاش باعىتى جاڭا اكىمشىلىك ورتالىقتى وبلىستىڭ وڭتۇستىك اۋداندارىمەن بايلانىستىرادى.
عالىمجان ەلشىباي,
«ەگەمەن قازاقستان»
تۇركىستان وبلىسى