الماتى جۇرتشىلىعى كورنەكتى مەملەكەت جانە قوعام قايراتكەرى سۇلتان جيەنباەۆتى اقتىق ساپارعا شىعارىپ سالدى. اباي اتىنداعى وپەرا جانە بالەت تەاترىندا جينالعان زيالى قاۋىم وكىلدەرى قايراتكەردىڭ ازاماتتىق تۇلعاسى مەن حالقىنا سىڭىرگەن ەرەن ەڭبەگى جايلى تەبىرەنە ەستەلىك ايتتى.
قارالى جيىندا الماتى قالاسىنىڭ اكىمى باۋىرجان بايبەك مەملەكەت باسشىسىنىڭ جەدەلحاتىن وقىپ, مارقۇمنىڭ تۋىستارىنا الماتىلىقتار اتىنان كوڭىل ايتتى.
«سۇلتان سۇلەيمەن ۇلى مايداندا ەرلىكپەن شايقاسىپ, ەلگە ورالعان سوڭ ءتۇرلى جوعارى لاۋازىمدى قىزمەتتەردى ابىرويمەن اتقارىپ, بىلىكتى باسشى جانە ىسكەر ۇيىمداستىرۋشى رەتىندە رەسپۋبليكامىزدىڭ ءوسىپ-وركەندەۋىنە زور ۇلەس قوستى. ۇزاق جىلدار بويى ساۋدا ءمينيسترى جانە مينيسترلەر كەڭەسى توراعاسىنىڭ ورىنباسارى بولىپ, ءوزى باسشىلىق جاساعان سالالاردىڭ زامان تالابىنا ساي دامۋىنا كوپ ەڭبەك ءسىڭىردى.
ول قۇرمەتتى دەمالىسقا شىققاننان كەيىن دە قوعام ومىرىنەن قول ۇزبەي, تاۋەلسىز ەلىمىزدە حالقىمىزدىڭ ىنتىماعى مەن بەرەكە-بىرلىگىنىڭ نىعايا تۇسۋىنە ءاردايىم اتسالىستى.
ەلى مەن حالقىن سۇيگەن ابزال جاننىڭ ءارى ابىز اقساقالدىڭ ەسىمى مەن ەڭبەگىن قازاقستاندىقتار ۇمىتپايدى دەپ ويلايمىن», – دەلىنگەن جەدەلحاتتا.
سۇلتان جيەنباەۆ 1921 جىلدىڭ 22-شىلدەسىندە الماتى قالاسىندا دۇنيەگە كەلگەن. 1953-54 جىلدار ارالىعىندا قازسسر ساۋدا مينيسترلىگىنىڭ باسقارما باسشىسى, ال 1954 - 1959 ارالىعىندا الماتى قالالىق پارتيا كوميتەتىنىڭ ءبولىم مەڭگەرۋشىسى, 1962-1970 جىلدارى قازسسر ساۋدا ءمينيسترى قىزمەتتەرىن اتقارعان. 1970 - 1984 جىلدار ارالىعىندا جيەنباەۆ مينيسترلەر كەڭەسىنىڭ ورىنباسارى بولدى
سانالى عۇمىرىندا حالقىنا قالتقىسىز قىزمەت ەتكەن زاڭعار تۇلعا قالاداعى «كەڭساي» زيراتىنا جەرلەندى.
ارمان وكتيابر,
«ەگەمەن قازاقستان»