بىرىككەن ۇلتتار ۇيىمىنىڭ شتاب-پاتەرىندە قازاقستاننىڭ بۇۇ جانىنداعى تۇراقتى وكىلدىگى 2019-2020 جىلدارعا بۇۇ قاۋىپسىزدىك كەڭەسىنە سايلانعان ەلدەردىڭ ۇلتتىق تۋلارىن ورناتۋ رەسمي ءراسىمىن وتكىزدى, دەپ حابارلايدى ءسىم ءباسپاسوز قىزمەتى.
ءوز ميسسياسىن اياقتاعان بوليۆيا, قازاقستان, نيدەرلاندى, شۆەتسيا جانە ەفيوپيانىڭ ورنىنا بۇۇ قاۋىپسىزدىك كەڭەسىنىڭ جاڭا تۇراقتى ەمەس مۇشەلەرى رەتىندە بەلگيا, گەرمانيا, دومينيكان رەسپۋبليكاسى, يندونەزيا جانە وڭتۇستىك افريكا كەلدى.
بۇۇ قاۋىپسىزدىك كەڭەسىنە جاڭا تۇراقتى ەمەس مۇشەلەردىڭ قوسىلۋىنىڭ سالتاناتتى ءراسىمى بۇۇ تاريحىندا تۇڭعىش رەت قازاقستاننىڭ باستاماسىمەن 2018 جىلدىڭ قاڭتارىندا ونىڭ بۇۇ قاۋىپسىزدىك كەڭەسىندە توراعالىعى كەزىندە وتكىزىلدى. بۇۇ-عا مۇشە مەملەكەتتەر وسى جاڭا ەنگىزىلىمدى قازاقستاننىڭ «جارقىن جەكە كارتوچكاسى» دەپ اتادى.
بۇرىن قاۋىپسىزدىك كەڭەسىنىڭ زالى الدىنداعى ءباسپاسوز قابىرعاسىنىڭ جانىندا بۇۇ قاۋىپسىزدىك كەڭەسى تۇراقتى ەمەس مۇشەلەرىنىڭ تۋلارىن اۋىستىرۋى تەحنيكالىق ءراسىمى بولدى. جاڭا ءداستۇردى ەنگىزۋىمەن بۇل ءراسىم بۇۇ-عا مۇشە مەملەكەتتەردىڭ جانە الەمنىڭ جەتەكشى بۇقارالىق اقپارات قۇرالدارىنىڭ بىرىككەن ۇلتتار ۇيىمى جانىندا اككرەديتتەلگەن وكىلدەرىنىڭ كەڭىنەن قاتىسۋىمەن رەسمي ءىس-شاراعا اينالدى.