اقتوبەدە العاشقى قىسقى قايىرىمدىلىق بالى ءوتتى. وعان مەتسەناتتىق سالاعا ەرەكشە نازار اۋداراتىن مەملەكەتتىك قىزمەتكەرلەر, كاسىپكەرلەر, ارداگەرلەر, جاستار, قوعامدىق بىرلەستىكتەر مەن قورلاردىڭ وكىلدەرى, بارلىعى 200-دەن اسا ادام قاتىستى.
بالعا كىرۋ ءۇشىن تولەنەتىن قايىرىمدىلىق جارنا قۇنى 10 مىڭ تەڭگە, ياعني ۇيىمداستىرۋشىلار تەك كىرۋ بيلەتتەرىنىڭ وزىنەن مۇقتاج جاندار ءۇشىن 2 ملن تەڭگەدەن استام قاراجات جينادى. بۇدان باسقا, قوعامدىق قايىرىمدىلىق قورى اۋكتسيوننان تۇسكەن 3 ملن تەڭگە مەن ارنايى ورناتىلعان جاشىكتەردە جينالعان قاراجاتتى بەردى.
«پرەزيدەنت جولداۋى, «رۋحاني جاڭعىرۋ» باعدارلاماسى مەن باسقا دا مەملەكەتتىك باعدارلامالار اياسىندا بيىل «باقىتتى بالا», «تۋعان جەرگە تاعزىم», «مەكتەپكە جول», «تۇلەك.kz», «اۋىل قامقورشىسى» جانە ت.ب. سىندى كوپتەگەن قايىرىمدىلىق جوبالار جۇزەگە اسىرىلدى. وسى زالعا جينالعاندار بۇل جوبالاردى ءبىرىنشى بولىپ قولدادى. ناتيجەسىندە وبلىستىڭ 508 مىڭنان اسا تۇرعىنىنا 6,5 ملرد تەڭگەدەي كومەك كورسەتىلدى. تۋعان ولكەسىنىڭ تىنىسىنا ات سالىسىپ, ىقىلاس بىلدىرگەن ارقايسىسىڭىزعا العىس ايتقىم كەلەدى»,- دەدى بەردىبەك ساپارباەۆ العاشقى قىسقى قايىرىمدىلىق بالىنىڭ قاتىسۋشىلارىنا.
ءوڭىر باسشىسى قايىرىمدىلىق ىسىنە ەرەكشە كوڭىل ءبولىپ, الەۋمەتتىك ماڭىزى زور ماسەلەلەردى شەشۋگە جانە اقتوبەلىكتەردىڭ تۇيىتكىلدى ماسەلەلەرىنە بەي-جاي قارامايتىن وبلىستىڭ ۇزدىك مەتسەناتتارىن ماراپاتتادى. اتاپ ايتقاندا, وبلىس اكىمى «رەال گاز ەنەردجي» جشس-ءنىڭ قارجى ديرەكتورى, قالالىق ءماسليحات دەپۋتاتى التىناي مۇحانوۆاعا, «سترويدەتال» جشس باس ديرەكتورى اناتولي سيمونوۆقا, «دارۋ» وڭالتۋ ورتالىعىنىڭ قۇرىلتايشىسى, وبلىستىق ءماسليحات دەپۋتاتى عالىمجان ەلەۋوۆ پەن «گلوبال سپەتسودەجدا» جشس ديرەكتورى نادەجدا شاباەۆاعا «جومارت جۇرەك» مەدالدارىن تابىس ەتتى.
بۇدان وزگە, اقتوبە مەن وبلىستىڭ بارلىق اۋداندارىنىڭ قيىندىققا تاپ بولعان, سونىمەن قاتار ءوتىپ بارا جاتقان جىلى وقۋدا, سپورتتا جانە ونەردە كوزگە تۇسكەن جيىرما ستۋدەنتىنە نوۋتبۋكتەر بەرىلدى.
ايتا كەتەيىك, ءبىرىنشى قىسقى بال سالتاناتتى تۇردە, دەگەنمەن قاراپايىم ءوتتى: ۇيىمداستىرۋشىلار مەيرامحانانىڭ ورنىنا جەكپە-جەك سارايىنىڭ سپورت زالىن, ال مول داستارحاننىڭ ورنىنا جەمىس-جيدەكتەر مەن سالقىن سۋسىندار قويىلعان جەڭىل فۋرشەتتى قۇپ كوردى.
تەمىر قۇسايىن,
«ەگەمەن قازاقستان»