دۇيسەنبى كۇنى ماگنيتوگورسكىدەگى 10 قاباتتى تۇرعىن ۇيدە جارىلىس بولدى. وقيعا ورنىنداعى ۇيىندىلەر استىنان قۇتقارۋشىلار 37 ادامنىڭ دەنەسىن تاپقان, ولاردىڭ التاۋى – بالالار, دەپ حابارلايدى رەسەيدىڭ توتەنشە جاعدايلار مينيسترلىگى.
ىزدەۋ وپەراتسيالارى كەزىندە 5 ادام قۇتقارىلدى, ونىڭ ىشىندە ماسكەۋگە ەمدەۋگە شۇعىل جەتكىزىلگەن 11-ايلىق ءسابي دە بار. دەنساۋلىق ساقتاۋ ءمينيسترى ۆەرونيكا سكۆارتسوۆانىڭ حابارلاۋىنشا, ءسابيدىڭ جاعدايى اۋىر, بىراق ومىرىنە ەشقانداي قاۋىپ ءتونىپ تۇرعان جوق.
اپات ورنىنداعى قۇتقارۋ جۇمىستارى تاۋلىك بويىنا ءالى جالعاسۋدا.
الدىن-الا بەلگىلى بولعان مالىمەتتەر بويىنشا, پودەزدەگى اپاتقا پاتەرلەردىڭ بىرىندەگى تۇرمىستىق گازدىڭ جارىلۋى سەبەپ بولعان. رەسەيدىڭ فەدەرالدىق قاۋىپسىزدىك قىزمەتىنىڭ مالىمدەۋىنشە, جارىلىستىڭ باسقا سەبەپتەرى قاراستىرىلىپ جاتقان جوق.
بۇل قىلمىستىق ءىس «ابايسىزدا ەكى جانە ودان دا كوپ ادامنىڭ ولىمىنە سەبەپكەر بولۋ» بابى بويىنشا قوزعالدى. ول باپ بويىنشا قىلمىسكەر ەكى جىلعا دەيىن باس بوستاندىعىنان ايىرىلادى.
31 جەلتوقسان كۇنى وقيعا ورنىنا رەسەي پرەزيدەنتى ۆلاديمير پۋتين كەلدى. ول قۇتقارۋ وپەراتسياسىنىڭ شتابىندا جينالىس وتكىزىپ, اپاتتىڭ سالدارىن جويۋ بويىنشا ۇكىمەتتىك كوميسسيا قۇرۋدى تاپسىردى. كەيىن ول اۋرۋحاناداعى زارداپ شەككەن تۇرعىنداردىڭ ءحالىن بىلۋگە باردى.
جارىلىس بولعان ءۇي ماگنيتوگورسكىنىڭ وڭ جاعالاۋىنداعى اۋداندا, ياعني باستى داڭعىلداردىڭ ءبىرى – كارل ماركس كوشەسىندە ورنالاسقان.
كەشە چەليابى وبلىسىندا قازا بولعانداردى ازا تۇتۋ كۇنى جاريالاندى.
ايتا كەتەيىك, 2017-2018 جىلدار ىشىندە رەسەيدەگى تۇرعىن ۇيلەردە ادام ولىمىنە اكەلگەن 44 تۇرمىستىق گازدىڭ جارىلۋ وقيعاسى ورىن العان.
قارلىعاش قۇرامىس,
«ەگەمەن قازاقستان»