فيليپپيندە «ۋسمان» قۇيىنىنان پايدا بولعان سۋ تاسقىنى مەن لاي كوشكىنى 85 ادامنىڭ ءومىرىن جالمادى, 40 تۇرعىن جاراقات الدى, دەپ حابارلايدى انادولى اگەنتتىگى.
فيليپپين قاۋىپ-قاتەردى ازايتۋ جانە اپاتتاردى باسقارۋ ۇلتتىق كەڭەسىنە (NDRRMC) سىلتەمە جاساعان جەرگىلىكتى باق-تىڭ مالىمەتىنشە, بيكول جانە شىعىس ۆيساي وڭىرلەرى بىرنەشە كۇن بويى قۇيىن قۇرساۋىندا قالىپ قويعان. 20 ادام ءىز-ءتۇزسىز كەتتى.
بيكول, شىعىس ۆيساي, كالابارسون جانە ميماروپا ايماقتارىندا تۇراتىن 192 مىڭعا جۋىق ادام توتەنشە وقيعادان زارداپ شەكتى. ونىڭ ىشىندە 25 مىڭ تۇرعىن قاۋىپسىز اۋداندارعا كوشىرىلگەن. بيكول ايماعىنا قاراستى وڭتۇستىك كامارينەس پروۆينتسياسىندا توتەنشە جاعداي رەجيمى جاريالانعان.
رەسمي مالىمەتكە سۇيەنسەك, قۇيىن فيليپپين ەلىنىڭ اۋىل شارۋاشىلىعىنا 6 ميلليون دوللار شىعىن اكەلگەن.