جاپونيا وڭتۇستىك كۋريلدى الاتىنىنا ۇمىتتەنەدى, بىراق ول جەردەن رەسەيلىكتەردى كوشىرۋدى كوزدەمەيدى, - دەپ حابارلادى ريا نوۆوستي جاپون پرەمەر-ءمينيسترى سيندزو ابەنىڭ "اساحي" تەلەارناسىنا بەرگەن سۇحباتىنا سىلتەمە جاساپ.
سۇحبات بارىسى جاپونياعا قايتارىلاتىن ارالدارداعى حالىقتىڭ ماسەلەسى توڭىرەگىندە جانە ونىڭ قالاي شەشىلەتىندىگى تۋرالى بولدى.
- سولتۇستىك اۋماقتىڭ بارلىق تۇرعىندارى (جاپوندىقتاردىڭ 4 ارالدان تۇراتىن كۋريل مەكەنى) – رەسەيلىكتەر. كەلىسسوزدەردەگى ءبىزدىڭ ۇستانىم «وتىنەمىن, بۇل جەردەن كەتىڭىزدەر» دەۋمەن عانا شەكتەلمەيدى, - دەيدى پرەمەر.
ابە جاپونيا اۋماعىن بەرۋ جەرگىلىكتى تۇرعىنداردىڭ كەلىسىمىمەن جۇرگىزىلۋى ءتيىس دەپ اتاپ ءوتتى. پرەمەردىڭ پىكىرىنشە, جاپوندىقتار مەن رەسەيلىكتەر بىرگە ءومىر سۇرە الادى جانە جۇمىلىپ, جۇمىس ىستەي الاتىن ەدى.
وسى ايدا ابە رەسەيگە بارادى. بولجامدى كۇن 21 قاڭتار بولۋى مۇمكىن.
جاپون پرەمەرى مەن رەسەي پرەزيدەنتىنىڭ الدىڭعى كەزدەسۋى 14 قاراشادا سينگاپۋردا وتكەن ەدى. سول كەزدە ابە قوس تاراپ 1956 جىلعى بىرلەسكەن كەڭەس-جاپون دەكلاراتسياسى نەگىزىندە بەيبىت كەلىسىم-شارت جاساي وتىرىپ, كەلىسسوز ۇدەرىسىن جەدەلدەتۋگە ۋاعدالاسقانىن جەتكىزگەن بولاتىن.
بۇل دەكلاراتسيادا تاراپتار بەيبىت كەلىسىم-شارت جاساۋعا دايىن ەكەندىكتەرىن ءبىلدىرىپ, كەيىننەن كسرو حابوماي جانە شيكوتان ارالدارىن جاپونياعا بەرۋگە كەلىسكەن-تۇعىن. كسرو مەن جاپونيا اراسىنداعى قۇجات راتيفيكاتسيالاندى, بىراق بەيبىتشىلىكتەرىن نىعايتۋ ءۇشىن توكيو ونى جۇزەگە اسىرۋدان باس تارتتى. سەبەبى, ولار بىردەن ءتورت ارالدىڭ (كۋناشير, يتۋرۋپا, شيكوتان جانە حابوماي) قايتارىلۋىن تالاپ ەتكەن بولاتىن.