قازاقستاننىڭ ۇلتتىق بانكى بيىل دا ەلىمىزدىڭ قارجى جۇيەسىن نىعايتۋ جولىنداعى جۇمىستاردى جالعاستىرادى. ءبىرىنشى قاڭتاردان باستاپ ۇلتتىق بانك وسى بانك سەكتورىندا تاۋەكەلدەرگە بەيىمدەلگەن باقىلاۋ جۇيەسىن ەنگىزدى.
قازىرگى ۋاقىتتا قازاقستاندا 28 كوممەرتسيالىق بانك بار. بىلتىر ولاردىڭ سانى 33 بولاتىن. كەيبىر قارجى ينستيتۋتتارى جۇمىسىن تولىق توقتاتتى. ال ەكى ءىرى بانك بىرىكتى. بيىل ۇلتتىق بانك تاۋەكەل ماسەلەسىنە ەرەكشە كوڭىل بولەتىن بولادى.
«باقىلاۋ پروتسەسى كەزىندە ءبىز قارجى ۇيىمىنىڭ قازاقستاننىڭ زاڭ تالاپتارىن قانشالىقتى ساقتاپ وتىرعانىن تولىق زەرتتەيمىز. بيزنەس-مودەلدەرىنە ساراپتاما جاسايمىز. كورپوراتيۆتى باسقارۋداعى تاۋەكەلدەر باعالانادى. قيىن جاعداي تۋىنداعان كەزدە ونى شەشۋ ءۇشىن كاپيتالدارى جەتكىلىكتى مە؟ بۇل دا باستى نازاردا بولادى. وسىنداي باقىلاۋ تەتىكتەرى ماسەلەنى ۋشىقتىرماي, ەرتە كەزدە رەتتەۋگە مۇمكىندىك بەرەدى», - دەپ حابارلايدى قر ۇب ەدب قاداعالاۋ دەپارتامەنتىنىڭ وكىلى دانيار نۇرمانوۆ.
باسقاشا ايتساق, رەتتەۋشى ەكىنشى دەڭگەيلى بانكتەردىڭ كليەنتتەرى قارىزدارىن وتەي الماعان جاعدايدا بانك ءوز قارجىسى ەسەبىنەن نەسيەنى جابا الا ما, وسى جايىندا دا ساراپتاما جاسايدى.
«مىندەتتەمەلەردى ءماجبۇرلى قايتا قۇرىلىمداۋ قيىندىققا تاپ بولعان نەمەسە مۇلدەم جاعدايى اۋىر تولەم قابىلەتى جوق بانكتەرگە قاتىستى قولدانىلادى. وسى قۇرال ءىرى كرەديتورلار مەن كەپىلدەندىرىلمەگەن دەپوزيتاريلەرگە كاپيتالىن نەمەسە كاپيتالىنىڭ ءبىر بولىگىن قايتارىپ الۋعا جانە بانك ابىرويىن ساقتاپ قالۋعا مۇمكىندىك بەرەدى», - دەدى دانيار نۇرمانوۆ.
سونداي-اق تاۋەكەلدەرگە بەيىمدەلگەن باقىلاۋ جۇيەسى اياسىندا ۇلتتىق بانك زاڭ شەڭبەرىندە قارجى ينستيتۋتتارىنىڭ توپ-مەنەدجمەنتىن تەكسەرۋ قۇقىنا يە بولىپ وتىر.
«ۇلتتىق بانك تۋرالى زاڭدا بۇل مەحانيزمنىڭ ەرەجەلەرى تولىق جازىلعان. ول جاريالى تۇردە جۇرەدى. جانە دە ۋاكىلەتتى ورگاننىڭ شەشىمىنە بايلانىستى شاعىمدانۋعا قارجى ينستيتۋتتارىندا جەتكىلىكتى ۋاقىت بولادى», - دەيدى سپيكەر.
مۇنداي قاداعالاۋ ەكىنشى دەڭگەيلى بانك توپ-مەنەدجەرلەرىنىڭ بۇرىس ءىس-ارەكەتتەرىنىڭ الدىن الۋدا ءتيىمدى. سونىمەن قاتار تاۋەكەلدەردى باسقارۋدى باعالاۋ جانە بانكتەردىڭ ىشكى باقىلاۋ جۇيەسىنىڭ قاعيدالارى وزگەرەدى. ساراپشىلاردىڭ پىكىرىنشە, بۇل تەتىكتەر كەلەڭسىز جايتتەردەن ساقتانۋعا جانە مەملەكەت شىعىنىن ازايتۋعا مۇمكىندىك بەرەدى.