رەسەيدىڭ ماگنيتوگورسك قالاسىنداعى تۇرعىن ۇيدەگى جارىلىستان قازا تاپقانداردىڭ سانى ارتتى. ەكى كۇن ىشىندە قيراندىلاردىڭ استىنان 14 ادامنىڭ دەنەسى تابىلدى. تاعى 30-دان استام تۇرعىننىڭ تاعدىرى ءالى بەلگىسىز.
توتەنشە جاعدايلار مينيسترلىگى «100-دەن استام قۇتقارۋشى تارتىلعانىمەن, قيراندىلاردى ارشۋ جۇمىسى بىرنەشە كۇنگە جالعاسادى» دەپ مالىمدەگەن. اپاتتى جاعدايداعى ءۇيدىڭ قالعان قابىرعالارى قۇلاپ كەتپەس ءۇشىن اۋىر تەحنيكالار قولدانىلىپ جاتقان جوق. ەستەرىڭىزگە سالساق, ماگنيتوگورسكىدە جەلتوقساننىڭ 31-ىندە تاڭعى ساعات 4-ءتىڭ شاماسىندا 9 قاباتتى ۇيدە تۇرمىستىق گاز جارىلدى. سالدارىنان 26 پاتەرلىك تۇتاس ءبىر پودەزد وپىرىلىپ ورتاسىنا ءتۇستى. اتالعان پاتەرلەردە 46 ادام تۇرعان. وسى ءىس بويىنشا تەرگەۋ امالدارى جۇرگىزىلۋدە. الدىن الا بولجامعا سايكەس, تۇرمىستىق گازدى قولدانۋدا ساقتىق ەرەجەسى ورەسكەل بۇزىلعان.