قالادا دا, دالادا دا قار تۇسىسىمەن قىس قىزىعى باستالادى. اسىرەسە اۋىل بالاسىنىڭ اينالدىراتىنى كوبىنە, سىرعاناق قوي. ال قاراسۋ اۋدانىنداعى نوۆوپاۆلوۆ اۋىلىنىڭ بالالارى يتكە شانا جەگىپ, اۋىلدى اينالا سەرۋەندەيدى.
بالالارعا مۇنداي قۋانىشتى وسى اۋىلداعى نوۆوپاۆلوۆ ورتا مەكتەبىنىڭ ديرەكتورى حاميت عابدۋللين سىيلادى. ونىڭ ەكى حاسكي ءيتى بار. سىبىرلىكتەر شاناعا جەگەتىن, تەگى قاسقىردان شىققان, توركىنى امەريكالىق قوس يت بالالاردىڭ كادىمگى شاناسىن تارتقاندا شارشاۋدى بىلمەيدى. يتكە اۋىر بولماس ءۇشىن شاناعا ەكى بالادان مىنەدى.
– بۇل يتتە قاسقىردىڭ قانى بار, اقىلدى, جالپى ادامعا تيىسپەيدى. بالالاردى ويناتقاندا قاۋىپسىز. بىراق مالعا تيەدى. سوندىقتان توردا ۇستايمىز, – دەيدى حاميت ءۋالي ۇلى. – قالىڭ قاردا بالالاردىڭ يت شاناعا ءمىنىپ, يتپەن بىرگە قارعا اۋناپ جاتقانى قاراپ تۇرساڭىز, قانداي عاجاپ كورىنىس! اۋىل بالاسىنىڭ تابيعاتتان الىستاماعانى تاربيە تەتىگى دەپ بىلەمىن.
حاميت ءۋالي ۇلىنىڭ ءوزى دە بالا كەزىنەن يت ۇستاۋعا قۇمار بولعان. حالقىمىزدىڭ جەتى قازىناسىنان ورىن العان ءيتتىڭ ءتۇرلى تۇقىمىن اسىراعان. اۋىل بالاسىنا قاۋىپسىزدىگىن ويلاپ, سوڭعى جىلدارى حاسكيگە توقتاپتى.
– حاسكيدى مەنىڭ تۋعان كۇنىمە تۋىستارىم سىيلاپ ەدى. ءيتتىڭ بۇل تۇقىمى «باباسى» سەكىلدى قوساقتالىپ نەمەسە ۇيىرىمەن جۇرگەندى ۇناتاتىن بولعاندىقتان, ءبىر يت جالعىزسىراماسىن دەپ, ەكىنشىسىن ءوزىم ساتىپ الدىم, دەيدى اۋىل پەداگوگى.
حاميت ءۋالي ۇلى مەكتەپ وقۋشىلارىن تۋعان جەردى تانۋعا تاربيەلەپ كەلەدى. تۋعان ولكەگە جاساعان ەكسپەديتسيالارى بولەك اڭگىمەنىڭ جەلىسى. وبلىستاعى ساناۋلى سكاۋتتاردىڭ بەلسەندىلەرى دە وسى اۋىلدا. ءوزى رەسپۋبليكالىق سكاۋتتار ۇيىمى وبلىستىق فيليالىنىڭ جەتەكشىسى. بالا تاربيەسىن باستى ماسەلە دەپ تۇسىنەتىن ۇستازدىڭ جەكە باستامالارى دا تاۋسىلمايدى. اۋىلداعى بالالار شاناسىن سۇيرەپ جۇرگەن حاسكيلەر سونىڭ ءبىرى عانا.
ءنازيرا جارىمبەت,
«ەگەمەن قازاقستان»
قوستاناي وبلىسى,
قاراسۋ اۋدانى,
نوۆوپاۆلوۆ اۋىلى