جاڭا باسپانا – وتباسىمىز ءۇشىن ۇزاق جىلدار بويى شەشىمىن تاپپاعان ماڭىزدى ماسەلە بولاتىن. ءۇي سالىپ الۋدى قالتا كوتەرە بەرمەيدى, ونىڭ ۇستىنە وتباسىنىڭ باس كوتەرەر ازاماتىنىڭ دەنساۋلىعى جوق بولۋى سەبەپتى, باسپانالى بولۋعا تەك وزگەلەردىڭ كومەگىمەن, جاناشىرلىعىمەن, قولداۋىمەن عانا قول جەتەتىندىگى ءوز-وزىنەن بەلگىلى ەمەس پە؟
سوندىقتان انام بۇدان 20 جىل بۇرىن جەرگىلىكتى اكىمدىكتەن ءۇي سۇراپ ارىزدانىپ قويعان بولاتىن. الايدا مەملەكەت تاراپىنان اۋىلدىق جەرلەرگە ءۇي سالىنباۋى, وزگە دە جاعدايلاردى تىلگە تيەك ەتكەن باسشىلىق باسىن اۋىرتا قويمادى, الدە ماسەلەنى شەشۋگە اسىقپادى...
انام مەكەن ەتكەن ماڭعىستاۋ اۋدانىنا, ونىڭ شەبىر اۋىلىنا وسى جيىرما جىلدىڭ ىشىندە قانشا اكىم اۋىسقان بولسا, انام وسى جىلدار ىشىندە سول اكىمدەرگە بىرنەشە رەت باردى – تالاي ەسىكتى قاعىپ, تالاي تابالدىرىقتى اتتاپ, قانشا ۋاقىت كەزەك كۇتىپ ەسىكتىڭ الدىندا سارىلىپ وتىردى! قانشاما ۋادەنى ارقالاپ ۇمىتپەن ۇيگە ورالدى, قانشا رەت «بولمايدى» دەگەن اۋىر ءسوزدى ەستىپ ەزىلىپ كەلدى...
ءبارىمىزدىڭ دە قولىمىزدان كەلەر قايران جوق, ىشتەي ءمۇجىلىپ جۇرگەن ءبىر كۇنى «وسى «Egemen Qazaqstan» گازەتىنىڭ مەنشىكتى تىلشىسىنە حابارلاسايىنشى, باتىلداۋ ارالاساتىن بولار» دەگەن ويمەن گۇلايىم شىنتەمىرقىزىنا تەلەفون سوقتىم دا ءمان-جايدى ايتىپ, جيىرما جىل بويى جينالعان قۇجاتتاردى تاپسىردىم. ودان ءارى گۇلايىم تىكەلەي اينالىسىپ, اۋدان اكىمى ج.ايتۋاروۆقا حابارلاسىپ, جاعدايدى ءبىلىپ, مەنى قۋانتتى.
بۇل جاڭالىق ءبىزدىڭ وتباسىمىزعا ەسكى جىلدى قورىتىندىلار تۇستا كەلىپ جەتتى. ءبىزدىڭ وتباسىمىز شەبىر اۋىلىنان شاعىنداۋ جاڭا ۇيگە يە بولدى! قۋانىشىمىزدا شەك جوق. انامنىڭ قۋانىشى ءبىر بولەك, ال ءبىز ءۇشىن قۋانعان اعايىن-تۋىس, كورشى-كولەم, اۋىلداستار اق تىلەكتەرىن ارناۋدا. جاڭا جىلدى جاڭا ۇيدە قارسى الۋدى جاقسىلىققا جورىپ وتىرمىز.
بيىل عاسىرلىق مەرەيلى جاسىنىڭ تابالدىرىعىن اتتايتىن, حالقىمىزدىڭ نەبىر مارعاسقا ۇلدارى قىزمەت ەتكەن قاراشاڭىراق گازەت, ەلباسىمىزدىڭ ءوزى «باس گازەت» دەپ اتاعان «Egemen Qazaqstan» گازەتىنە, ونىڭ ماڭعىستاۋ وبلىسىنداعى مەنشىكتى ءتىلشىسى, ءتىلى وتكىر, مىنەزى تۋرا جۋرناليست گۇلايىم شىنتەمىرقىزىنا تۇمانباي ەڭسەگەنوۆ اۋلەتى اتىنان العىسىمىز شەكسىز. ەڭبەكتەرىڭىز جانىپ, ابىرويلارىڭىز ارتا بەرسىن. حالىقتىڭ گازەتى, حالىقتىڭ جاناشىرى ەكەندىكتەرىڭىزدى تاعى ءبىر دالەلدەدىڭىزدەر! جاڭا جىلدارىڭىز قۇتتى بولسىن, ەلدىڭ ىقىلاسىنا بولەنىپ, العىسىن ارقالاپ العا باسا بەرىڭىزدەر, باس گازەت ۇجىمى! سونداي-اق «Egemen Qazaqstan» گازەتى ارقىلى ۇلكەندى قۇرمەتتەپ, اۋىلعا كەلىپ, كىلتتى ءوز قولىمەن تاپسىرعان ماڭعىستاۋ اۋدانىنىڭ اكىمى جارماعانبەت ايتۋاروۆقا, شەبىر اۋىلىنىڭ اكىمدىگىنە, جەرگىلىكتى تەلەارنا ءجۋرناليسى مارجان مەديەۆاعا وتباسىلىق العىسىمىزدى جولداعىم كەلەدى.
نۇرگۇل ەڭسەگەنوۆا
ماڭعىستاۋ وبلىسى,
ماڭعىستاۋ اۋدانى