سونىمەن ۋاقىت ىرعاعىمەن تاعى ءبىر جىلدىڭ تابالدىرىعىنان اتتادىق. «ەسكى ايدا ەسىركە, جاڭا ايدا جارىلقا» دەگەن حالقىمىزدىڭ سەنىمىمەن, جاڭا جىلعا ءبىز دە ۇمىتپەن قارايمىز. قوستانايلىق كورىپكەل ايسۇلۋ جاقانوۆادان دوڭىز جىلى حالقىمىزعا, ەلىمىزگە قالاي بولارىن سۇراعان ەدىك.
– بيىل قىستىڭ شىلدەسى قاتتى بولعالى تۇر. ول اقپان ايىنىڭ باسىنا دەيىن سوزىلادى. ادامدار ساقتانىپ جۇرمەسە, «ايازدا ءۇسىپ كەتىپتى» دەگەن اقپاراتتى جۇرت ءجيى ەستيتىن بولادى. ءومىر بار دا – ءولىم بار, ءولىم-جىتىمنەن ادامزات قۇتىلعان ەمەس. بيىل ايەل ءولىمى جيىلەيتىنىن ايتپاسقا امالىم بولماي وتىر, پەرزەنتحانالاردا انا ءولىمى بولادى. شىعىس قازاقستان, قاراعاندى, قوستاناي وبلىستارى اۋماعىندا ادامداردىڭ جۇيكە اۋرۋى جيىلەيدى. ۆيرۋسپەن تارايتىن اۋرۋدان دا ادامدار ءبىراز زارداپ شەگەدى, اسىرەسە بالالار, – دەيدى ايسۇلۋ.
اماندىقتا دا الدىمەن مالدى, سوسىن جاندى سۇرايتىن حالىقپىز عوي. كورىپكەل دە شارۋا جاعدايىن سۇراتپاي ايتتى.
– ەگەر مەن اۋىلدا تۇرسام, كەلەر جىلى قوي مەن قۇس ۇستار ەدىم. قۇس وتە جاقسى وسەتىن بولادى. سونىمەن قاتار قوي مەن سيىر دا تولىنەن جاقسى كوبەيەدى. بىراق جىلقىدا شىعىن بولادى. ىلعالدىڭ از تۇسەتىنىن كورىپ تۇرمىن. ارينە مۇندايدا اۋىل شارۋاشىلىعىندا وزەكتى ماسەلەلەردىڭ شەشىمىن كۇتەتىنىن جۇرت مەنسىز دە بىلەر. 2019 جىلى كيىككە دە اسا جەڭىل جىل بولمايدى. ايتسە دە كيىكتىڭ ءولىم-ءجىتىمىن بۇرىنعىداي كوكتەمدە ەمەس, جىلدىڭ اياعىندا ەستيتىن بولامىز. ەلىمىز جالپى, تابيعي اپاتتاردان امان بولادى.
– ءيا, ەل ىرگەسى تىنىش بولسا, توتەن اپاتتان امان بولسا, قوي دا وسەر, دالا قىلقۇيرىقسىز قالماس, – دەيمىز ءبىز.
– جالپى, ەلدە مامىراجاي, تىنىش ءومىر ساقتالادى, سونداي ءبىر ىڭعايسىز, اۋىر جاعداي كورىپ تۇرعانىم جوق. كەلەر جىلى جەرگە قاتىستى ماسەلە تاعى دا كوتەرىلەدى. قازىر ادامداردى ءجيى ويلانتاتىن دوللار باعامى تۋرالى ايتسام, ول قۇبىلىپ, ءبىر دەڭگەيدە تۇرمايدى, بىراق 378-379 تەڭگەدەن ءارى اسپايدى. ايلىق جالاقىدا كىدىرىس جوق, بىراق كوتەرىلەتىنى دە كورىنبەيدى. جىلجىمايتىن م ۇلىك قىمباتتايدى.
– تورتكۇل دۇنيەنى الاقانىمىزدان كورىپ وتىرعان زامان عوي. حالىقارالىق جاعداي قالاي بولار ەكەن؟
– الداعى جىلى الپاۋىتتار اراسىنداعى «ەكونوميكالىق سوعىستا» امەريكا مەن باسقا ەلدەردىڭ ءتۇسىنىسۋىن كورىپ تۇرعان جوق, ماسەلە سول كۇيىنشە قالادى. شىعىس ازيا ەلدەرى جاعىندا سۋ كوتەرىلەدى. 2019 – ءوزىمىزدىڭ ەلدە جاقسى ءۇمىت جەتەلەيتىن جىل بولادى.
ءنازيرا جارىمبەت,
«ەگەمەن قازاقستان»
قوستاناي