باتىس قازاقستان وبلىستىق سوتىندا ءوڭىر مەدياتورلارىنىڭ بايقاۋى قورىتىندىلاندى. شاراعا قازاقستان رەسپۋبليكاسى پرەزيدەنتى جانىنداعى «قوعامدىق كەلىسىم» رمم ساراپشىسى تالشىن يتاليەۆا, «مەدياتسيا ورتالىعى» باسشىسى, ترەنەر-مەدياتور ءجاندىلدا جاقىپوۆ قاتىستى.
بايقاۋ ەلىمىزدە قولعا الىنعان «تسيفرلىق قازاقستان» مەملەكەتتىك باعدارلاماسىن ىسكە اسىرۋ, باتىس قازاقستان وبلىسىندا مەدياتسيانى دامىتۋعا باعىتتالعان ايماقتىق جوبالاردى قولداۋ جانە مەدياتسيا ينستيتۋتىن ناسيحاتتاۋ ماقساتىندا ۇيىمداستىرىلدى. بايقاۋ تسيفرلىق مەدياتسيا پورتالىندا تىركەلگەن مەدياتورلار اراسىندا ءوتىپ, وعان 10 مەدياتور قاتىستى.
- بىتىمگەرلىك راسىمدەردى جانە سوتقا دەيىنگى داۋدى شەشۋ ينستيتۋتتارىن ودان ءارى دامىتۋ – سوت جۇمىسىنىڭ باسىم باعىتى, - دەيدى باتىس قازاقستان وبلىستىق سوتىنىڭ توراعاسى بەك امەتوۆ.
بۇگىندە جەرگىلىكتى اكىمدىكتىڭ قولداۋىمەن باتىس قازاقستان وبلىسىنىڭ ەلەكتروندىق تسيفرلىق مەدياتسيا پورتالى www.mzko.kz ىسكە قوسىلدى. «تسيفرلىق قازاقستان» مەملەكەتتىك باعدارلاماسى اياسىندا دۇنيەگە كەلگەن پورتال ايماقتاعى مەدياتسيانى دامىتۋعا ىقپال ەتۋدە. مۇندا مەدياتورعا ونلاين-ءوتىنىم بەرۋ, ونى تىركەۋ جانە مەدياتوردىڭ دەرەكتەرى مەن قابىلداۋ ۋاقىتى كورسەتىلگەن حابارلاما مەن تۇبىرتەك بەرۋ قىزمەتى ۇسىنىلادى.
جىل قورىتىندىسى بويىنشا وڭىردەگى مەدياتورلار ءۇش اتالىم بويىنشا ءوزارا باق سىناستى. «داۋلاردى شەشۋدىڭ ۇزدىك رەيتينگىندە» باتىس قازاقستان وبلىستىق مەدياتورلار وداعىنىڭ توراعاسى الۋا راحيشەۆا ۇزدىك بولسا, «حالىق تاڭداۋى» مەدياتور تۋرالى ەڭ جاقسى پىكىرلەرگە يە بولعان رادا حايرۋشەۆاعا ءتۇستى. باتىس قازاقستان وبلىسى تەرەكتى اۋدانىنىڭ كاسىبي مەدياتورى زاۋرەش شاتيكوۆا «مەدياتورلارعا وتىنىمدەر بويىنشا ۇزدىك رەيتينگى» اتالىمىندا جەڭىمپاز بولدى. ولارعا «Logitex» جشس كومپانياسى اتىنان اقشا سەرتيفيكاتتارى تابىس ەتىلدى. سونداي-اق باعالى سىيلىققا يە بولعاندار قاتارىندا انار ابدۋعاليەۆا مەن ساۋلە مۇقانوۆا سىندى مەدياتورلار دا بار.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان