سەمەيدەگى ەلەكتروتەحنيكالىق كوللەدج تۋرالى اۋىز تولتىرىپ, ماقتان ەتىپ ايتۋعا ابدەن بولادى. كوللەدجدىڭ ديرەكتورى ازات سارپەكوۆ كۇن-ءتۇن دەمەي جاڭا جوبالاردى زەرتتەپ, وتكەننەن قالعان ماڭىزدى دۇنيەلەردى جەتىلدىرە تۇسۋمەن اينالىسىپ كەلە جاتقان تالانتتى باسشىلاردىڭ ءبىرى. جاقىندا وسى وقۋ ورنىنا وبلىس اكىمى دانيال احمەتوۆ كەلگەن كەزدە, ازات سارپەكوۆ ايماق باسشىسىنا شىعىس قازاقستان وبلىسىنىڭ پەداگوگ مۇعالىمدەرى مەن جاستارىن IT-تەحنولوگياسى مەن روبوتوتەحنيكادان وقىتىپ ءارى ۇيرەتىپ, ماماندار دايىنداپ شىعارا الۋ مۇمكىندىگىنە يە ەكەندىگىن ايتقان ەدى. وبلىس باسشىسى بۇنى بىردەن نازارعا الىپ, وسى ماسەلە بويىنشا تەز ارادا اينالىسىڭىز دەپ ورىنباسارى اسەم نۇسۇپوۆاعا تىكەلەي تاپسىرما بەردى.
سەبەبى بيىل شقو مەكتەپتەرىندە IT-تەحنولوگيا جانە روبوتوتەحنيكا بويىنشا 277 كابينەت اشىلدى. بۇل قازاقستان بويىنشا, رەكتوردتىق كورسەتكىش. باسقا وبلىستاردا مۇنداي العا جىلجۋ جوق. دەسەك تە, بۇل سالانى مەڭگەرگەن ينفورماتيكا مۇعالىمدەرىنىڭ ءوزى تاپشى بولىپ وتىر ەكەن. ال بار دەگەن مۇعالىمدەردىڭ ءوزىن قايتا دايارلىقتان وتكىزۋ كەرەك ەكەن. زامان تالابى سولاي. جاقىندا شقو ءبىلىم باسقارماسى, الەۋمەتتىك باعدارلامالار جانە جۇمىسپەن قامتۋدى ۇيلەستىرۋ باسقارماسى مەن ەلەكتروتەحنيكالىق كوللەدج ءۇش جاقتى تۇردە كەلىسىمشارتقا وتىردى. بىرىنشىدەن ءوز ماماندىعىن وزگەرتكىسى كەلەتىندەر اراسىندا, ەكىنشىدەن جۇمىسسىز جۇرگەن جاستار بويىنشا, ۇشىنشىدەن مەكتەپ تۇلەكتەرىنىڭ قالاۋىنا وراي IT-مامانداردى وسىلاردىڭ اراسىنان دايارلاپ شىقپاق.
2018-19 وقۋ جىلىندا «نۇر وتان» پارتياسىنىڭ جوباسى ارقىلى 155 كۋرسانت وسىلايشا IT-تەحنولوگياسى نەگىزدەرىن وقىپ مەڭگەرمەك. دەسەك تە, جوعارىدا ايتقان مۇعالىمدەردى قايتا دايارلاۋ, وقىتۋ ماسەلەسى جەكە باعدارلاما بولۋى قاجەت بوپ تۇر.
- بۇل مەكتەپ وقۋشىلارى ءۇشىن قىزىقتى ءارى اسا قاجەت ءبىلىم بولىپ سانالاتىندىقتان وبلىس اكىمى دانيال احمەتوۆتىڭ تاپسىرماسىمەن «مەنىڭ مەكتەبىم» جوباسى اياسىندا 277 روبوتوتەحنيكا سىنىپتارىن جابدىقتاۋعا دەمەۋشىلەردى دە شاقىرىپ وتىرمىز,-دەدى «نۇر وتان» پارتياسىنىڭ سەمەي فيليالى توراعاسىنىڭ ورىنباسارى زۋلفيا جامالتدينوۆا.
نارىق زامانى, جۇمىسسىزدىق دەيمىز. دەسەك تە, ءىت-ماماندار جوق ەكەندىگى بەلگىلى بولىپ وتىر. سوندىقتان دا «نۇر وتان» پارتياسىنىڭ ۇسىنىسىمەن سەمەي جانە وسكەمەن قالالارىنداعى ەكى كوللەدجدە وسى جۇمىستى جۇرگىزۋ ماسەلەسى قازىردە نازارعا الىنىپ جاتىر.
ەكى كوللەدجدىڭ ءبىرى سەمەي قالاسىنداعى وسى ەلەكتروتەحنيكالىق كوللەدجدە حالىقارالىق رەسۋرستىق ورتالىق جۇمىس ىستەيدى. بۇل سوناۋ 2013 جىلدان بەرى ىسكە قوسىلىپتى. بۇل جەردە تەحنيكالىق ماماندىقتارعا باۋلىپ, جۇمىسسىز جۇرگەندەردىڭ ەكى قولىنا ءبىر كۇرەك تاۋىپ بەرۋگە تىرىسادى. ماڭىزى زور ورتالىق. ەلەكتروتەحنيكالىق كوللەدجدىڭ ديرەكتورى ازات سارپەكوۆتىڭ پىكىرىنشە, رەسۋرستىق ورتالىق جىلىنا 70 ملن. تەڭگە پايدا تابا الادى.
وبلىستان كەلگەن جۇمىس توبىنا رەسۋرستىق ورتالىقتىڭ مۇمكىندىگىن تانىستىرىپ, ارالاتقان ازات سارپەكوۆتىڭ ايتۋىنشا, ارنايى شەبەرحانالارى زاماناۋي قۇرال-جابدىقتارمەن جانە كابينەتتەرمەن قامتىلعان. كۋرسانتتار تەك قانا دانەكەرلەرۋدىڭ التى ءتۇرىن يگەرۋلەرى شارت.
سەبەبى جۇمىسشىلارعا قويىلاتىن زامان تالابى وتە قاتال. ولار دانەكەرلەپ قانا قويماي, توكارلىق, سلەسارلىق ستانوكتاردا جۇمىس ىستەپ, تەحنوترونيكا جانە روبوتوتەحنيكامەن دە اينالىسۋلارى كەرەك. ينفورماتيكالىق باعدارلامانى تەرەڭ مەڭگەرۋلەرى دە اسا قاجەت. سوندىقتان دا وسىنداعى رەسۋرستىق ورتالىقتىڭ اياسىنان جاستارعا ارنالعان يننوۆاتسيالىق شىعارماشىلىق ورتالىعى دا اشىلعان.
- ءبىزدىڭ ەڭ ۇلكەن جاستاعى ستۋدەنتىمىز 67 جاستا, ال ەڭ جاسىمىز 15-تە,-دەدى ديرەكتور ازات سارپەكوۆ,-ەشكىمگە بوگەت بولمايمىز. تەحنيكالىق ۇدەرىسكە قىزىعۋشىلىق تانىتۋشىلارعا ەسىگىمىز ءاردايىم اشىق. قازىر مەكتەپتەر 5 كۇندىك وقۋ جۇيەسىنە كوشتى. سەنبى كۇنى بالالاردىڭ قولدارى بوس. سول كۇنى ولار ءبىزدىڭ كوللەدجگە كەلىپ, ءتۇرلى ۇيىرمەلەرگە قاتىسا الادى. ولار تەحنوترونيكا, روبوتوتەحنيكانى مەڭگەرىپ, web-cايتتار اشادى. ماسەلەن, قالتا تەلەفونىنىڭ قورابىن جاساۋدى ارنايى ستانوكتاعى باعدارلاما ارقىلى جۇزەگە اسىرۋعا بولادى. وسىنداي ونەردى مەڭگەرگەن ادام ەشۋاقىتتا جالاقىسىز, جۇمىسسىز وتىرماسى انىق.
ارينە, ەلەكتروتەحنيكالىق كوللەدج قازاقستان پرەزيدەنتىنىڭ رەيتينگىندەگى ۇزدىك ون كوللەدجدىڭ قاتارىنا كىرىپ وتىر. كوللەدجدى ارالاپ كەلۋشىلەردىڭ دە سانى كۇن سايىن ارتا تۇسكەن. سولاردىڭ ءبىرى قر پارلامەنت ءماجىلىسىنىڭ دەپۋتاتى ۆاسيلي ولەينيكوۆ بولدى.
-ءبىز 17 ماماندىققا كاسىپ يەلەرىن دايىندايمىز,-دەدى كوللەدج ديرەكتورى ازات سارپەكوۆ,-ەڭ باستى نەگىزىمىز IT-تەحنولوگيا. ناتيجەلەرىمز دە جوق ەمەس. 2017 جىلى World Skills چەمپيوناتىندا قازاقستانداعى 823 كوللەدج ىشىنەن 1-ءىنشى ورىندى جەڭىپ الدىق. ءسويتىپ ءابۋ-دابيعا الەم چەمپيوناتىنا قاتىستىق. قازىر پەداگوگيكالىق ۇجىمىمىز بىلىمدەرىن جەتىلدىرۋ ءۇشىن تۇركيادا تۇگەلدەي وقىپ جاتىر. كوللەدجىمىزگە 100 ملن تەڭگەنىڭ قۇرال-جابدىعى ساتىلىپ الىندى. بۇل «چپۋ» ستانوكتار, گازبەن دانەكەرلەيتىن ەلەكتر جابدىقتار, پلازمالىق جانە تاعى باسقا زاماناۋي دانەكەرلەۋ تۇرلەرى.
«چپۋ» ستانوكتىڭ كومەگىمەن ستۋدەنتتەر ءتۇرلى اعاش بۇيىمدارىن وڭدەپ جاساپ, شاحمات, ەسىك تاقتايلارى, تەرەزە جاقتاۋلارىن جاساپ شىعارۋدا ەكەن. ءتىپتى جاتاقحاناعا قاجەتتى ەسىك-تەرەزەنى دە وزدەرى جاساپ شىعارعان. وسىنىڭ بارلىعىن ەسەپكە الا كەلە ازات سارپەكوۆ شارۋاشىلىق باسقارۋ قۇقىعىن رەسىمدەگىسى كەلەتىندىگىن ايتادى.
-بىزگە كەلگەن ساپارىندا ءماجىلىس دەپۋتاتى ۆاسيلي ولەينيكوۆكە دە ءوتىنىش جاسادىم,-دەدى ازات سارپەكوۆ,-مەن قازىر شارۋاشىلىعىمدى باسقارىپ, جۇمىسىمدى جۇرگىزۋگە قۇجات تاپسىرىپ قويدىم. بىراق, مەن نە كوللەدج, نە شارۋاشىلىق بولۋىم كەرەك ەكەن. ءبىز تەك 8-سىنىپتان كەيىن بالالاردى وقىتىپ جىبەرە سالاتىن كەڭەس ۇكىمەتى تۇسىنداعى سپتۋ دەڭگەيىنەن ءوتىپ كەتتىك قوي. كەيبىر جەكە كاسىپورىندارعا قاراعاندا, بازارداعى دۇنيەلەرمەن سالىستىرعاندا ءبىزدىڭ شىعارعان ەسىك-تەرەزە, باسقا دا جابدىقتار الدەقايدا ساپالى. بىراق مەملەكەتتىك مەنشىك پەن ءبىلىم تۋرالى زاڭ قايشىلىقتارىنا وراي, كەرەمەت جاساعان دۇنيە, تاۋارلارىمىزدى نارىققا وتكىزە الماي وتىرمىز. مەن شەتەلدە ءبىلىم الدىم. اقش-تا ماسەلەن, مەكتەپتەردىڭ تومەنگى بولىگىندە شىنى سالوندار ورىن تەپكەن. وندا ولاردىڭ ونىمدەرى ساتىلادى. مەن ۆيسكونسين مەكتەبىندە بولدىم. كەرەگىمدى ساتىپ الدىم. ولاردا بۇل زاڭدى. ەشكىم قۋدالامايدى. ال بىزدە جاساعاننىڭ ۇستىنە جاتىرمىز, جاساپ جاتىرمىز, وتكىزەتىن جەر جوق.
ايتا كەتۋ كەرەك, ازات سارپەكوۆ قازاقستانداعى ەڭ جاس ديرەكتور. نەبارى 23 جاسىندا وسى ەلەكتروتەحنيكالىق كوللەدجدى باسقارۋدى باستاپ وتىر. وسى كوللەدجدىڭ تۇلەگى, وسىدان ءتورت جىل بۇرىن ەلەكتروتەحنيكالىق كوللەدجدى ءبىتىرىپ شىققان. ازات سارپەكوۆ «100 جاڭا ەسىم» جوباسىنا كىرگەن. ديرەكتوردىڭ وتىنىشە قۇلاس اسىپ, ولاردىڭ ءونىمىن وتكىزۋگە جىنە وسىنداي باعىت العان كوللەدج, وقۋ ورىندارىنىڭ جاڭاشىل باستامالارىنا قولداۋ كورسەتۋ قاجەتتىگى ايتپاسا دا تۇسىنىكتى.
راۋشان قابجانقىزى,
سەمەي