قوستاناي وبلىسىنىڭ اكىمى جەڭىمپازدارعا «تريۋمف» سىيلىعىن تابىستادى

«جاستار ءۇشىن ساپالى ءبىلىم الۋ ەڭ ماڭىزدى ءىس. وتكەن جىلى وبلىس اكىمدىگى 200 وقۋ گرانتىن ءبولدى جانە الداعى ۋاقىتتا 5 جاتاقحانا سالىناتىن بولادى. ونىڭ ەكەۋى 2019 جىلى تاپسىرىلادى. «تسيفرلى قازاقستان» باعدارلاماسى اياسىندا وبلىستا ءىت ليتسەي اشىلدى. وعان 200 ميلليون تەڭگە قارجى ءبولىندى. وبلىستاعى مەكتەپتەردى كەڭ جولاقتى ينتەرنەتپەن قامتاماسىز ەتۋ ءىسى جالعاسىپ جاتىر. بۇگىندە 504 مەكتەپتىڭ 426-دا, ياعني 84 پروتسەنتىندە كەڭ جولاقتى ينتەرنەت بار. 312 مەكتەپ ۆاي-فايمەن جابدىقتالدى. بۇل بارلىق مەكتەپتىڭ 62 پروتسەنتى دەگەن ءسوز. دارىندى وقۋشىلار حالىقارالىق دارەجەدەگى ءبىلىم, شىعارماشىلىق بايقاۋلاردان, سپورت جارىستارىنان جۇلدەلى ورىندار الىپ كەلىپ جاتىر. بۇل ماقتانىش. وسىنداي تابىسقا جەتۋ ءۇشىن وڭىردە جاستارعا ارنالعان بارلىق جاعدايدى جاساي بەرەمىز» دەدى ارحيمەد بەگەجان ۇلى. الداعى جىلدى ەلبيۋاسى جاستار جىلى دەپ جاريالادى. وبلىستا كەلەسى جىلى جاستار سارايى بوي كوتەرەتىنىنەن دە وبلىس اكىمى حاباردار ەتتى.

كەزدەسۋدە ۇزدىك تابىستارىمەن ەلدى سىرتقا تانىستىرىپ جۇرگەن وقۋشىلار دا ءسوز الدى. ايان مولداعاليەۆ سپورتتىق گيمناستيكامەن اينالىسادى. ول قازاقستان چەمپيوناتتارىندا بىرنەشە دۇركىن جەڭىمپاز اتاندى جانە يندونەزيادا وتكەن ازيا جاستار چەمپيوناتىندا قولا مەدالگە يە بولدى.

«مەن قوستانايداعى №15 مەكتەپتىڭ 11 سىنىبىندا وقيمىن. سپورتتىق گيمناستيكامەن 5 جاسىمنان اينالىسامىن. سپورتتىق گيمناستيكا – سپورتتىڭ وليمپيادالىق ءتۇرى. الداعى ۋاقىتتا قيىندىقتارعا توزە وتىرىپ, جاتتىقتىرۋشىلارىممەن تىزە قوسا جۇمىس ىستەپ, بيىكتەردەن كورىنۋدى, وليمپيادالاردا ەلىمنىڭ تۋىن كوتەرۋدى ارماندايمىن» دەيدى ايان.

وبلىس اكىمى حالىقارالىق جارىستاردان جۇلدە الىپ كەلگەن وقۋشىلارعا جانە ولاردىڭ ۇستازدارى مەن جاتتىقتىرۋشىلارىنا «تريۋمف» سىيلىعىنىڭ سەرتيفيكاتتارىن تابىس ەتتى.

ءنازيرا جارىمبەت,

«ەگەمەن قازاقستان»

قوستاناي