قازاقستان ۇلتتىق وليمپيادالىق كوميتەتى جىلدىڭ سپورتتىق وقيعالارىن قورىتىندىلادى, دەپ حابارلايدى olympic.kz.
ۇلتتىق سپورتتىق جۇلدە-2018 ماراپاتتاۋ راسىمىنە تانىمال سپورتشىلار مەن جاس چەمپيوندار, ەل سپورتىنا ەڭبەگى سىڭگەن ارداگەرلەر مەن سپورت سالاسىن باسقاراتىن تۇلعالار جينالدى.
جىل سايىنعى ءداستۇر بويىنشا, جانكۇيەرلەر جۇلدە لاۋرەاتتارىن توعىز اتالىم بويىنشا Olympic.kz سايتىندا داۋىس بەرۋ ارقىلى انىقتادى.
ايتا كەتەلىك, بيىل وتىنىمدەر ۇلتتىق فەدەراتسيالاردان قابىلدانىپ, كەيىن ۇوك سپورت ديرەكتسياسى 2018 جىلعى جۇلدە ۇمىتكەرلەرىنىڭ ءتىزىمىن قۇردى.
2018 جىلعى ۇلتتىق سپورتتىق جۇلدەنىڭ جەڭىمپازدارى:
«قىسقى سپورت تۇرلەرى بويىنشا ۇزدىك سپورتشى» - يۋليا گالىشەۆا
«جازعى سپورت تۇرلەرى بويىنشا ۇزدىك سپورتشى» - دميتري الەكسانين
«قىسقى سپورت تۇرلەرى بويىنشا ۇزدىك باپكەر» - ەلەنا كرۋگلىxينا
«جازعى سپورت تۇرلەرى بويىنشا ۇزدىك باپكەر» -ء اليا يۋسۋپوۆا
«ۇزدىك جاس سپورتشى» - بەكارىس سادۋاقاس
«جىلدىڭ ۇزدىك كومانداسى» - سۋ دوبىنان ەرلەر كومانداسى
«جىل جاڭالىعى» - گلەب برۋسەنسكي جانە ەۆگەني فەدوروۆ
«وليمپيادالىق سپورت تۇرلەرى بويىنشا ۇزدىك فەدەراتسيا» - قر ۇلتتىق سەمسەرلەسۋ فەدەراتسياسى
«ۇزدىك ايماق» - شىمكەنت قالاسى
ارنايى مۇسىنشە بارلىق جەڭىمپازدارعا تابىستالدى. تەك قىسقى ماۋسىمنىڭ باستالۋىنا بايلانىستى, 2018 جىلعى وليمپيادانىڭ قولا جۇلدەگەرى يۋليا گالىشەۆا سالتاناتتى راسىمگە كەلە العان جوق. ول فينليانديانىڭ رۋكا قالاسىندا جارىسقا دايىندالىپ جاتىر. سونداي-اق, گالىشەۆانىڭ جاتتىقتىرۋشىسى, فريستايل-موگۋلدان باس باپكەر ەلەنا كرگۋلىحينا دا سالتاناتتى شاراعا قاتىسا المادى.
جەڭىمپازدارعا جۇلدە تابىستاعاندار قاتارىندا بەيبىت زاماننىڭ باتىرلارى دا بولدى. اتاپ ايتار بولساق, مەكتەپكە دەيىنگى جانە ورتا ءبىلىم بەرۋ جۇيەسى بويىنشا 2018 جىلدىڭ ۇزدىك مۇعالىمى تەردىكباي كۇشاي, قازاقستاندىق ۆۋندەركيند, نازارباەۆ زياتكەرلىك مەكتەبىنىڭ 12-ءشى سىنىپ وقۋشىسى اقنازار قاجىمۇرات جانە جاس دارىن, ۆيرتۋوز, كومپوزيتورلار مەن زاماناۋي ءان ورىنداۋشىلارى حالىقارالىق اكادەمياسىنىڭ ەڭ جاس قاتىسۋشىسى, 13 جاسىندا ستۋدەنت, 17 جاستا ماگيسترانت اتانىپ, 18 جاسىندا ماگيسترلىك ديسسەرتاتسيانى ءساتتى قورعاعان راحات-بي ابدىساعيندەر جۇلدە تابىستادى.
ەلىمىزدىڭ تانىمال ءارى داڭقتى سپورتشىلارى مەن قايراتكەرلەرى دە نازاردان تىس قالعان جوق. سەرىك قوناقباەۆ, يۆان گارانين, ءامين تۇياقوۆ, ولگا شيشيگينا, الەكساندر ۆينوكۋروۆ, سەرىك ساپيەۆتەر دە جۇلدەنىڭ قۇرمەتتى قوناعى اتاندى. سونداي-اق, مادەنيەت جانە سپورت ءمينيسترى ارىستانبەك مۇحامەدي ۇلى, اقپارات جانە كوممۋنيكاتسيالار ءمينيسترى داۋرەن اباەۆ جانە قازاقستان ۇوك سپورتتاعى ايەلدەر جونىندەگى كوميسسياسىنىڭ باسشىسى ءۇمىت شاياحمەتوۆا, وڭتۇستىك كورەيانىڭ قازاقستانداعى ەلشىسى كيم دەسيكتەر لاۋرەاتتارعا كوپتەن كۇتكەن جۇلدەنى تابىس ەتتى.
ۇلتتىق سپورتتىق جۇلدەنى تابىستاۋ سالتاناتىنىڭ تەلەنۇسقاسى 9 جانە 31 جەلتوقسان كۇندەرى تيىسىنشە «Qazaqstan» جانە «Qazsport» ارنالارىنان كورسەتىلەدى.