قازاقستانداعى قىتاي حالىق رەسپۋبليكاسى ەلشىلىگى قازاقستان رەسپۋبليكاسى ۇلتتىق مۋزەيىمەن بىرلەسىپ ۇيىمداستىرعان «تاڭعاجايىپ قىتاي – كورىكتى سينتسزيان» اتتى فوتو كورمەسى سالتاناتتى تۇردە اشىلدى.
كورمەنىڭ اشىلۋ سالتاناتىندا ءسوز العان قر ۇلتتىق مۋزەيى ديرەكتورىنىڭ ورىنباسارى اباي ساتۋبالدين: «بۇعان دەيىن اتالعان كورمەنىڭ ءتۇرلى توپتامالار جيناعىن كوپشىلىك نازارىنا ۇسىنعان بولاتىنبىز. كورىكتى سينتسزيان تۋرالى بۇل كورمە توپتامانىڭ التىنشى ءبولىمى بولىپ تابىلادى. سينتسزيان قىتايدىڭ ەڭ ۇلكەن ايماعى. تارتىمدى, ايماقتىڭ كەلبەتى كوركەم, تابيعي رەسۋرستارعا باي ءوڭىر. بۇگىنگى كورمەدەن سينتسزياننىڭ دامۋ جولىن, ءتۇرلى جەتىستىكتەرىن تاماشالاۋعا بولادى», - دەدى.
قىتاي مەن قازاقستان حالىقتارى اراسىنداعى بايلانىستى ودان ءارى نىعايتۋ ماقساتىندا قازاقستانداعى قىتاي ەلشىلىگى قازاقستان رەسپۋبليكاسى ۇلتتىق مۋزەيىمەن بىرلەسىپ «تاڭعاجايىپ قىتاي» فوتوكورمەلەر توپتاماسىن وتكىزگەن بولاتىن. بۇل شارا اتالعان توپتامانىڭ التىنشى ءبولىمى.
قىتايدىڭ قازاقستانداعى توتەنشە جانە وكىلەتتى ەلشىسى چجان ساو: «بۇل كورمە «تاڭعاجايىپ قىتاي» كورمەلەر توپتاماسىنىڭ قورىتىندى ءبولىمى. ءار كورمە قىتايدىڭ ءتۇرلى ايماقتارىنا ارنالعان بولاتىن. سينتسزيان قازاقستانعا جاقىن ورنالاسقان. بۇل ايماق ەكى ەل اراسىنداعى ساياسي-ەكونوميكالىق قارىم-قاتىناس بارىسىندا ماڭىزدى ءرول اتقارادى. كورمەگە ۇسىنىلعان فوتوسۋرەتتەردە ايماقتىڭ ءتۇرلى سالاداعى جەتىستىكتەرى مەن ۇلتتىق تاريحي-مادەني مۇرالارى, قورشاعان ورتانى قورعاۋعا بايلانىستى ەرەكشەلىكتەرى بەرىلىپ وتىر», - دەدى.
سينتسزيان – قىتايدىڭ ەڭ ۇلكەن ايماعى. بۇل ءوڭىر كەز كەلگەن كىسىنى تاماشا تابيعاتىمەن تارتا تۇسەدى. كورمەگە سينتسزيان ايماعىنىڭ جەتكەن جەتىستىكتەرىن كورسەتەتىن 100 فوتوسۋرەت ۇسىنىلىپ وتىر.
كورمە 2018 جىلعا 31 جەلتوقسانعا دەيىن جالعاسادى.
باعاشار تۇرسىنباي ۇلى,
«ەگەمەن قازاقستان»