وتكەن اپتادا قازاقستان رەسپۋبليكاسىنىڭ تۇڭعىش پرەزيدەنتى كۇنىن مەرەكەلەۋگە جانە وزبەكستاننىڭ قازاقستانداعى جىلىنا ارنالعان قازاقستان حالقى اسسامبلەياسىنىڭ «قازاقستانعا ىستىق ىقىلاسپەن!» اتتى مەرەكەلىك كونتسەرت ءوتتى.
تۋىسقان ەكى ەل اراسىنداعى تامىرى تەرەڭ رۋحاني دوستىقتى تۋ ەتكەن ايتۋلى شاراعا قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى ل.پروكوپەنكو, پارلامەنت ءماجىلىسىنىڭ دەپۋتاتتارى, قحا مۇشەلەرى, مەملەكەتتىك ورگاندار, ديپلوماتيالىق كورپۋس, ەتنومادەني بىرلەستىكتەردىڭ وكىلدەرى, قوعام جانە مادەنيەت قايراتكەرلەرى قاتىستى.
مەرەكەلىك باعدارلامادا تۇركىستان وبلىسى, سايرام اۋدانى وبلىستىق وزبەك دراما تەاترى ۇجىمى ل.سولوۆەۆتىڭ «قوجاناسىر سايرامدا» مۋزىكالىق كومەدياسىنان ءۇزىندى ويناسا, بەلگىلى ەسترادا ءانشىسى الىشەر كارىموۆ باستاعان ءبىر توپ ونەرپاز كورەرمەندى وزبەك مادەنيەتىنىڭ قىر-سىرىمەن تانىستىرىپ, ءان مەن بيدەن شاشۋ شاشتى.
وزبەكستاننىڭ قازاقستانداعى جىلى – باۋىرلاس ەكى ەلدىڭ ساياسي, ەكونوميكالىق, مادەني-رۋحاني قارىم-قاتىناسىنىڭ دامىپ, نىعايا تۇسۋىنە جاڭا سەرپىن بەرگەن ەلەۋلى وقيعالاردىڭ ءبىرى. بۇل جونىندە مەملەكەت باسشىسى نۇرسۇلتان نازارباەۆ: «وزبەك حالقى – ءبىزدىڭ جاقىن كورشىمىز. ورتالىق ازياداعى ۇلكەن مەملەكەتتەردىڭ ءبىرى. سوندىقتان دا وزبەكستانمەن بايلانىس ءبىز ءۇشىن قاشاندا ماڭىزدى» دەپ قوس مەملەكەت اراسىنداعى ساياسي-ەكونوميكالىق ءھام رۋحاني دوستىق بايلانىستىڭ ماڭىزدىلىعىنا ايرىقشا توقتالىپ وتكەن بولاتىن.
وسىعان وراي, 2018 جىلدىڭ ماۋسىم ايىندا قازاقستان حالقى اسسامبلەياسى مەن وزبەكستان رەسپۋبليكاسى مينيسترلەر كابينەتىنىڭ جانىنداعى ەتنوسارالىق قاتىناستار جانە شەتەلدەرمەن دوستىق قارىم-قاتىناس جونىندەگى كوميتەتى اراسىندا مەموراندۋمعا قول قويىلىپ, جارقىن ىستەر جۇزەگە اسىرىلا باستادى. وزبەكستاننىڭ قازاقستانداعى جىلىن ابىرويمەن ەڭسەرگەن باۋىرلاس اعايىن 2019 جىلى قازاقستان مادەنيەتىن ءوز ەلدەرىندە كەڭىنەن ناسيحاتتايتىن بولادى.
نازەركە جۇماباي,
«ەگەمەن قازاقستان»