وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىندا جۇمىسسىز جانە جۇمىسپەن ءىشىنارا عانا قامتىلعان ادامداردى جۇمىسقا تارتۋدىڭ كەشەندى جوسپارى قولعا الىنۋدا.
قارەكەتسىز قاراپ ءجۇرۋ كىمگە بولسىن جاراسپايدى. مۇندايدا بۇرىنعىلاردىڭ «قولىڭ قيمىلداسا, اۋزىڭ دا قيمىلدايدى» دەيتۇعىن ءتامسىلىن ەستەن شىعارماعان دۇرىس. مەملەكەت جۇمىسسىز جۇرگەندەردىڭ بار جايىن ويلاستىرۋدا. ماسەلەن, جوسپاردا كاسىبي وقىتۋ جانە نەسيە بەرۋ ماسەلەلەرىنە ايرىقشا كوڭىل اۋدارىلىپ وتىر.
– وبلىستا بارلىعى 22 مىڭنان استام ادام قامتىلىپ وتىر,–دەيدى وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ باسشىسى دينا احمەتجانوۆا,–ماسەلەن «بيزنەس-باستاۋ» نەگىزدەرى بويىنشا ءبىلىم العان 422 ادام ءجۇز ايلىق ەسەپتىك كورسەتكىش كولەمىندە مەملەكەت تاراپىنان قاراستىرىلعان قايتارىمسىز نەسيەگە قول جەتكىزدى.
سوڭعى جىلدارى بۇعان دەيىن جۇمىسسىز جۇرگەن ادامداردى جۇمىسقا ورنالاستىرۋ بارىسىندا ايتارلىقتاي جەتىستىك بار. وورتاق ىسكە ەلەكتروندى ەڭبەك بيرجاسى دا ات سالىسۋدا. بيرجا بازاسى مەملەكەتتىك جانە جەكەمەنشىك جۇمىس ورىندارىنىڭ تولىق اقپاراتىن, جۇمىس بەرۋشىلەردىڭ انىقتامالارىن جانە بوس تۇرعان جۇمىس ورىندارىنىڭ باسىن بىرىكتىرىپ, ءبىر ارنادا توعىتىپ وتىرعان سەپتىگى مول ەلەكتروندىق الاڭ. قازىر بۇرىنعىداي تابانىڭنان تاۋسىلىپ, جىگەرىڭ قۇم بولىپ ىزدەپ جۇرمەيسىڭ. ىنتاڭ بولسا, بوس تۇرعان جۇمىس ورىندارى قولمەن قويعانداي كورسەتىلىپ تۇر. ايتپاقشى, جىل باسىنان بەرى ەلەكتروندى ەڭبەك بيرجاسى ارقىلى 14 مىڭنان استام ادامنىڭ جۇمىسقا ورنالاسقاندىعىن ايتساق, تيىمدىلىگى تايعا تاڭبا باسقانداي كورىنەدى ەمەس پە.
باعدارلامانىڭ ءبىرىنشى باعىتىن جۇزەگە اسىرۋعا ءبىر ميللياردقا جۋىق قاراجات قاراستىرىلىپ وتىر. ءوز ءىسىن باستايمىن دەگەندەرگە دە وڭتايلى-اق. شاعىن جانە ورتا بيزنەسكە نەسيە بەرۋ باعىتىندا 738 ادام قامتىلىپ وتىر. ال, جۇمىسسىز جۇرگەندەردى جاڭا كاسىپكە بەيىمدەۋ ءۇشىن كاسىپتىك وقىتۋ بويىنشا 1500 ادام قامتىلىپ, ءبىلىم العان. بۇل جۇمىستى 25 كاسىپتىك ءبىلىم بەرەتىن كوللەدج اتقارۋدا. مەملەكەتتىك باعدارلامانىڭ ءبىرىنشى باعىتى, ياعني, تەحنيكالىق جانە كاسىبي ءبىلىم بەرۋمەن قامتۋ بويىنشا ءۇش مىڭعا جۋىق ادام 60 ماماندىق جانە 122 بىلىكتىلىك بويىنشا وقىتىلعان.
وسىنداي قامقورلىقتىڭ ارقاسىندا كوپتەگەن ادامدار جاڭا كاسىبىن تاۋىپ, جۇمىسقا ورنالاسىپ جاتقانىن كورگەندە ءۇمىت تە, سەنىم دە ەسەلەنە تۇسەدى ەكەن.
بايقال ءبايادىل,
«ەگەمەن قازاقستان»
اقمولا وبلىسى