پرەزيدەنت كۇنىندە تۋعان پەرزەنتتەردى قۇتتىقتادى

استانا قالاسى اكىمدىگى ءباسپا­سوز قىزمەتىنىڭ حابارلاۋىن­شا, مەرەكە كۇنى اتالعان اۋرۋحانادا 26 نارەستە دۇنيە ەسىگىن اشتى. ياعني 10 ۇل, 16 قىز بالا دۇنيەگە كەلگەن. جالپى, 1 جەلتوقسان كۇنى استانادا 80-نەن اسا ءسابي ومىرگە كەلدى. 

ء«بىز ءۇشىن ەڭ باستىسى, نارەستە­لەر مەن انالاردىڭ دەنساۋ­لىق­تارى­نىڭ مىقتى بولۋى. مەرەكە كۇنى دۇنيەگە كەلگەن جانە كەلەتىن بارلىق سابيگە امان-ساۋ بولۋى­مەن قاتار, ايتۋلى ەل ازاماتى بولىپ وسۋىنە تىلەكتەسپىز», دەدى باقىت سۇلتانوۆ. 

انالاردىڭ كوبى ەكىنشى جانە ءۇشىنشى بالاسىن ومىرگە اكەلسە, ال ديانا ىسقاقوۆا تۇلا بويى تۇڭعىشىنىڭ ءدال وسى كۇنى ومىرگە كەلگەنىنە وتە قۋانىشتى. «بۇگىن وتباسىمىز ءۇشىن ەرەكشە كۇن. كوپتەن كۇتكەن قۋانىشقا كەنەلدىك. ويتكەنى بۇل ءسابيدى 3 جىل بويى كۇتتىك. شىنىمدى ايتسام, بوسانۋىمدى وسى كۇنگە سايكەس كەلەدى دەپ ويلامادىم. مەن ءۇشىن بالانى امان-ساۋ دۇنيەگە اكەلۋ ماڭىزدى بولدى. ەسىمىن ءالى تاڭداعان جوقپىز. ەلبا­سى­نىڭ ەسىمىن بەرەيىك دە­سەك, جولداسىمنىڭ اتى دا نۇرسۇلتان», دەدى جاس انا ديانا ىسقاقوۆا.

انالاردى قۇتتىقتاۋ راسى­مى­­­نەن كەيىن استانا قالالىق قوعام­دىق دەنساۋلىق ساقتاۋ باسقار­­ماسىنىڭ باسشىسى قامالجان نادىروۆ پەن اۋرۋحانا­نىڭ باس دارىگەرى يۆان لي اكىمگە ەكى ەمدەۋ مەكەمەسىنىڭ اراسىنداعى دياگنوستيكالىق ورتالىقتىڭ قابىلداۋ ءبولىمىن اشۋعا قاتىستى جوبانى تانىستىردى. 

«بۇل حالىقارالىق ستاندارت­تار­عا ساي قابىلداۋ ءبولىمىن اشۋ ءۇشىن جاسالىپ جاتىر. اۋا رايى­­نىڭ قو­لاي­سىزدىعىنا قا­را­­ماس­­تان ناۋقاستى ءبىر ەمحانادان ەكىنشىسىنە كەدەرگىسىز تاسى­مال­داۋ­عا ەكى ەمحانا اراسىندا «اۋە» وتپەلى جولى جاسالاتىن بولادى. قازىر بۇل جوبا ازىرلەنۋ ۇستىندە», دەدى قامالجان نادىروۆ.

باس دارىگەر يۆان ءليدىڭ اي­تۋىنشا, كوپبەيىندى اۋرۋحانا مەن پەرزەنتحانانى بىرىكتىرگەننەن كەيىن سوڭعى ەكى اي ىشىندە كۇردەلى پاتولوگياسى بار 20 شاقتى ايەل ەمدەلگەن.

ايتا كەتۋ كەرەك, وسى جىلدىڭ كۇزىندە № 2 قالالىق كوپبەيىندى اۋرۋحانا № 1 پەريناتالدى ورتا­لىق­­پەن بىرىكتىرىلگەن بولا­تىن. جىل سايىن اتالعان ورتالىقتا 12 مىڭنان اسا ءسابي دۇنيەگە كەلەدى.

اقمارال اعزامقىزى,

«ەگەمەن قازاقستان»