الماتىداعى مەملەكەتتىك ورتالىق مۋزەيى مىڭ بوياۋلى شاھارداعى «KS – production» پروديۋسەرلىك ورتالىعى جانە «قايىرىمدى ىستەر ولكەسى» قازاقستان مۇگەدەكتەرى قايىرىمدىلىق قوعامدىق قورىمەن بىرلەسىپ مۇمكىندىكتەرى شەكتەۋلى بالالاردىڭ «باقىتىما سەنەمىن» اتتى كورمەسىن اشتى.
تاياۋدا عانا بولعان ازاماتتىق فورۋمدا مەملەكەت باسشىسى «رۋحاني جاڭعىرۋ» باعدارلاماسىن ودان ءارى جۇزەگە اسىرىپ, « ۇلى دالانىڭ جەتى قىرى» اتتى گازەتىمىزدە جارىق كورگەن ماقالاسىندا بەلگىلەنگەن باسىمدىقتار اياسىندا جۇمىستاردى باستاۋدىڭ ماڭىزدىلىعىن اتاپ وتكەن بولاتىن. ۇكىمەتتىك ەمەس ۇيىمداردىڭ اتسالىسۋىمەن مۇمكىندىگى شەكتەۋلى ادامدار, ەرەكشە مۇقتاج بالالار مەن جاستار ءۇشىن اسا بەلسەندى ورتانىڭ قالىپتاسۋى جاقسى ءۇردىس سانالادى,- دەگەن ەدى ەلباسى ءوز سوزىندە.
شارا ماقساتى دا مۇقتاج جانداردىڭ قوردالانعان ماسەلەلەرىنە حالىق نازارىن اۋدارتۋ, ولارعا الەۋمەتتىك, پسيحولوگيالىق جانە مەديتسينالىق كومەك كورسەتۋ دەڭگەيىن ارتتىرۋ جانە قوعامدا جالپى قابىلدانعان ستەرەوتيپتەردى بۇزۋ, مۇمكىندىگى شەكتەۋلى بالالار دا ءوز تالابى مەن مۇمكىندىكتەرى بار بالالار ەكەنىن كورسەتۋ. فيزيكالىق دامۋ ەرەكشەلىكتەرىنە قاراماستان, ولار تالانتتى جانە كرەاتيۆتى, سپورتتا جانە شىعارماشىلىقتا وزدەرىن تولىق كورسەتە الادى, ءتىپتى كەيدە ءوز قاتارلاستارىن باسىپ وزادى دا. بالالار كەستە تىگەدى, سۋرەت سالادى, توقىما توقيدى, مۇسىندەر جاسايدى بۇل ءوز كەزەگىندە ءوزىن-ءوزى جەتىلدىرۋدىڭ ەشبىر شەگىنىڭ جوقتىعىن دالەلدەيدى: «مۇمكىندىكتەر – شەكتەۋلى, قابىلەت - شەكسىز». اكتسيا وسى بالالارعا اياۋشىلىق ءبىلدىرۋ ماقساتىندا ەمەس, كەرىسىنشە ولاردىڭ دا قوعامنىڭ ءبىر مۇشەلەرى ەكەنىن ەسكە سالۋدى ويلاندىرعانداي بولعان ادەمى كەش بولدى,سونداي-اق, مۇمكىندىگى شەكتەۋلى ادامدارعا الەۋمەتتىك قورعاۋ مەن كومەك قولى قاجەت ەكەندىگىن دە ۇمىتپاعان ءجون ەكەنىن سەزىندىرگەندەي اسەردە قالدىردى. اتالمىش شارا مۇمكىندىگى شەكتەۋلى بالالاردى قالىپتى ومىرگە بەيىمدەۋگە باعىتتالدى, نەگىزگى توپ رەتىندە الماتى قالاسىنداعى ءتۇرلى سىرقاتتى 80 مۇگەدەك بالا شاقىرىلدى.
بۇل ءىس-شارا اياسىندا قىزىقتى كونتسەرتتىك باعدارلامادا: جاننا ورىنباساروۆا, ايجان نۇرماعامبەتوۆا, ءجاميلا سەركەباەۆا, ۆەنەرا نيگماتۋلينا, انتون ميتنەۆ, نينا جمەرەنەتسكايا, پارۆيز نازاروۆ, ايدا ايۋپوۆالار ءان ورىنداپ, مۋزەي بويىنشا ەكسكۋرسيا, سىيلىقتار تاپسىرۋ, سونداي-اق اكتسيا قاتىسۋشىلارى مەن شاقىرىلعان بالالاردىڭ قولدان جاسالعان بۇيىمدارى كورمەسى وتكىزىلدى.
كورمەدە 10-16 جاس ارالىعىنداعى بالالاردىڭ ءارتۇرلى تەحنيكادا ورىندالعان: اعاشتى ويۋ, مۇسىندەۋ, كەستە تىگۋ, بيسەرمەن جانە ىلمەك بىزبەن توقۋ, داندەردەن اپپليكاتسيا جانە باسقا دا تاڭعاجايىپ جۇمىستارى ۇسىنىلدى. ءار بالانىڭ كورمەگە اتسالىسا قاتىسۋى ونىڭ مۇمكىندىكتەرىن اشۋعا كومەكتەستى دەپ ويلايمىز. تانىمال انشىلەر كونتسەرتىنەن كەيىن ءبىر كوڭىلدەنگەن ءبۇلدىرشىن بالالار وزدەرىنىڭ باقىتتى بولاشاعىنا ۇلكەن سەنىممەن قايتتى.
ساپارباي پارمانقۇل,
«ەگەمەن قازاقستان»
الماتى