ءوزىمىزدىڭ قازاقتاردىڭ شەت مەملەكەتتەردە ءبىلىم الۋى بۇگىندە جوعارى دەڭگەيدە. ال قازاق جەرىنە كەلىپ, ءبىلىم الىپ جۇرگەن ازاماتتاردىڭ بىزگە ءالى دە ءبىر جاعىنان قىزىق, ءبىر جاعىنان تاڭسىق كورىنەتىنى راس.
ءبىر جاعىنان ءوزىمىز وزگەلەردەن ۇيرەنىپ قويماي, وزگەلەرگە ۇيرەتۋدى دە قولعا العانىمىزعا قۋاناسىڭ. تاراز قالاسىندا نەگىزىنەن قازاق كوپ. ەلىمىزدەگى ءىرى مەگاپوليس بولماعاندىقتان, بۇل وڭىردەن كوپ جاعدايدا وزگە ۇلتتىڭ وكىلدەرىن ءجيى كەزدەستىرە قويۋ قيىن. بۇگىندە كونە شاھار كوشەلەرىنەن تۇرىكمەن ازاماتتارىن كوپتەپ كەزدەستىرۋگە بولادى. سۇراستىرا كەلىپ, جاقسى ءبىر جايدى اڭعاردىق.
بۇگىندە تاراز مەملەكەتتىك پەداگوگيكالىق ۋنيۆەرسيتەتىندە 700 تۇرىكمەن ازاماتى ءبىلىم الىپ ءجۇر ەكەن. اتالعان ۋنيۆەرسيتەت رەكتورى ەرجان امىربەك ۇلىنىڭ ايتۋىنشا, جوعارى وقۋ ورنىنىڭ وقىتۋشىلارى وزبەكستان, قىرعىزستان, تۇرىكمەنستان مەملەكەتتەرىندە بولىپ, ەلىمىزدەگى ءبىلىم بەرۋ ساپاسىمەن تانىستىرعان. ناتيجەسىندە 700 تۇرىكمەن ازاماتى تاراز قالاسىنا كەلىپ, ءبىلىم الۋعا نيەت بىلدىرگەن. ءبىر قۋانىشتىسى, بۇل ازاماتتاردىڭ باسىم بولىگى قازاق تىلىندە وقيدى. ارالارىندا قازاق ءتىلىن جەتىك بىلەتىن تۇرىكمەندەر دە بار. ال قالعان بولىگى اعىلشىن جانە ورىس تىلدەرىندە ءبىلىم الۋدا.
بۇل ازاماتتاردىڭ ءبارى دە بۇگىندە ءوز ەسەبىنەن پاتەر جالداپ تۇرادى. ولاردىڭ قازاق ءتىلىن ۇيرەنۋگە دەگەن قۇلشىنىسى دا جاقسى. شەتەلدىك ازاماتتار قازاق جەرىندە وزدەرىن ءاردايىم قاۋىپسىز سەزىنەتىندەرىن ايتادى. سونىمەن قاتار جەرگىلىكتى پوليتسيا قىزمەتكەرلەرى دە تۇرىكمەن ازاماتتارىنىڭ قاۋىپسىزدىگىن ءجىتى قاداعالايدى. قازاقستان جانە تۇرىكمەنستان اراسىنداعى بايلانىس بۇگىندە جاقسى دامىپ كەلەدى. وسى ورايدا اتالعان جوعارى وقۋ ورنى كەلەسى جىلى تارازدا ءبىلىم الۋعا قۇشتار تۇرىكمەن جاستارىنىڭ سانىن 1500-گە جەتكىزۋدى جوسپارلاپ وتىر.
حاميت ەسامان,
«ەگەمەن قازاقستان»
جامبىل وبلىسى