جاقىندا عانا باتىس قازاقستان وبلىسىنداعى «اقسايگازسەرۆيس», «كۆانت», «اياز» سەكىلدى ءىرى كاسىپورىندار ەلباسى جولداۋىندا ايتىلعان «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» ۇسىنىسىنا قولداۋ كورسەتىپ, تومەن جالاقى الاتىن قىزمەتكەرلەرىنىڭ جالاقىسىن وسىرگەنى تۋرالى جازعان ەدىك. ارىپتەستەرىنىڭ بۇل باستاماسىنا تاعى دا 50-دەن استام كاسىپورىن ءۇن قوستى.
قىزمەتكەرلەرىنىڭ جالاقىسىن وسىرۋگە ۋادە بەرىپ وتىرعان باتىسقازاقستاندىق كومپانيالاردىڭ 30-ى – ءوندىرىس سالاسىندا, 11-ءى – اۋىلشارۋاشىلىعى سەكتورىندا, ال تاعى 10 فيرما تۇرعىنۇي-كوممۋنالدىق شارۋاشىلىق جانە قۇرىلىس باعىتىندا قىزمەت ەتىپ جۇرگەن ۇجىمدار ەكەن.
«كاراۆاننىي پۋت» قۇرىلىس كومپانياسىنىڭ ديرەكتورى زامير يحسانوۆ ەلباسى ۇندەۋىن العاشقىلاردىڭ ءبىرى بولىپ قولداپ, قىزمەتكەرلەرىنىڭ ايلىق ەڭبەكاقى مولشەرىن ءوسىرىپ ۇلگەرگەنىن ايتادى.
- ءبىزدىڭ كومپانيا مەملەكەت باسشىسىنىڭ باستاماسىن تولىق قولداپ وتىر. ءبىز ءاردايىم ءوز قىزمەتكەرلەرىمىزدىڭ الەۋمەتتىك جاعدايىنا كوڭىل ءبولىپ وتىرامىز. جولداۋدان كەيىن كومپانيادا قىزمەت ەتەتىن بۇكىل ۇجىمنىڭ جالاقىسىن 20 پايىزعا, ال تومەن جالاقى الاتىن قىزمەتكەرلەردىڭ ايلىق تابىسىن 35 پايىزعا كوتەردىك. قازىر ءبىزدىڭ كومپانيادا ەڭ تومەنگى جالاقى مولشەرى – 67 مىڭ تەڭگە, - دەيدى ز.يحسانوۆ.
ەلىمىزدە ارنايى تەحنيكا شىعاراتىن ءىرى كاسىپورىننىڭ ءبىرى - «اگرورەمماش» اق باسشىلارى دا يگىلىكتى باستاماعا ءۇن قوسۋشىلاردىڭ ءبىرى. 60 جىلدان بەرى بۇكىل قازاقستان ءوڭىرى مەن جاقىن شەتەلدەردى ارنايى ورتسوندىرگىش تەحنيكامەن, قالالىق اباتتاندىرۋ مەكەمەلەرى ءۇشىن قاجەتتى سۋ تاسۋ-سۋارۋ تەحنيكالارىمەن قامتىپ كەلە جاتقان مەكەمە بۇگىندە اۆتوتسيستەرنالار, تىركەمەلى كوممۋنالدىق تەحنيكالار, ەۋروكونتەينەر جانە باسقا دا ءتۇرلى مەتاللقۇرامالار شىعارۋمەن دە تانىمال.
- ەڭبەك ەتكەن ادام سول ەڭبەگىنە لايىقتى جالاقى الۋى ءتيىس. بۇل باعىتتا ەلباسى وتە ورىندى ماسەلە كوتەرىپ وتىر. جالاقىنى ءوسىرۋ, سول ارقىلى حالىقتىڭ جاعدايى تومەن توبىن الەۋمەتتىك قولداۋ – دۇرىس ماسەلە. ءبىزدىڭ كومپانيا دا 2019 جىلدىڭ ءبىرىنشى قاڭتارىنان باستاپ ەڭ تومەنگى جالاقى مولشەرىن 60 مىڭ تەڭگەدەن اسىرۋعا شەشىم قابىلدادى, - دەيدى كومپانيا ديرەكتورى ارمات دۇيسەنوۆ.
2017 جىلدىڭ سوڭىندا ورالدىق «پوش رۋنو» فيرماسىندا تەرى وڭدەيتىن جاڭا زاۋىت ىسكە قوسىلعان بولاتىن. ونىڭ قۋاتى جىلىنا 182 مىڭ ءىرى قارا تەرىسى مەن 624 مىڭ قوي-ەشكى تەرىسىن وڭدەۋگە جەتەدى. كاسىپورىن شىعاراتىن ءونىمنىڭ ءبىر جىلدىق قۇنى 2,2 ملرد. تەڭگەگە جەتپەك. قازىردىڭ وزىندە زاۋىت شىعارعان ءونىم وتىندىق نارىقتان بولەك, تۇركيا مەن ەۋروپا ەلدەرىنە ەكسپورتتالىپ جاتىر ەكەن. كاسىپورىن ديرەكتورى ەرلان ءىلياسوۆ بۇل جەتىستىكتەرگە ەلباسى جۇرگىزىپ وتىرعان ەكونوميكالىق ساياساتتىڭ ناتيجەسىندە قول جەتكىزدىك دەپ سانايدى.
- ەلباسىنىڭ وسى جولداۋى دا مەملەكەتتىك ساياساتتىڭ الەۋمەتتىڭ ءال-اۋقاتىن كوتەرۋگە باعىتتالعانىن كورسەتىپ وتىر. بۇكىل الەم بويىنشا الەۋمەتتىك باعدارلامالار ازايىپ, كوپتەگەن مەملەكەت ءوز حالقى الدىنداعى الەۋمەتتىك مىندەتتەرىن ورىنداي الماي وتىرعان داعدارىس ساتىندە ەلباسىنىڭ بۇل باستاماسى – وتە ماڭىزدى قادام دەپ ەسەپتەيمىز. ءبىز دە ءوز كەزەگىمىزدە ەڭ تومەن جالاقى الاتىن 50 قىزمەتكەرىمىزدىڭ جالاقىسىن كوتەرۋگە شەشىم قابىلدادىق. قاڭتار ايىنان باستاپ ولار ايىنا 92 مىڭ تەڭگە الاتىن بولادى, - دەيدى «پوش رۋنو» جشس باسشىسى ەرلان ءىلياسوۆ.
كاسىپورىن باسشىلارىنىڭ يگىلىكتى باستامالارىن قۇپ العان باتىس قازاقستان وبلىسى اكىمىنىڭ ورىنباسارى باعدات ازباەۆ ءوز كەزەگىندە بۇل كومپانيالاردىڭ الداعى قىزمەتى مەن باسەكەگە قابىلەتتىلىگىن ارتتىرۋ ىسىندە جەرگىلىكتى بيلىك تاراپىنان بارىنشا قولداۋ كورسەتىلەتىنىن مالىمدەدى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان