بارلىق دەڭگەيدەگى اكىمدەردىڭ تۇرعىندار الدىندا ەسەپ بەرۋ كەزدەسۋلەرىنىڭ قورىتىندىسى
قازاقستان رەسپۋبليكاسى پرەزيدەنتىنىڭ 2005 جىلعى 6 ساۋىردەگى №1546 جارلىعىنا سايكەس ۇستىمىزدەگى جىلدىڭ 10 قاڭتارى مەن 12 اقپانى ارالىعىندا رەسپۋبليكا وڭىرلەرىندە بارلىق دەڭگەيدەگى اكىمدەردىڭ تۇرعىندارمەن 8915 ەسەپ بەرۋ كەزدەسۋى ءوتتى, وعان 1 ميلليوننان استام ادام قاتىستى.
الەۋمەتتىك جانە ەكونوميكالىق سيپاتتاعى ماسەلەلەردى قوزعايتىن 28 مىڭنان استام سۇراق كەلىپ ءتۇستى.
ەسەپ بەرۋ كەزدەسۋلەرىنە جوعارى مەملەكەتتىك ورگانداردىڭ وكىلدەرى مەن قازاقستان رەسپۋبليكاسى پارلامەنتىنىڭ دەپۋتاتتارى قاتىستى.
وڭىرلەردەگى تۇرعىندارمەن كەزدەسۋلەردىڭ بارىسىندا 2009 جىلى داعدارىستى ەڭسەرۋدە مەملەكەت تاراپىنان كورسەتىلگەن كومەك ءۇشىن مەملەكەت باسشىسىنا, ۇكىمەتكە العىس ايتىلدى. “جول كارتاسى” اياسىندا داعدارىسقا قارسى ءىس-شارالاردى ىسكە اسىرۋ, جاڭا مەكتەپتەردىڭ, بالالار باقشالارىنىڭ جانە دەنساۋلىق ساقتاۋ وبەكتىلەرىنىڭ اشىلۋى, مادەنيەت پەن سپورت وبەكتىلەرىنىڭ ماتەريالدىق-تەحنيكالىق بازالارىن نىعايتۋ, كوممۋنالدىق ينفراقۇرىلىمدارعا ءجوندەۋ جۇرگىزۋ جانە ەلدى مەكەندەردى اباتتاندىرۋ ىستەرى حالىقتان كەڭىنەن قولداۋ تاپتى.
كوپتەگەن اكىمدىكتەر كەزدەسۋلەر ۇيىمداستىرۋدىڭ جاڭا ءتۇرىن بەلسەندى پايدالاندى. مىسالى, قازىرگى زامانعى تەحنولوگيانىڭ ارقاسىندا اقتوبە, پاۆلودار جانە شىعىس قازاقستان وبلىستارىنىڭ تۇرعىندارى بارلىق اۋداندار مەن قالالاردا وڭىرلەر اكىمدەرىنىڭ ەسەپ بەرۋ كەزدەسۋلەرىن تىكەلەي ەفيردەن قاراۋ مۇمكىندىگىنە يە بولدى.
كەزدەسۋلەر ازاماتتاردىڭ كوممۋنالدىق قىزمەت باعاسىنىڭ كوتەرىلۋىنە, رۇقساتتاما قۇجاتتارىن بەرۋ كەزىندە جەرگىلىكتى اتقارۋشى ورگاندار جۇمىسىنىڭ تيىمسىزدىگىنە, جىلۋمەن جانە سۋمەن جابدىقتاۋداعى پروبلەمالارعا بايلانىستى ايتارلىقتاي الاڭداۋشىلىقتار بار ەكەنىن كورسەتتى. بىرقاتار ماسەلەلەر دەنساۋلىق ساقتاۋ جۇيەسىن رەفورمالاۋعا, جولداردى دەر كەزىندە تازالاۋعا, ەلدى مەكەندەردىڭ اۋماعىنا تازالىق جۇمىستارىن جۇرگىزۋگە, قوعامدىق كولىكتىڭ قوزعالىسىن ۇيىمداستىرۋعا جانە وزگە ماسەلەلەرگە قاتىستى بولدى.
ەسەپ بەرۋ كەزدەسۋلەرىندە كوممۋنالدىق جانە مونوپولياعا قارسى قىزمەتتەگىلەردىڭ, قۇقىق قورعاۋ ورگاندارىنىڭ تۇرعىنداردىڭ الدىندا ەسەپ بەرۋىن وتكىزۋ قاجەتتىگى تۋرالى ماسەلە بىرنەشە رەت قويىلدى.
قازىرگى ۋاقىتتا ۇسىنىستار مەن ەسكەرتپەلەردى ىسكە اسىرۋ شارالارى ازىرلەندى, جەرگىلىكتى اتقارۋشى ورگانداردىڭ باقىلاۋى قامتاماسىز ەتىلدى.
ەسەپ بەرۋ كەزدەسۋلەرى ىسكەرلىك جاعدايدا ءوتتى, وبلىستار مەن قالالاردى, اۋدانداردى, اۋىلدار مەن كەنتتەردى دامىتۋدا اناعۇرلىم وزەكتى پروبلەمالار جونىندە سىندارلى پىكىر الماسۋلار بولدى.
قازاقستان رەسپۋبليكاسى پرەزيدەنتى اكىمشىلىگى
مەملەكەتتىك باقىلاۋ جانە ۇيىمداستىرۋ-اۋماقتىق جۇمىستار ءبولىمى.